Mbetje toksike nga Greqia
Albana Çakshiri & Trëndafile Visha
Gazeta shqiptare
Plot 350 ton mbetje plastike janë transportuar nga Greqia dhe janë depozituar përgjatë një muaji në periferi të qytezës së Bilishtit, në rrethin e Devollit. Një fakt i tillë është bërë me dije nga vetë administratori shqiptar i firmës “Etna Polimer” Sh.P.K., Vullnet Haka. Ndërsa Ministria e Mjedisit, Pyjeve dhe Administrimit të Ujërave ka disa ditë që rreket të “zbulojë”, nëse firma në fjalë i ka siguruar mbetjet plastike vetëm brenda territorit shqiptar, ashtu siç është parashikuar në licencën e dhënë prej saj, administratori shqiptar nuk i ka “harxhuar” shumë kohë këtij institucioni, por ka sqaruar publikisht aktivitetin e kësaj firme. Haka dje ka deklaruar për “Gazeta Shqiptare”, se gjithçka është kryer konform të gjitha ligjeve dhe se investimi për riciklimin e mbetjeve plastike është një gjë shumë pozitive, jo vetëm Shqipërinë, por për gjithë rajonin e Ballkanit. Sipas tij, vetëm faza e parë e projektit kap vlerën e 3 milionë eurove. Madje, Vullnet Haka thotë se ka marrë lejet përkatëse nga Ministria e Mjedisit si dhe nga Bashkia e Devollit. Nga ana tjetër, tri ditë më parë zëdhënësi i kësaj ministrie, Tom Therçaj u shpreh për Gazetën, se firma është e licencuar për grumbullimin e riciklimin e mbetjeve të plasmasit të siguruara vetëm brenda territorit të vendit tonë. Sipas Therçajt, ministria nuk ka dhënë asnjë leje për importimin e këtyre mbetjeve nga Greqia apo ndonjë vend tjetër. Gjithashtu, pak ditë më parë, kryebashkiaku Valter Miza pohoi se i ka lënë vetëm 5 ditë afat firmës për largimin e mbetjeve plastike. Pavarësisht mospërputhjes në deklarata, administratori i firmës “Etna Polimer”, sqaron se tonelatat e mbetjeve plastike që kanë ardhur nga Greqia, gjatë kohëve do të riciklohen dhe garanton se nuk do të ketë djegie të tyre. Ndërkaq, mësohet se firma ka marrë leje që të ngrejë impiantin në superstradën Korçë-Kapshticë, në afërsi të fshatit Tren. Por grumbullimi i mbetjeve plastike është bërë në periferi të qytezës së Bilishtit, shumë pranë zonës së banuar. Në lidhje me këtë “detaj” të vogël, administratori Haka tregon para opinionit publik se mbetjet plastike janë grumbulluar tek lagjja pranë ish-SMT-së së Bilishtit, vetëm përkohësisht. “Ky është një investim shumë serioz, me një impakt pozitiv jo vetëm për zonën. Banorët nuk kanë pse të shqetësohen, pasi këto mbetje nuk kanë asnjë impakt negativ në ambient. Malli ka ardhur nga Greqia, dhe janë përafërsisht rreth 350 ton, nëpërmjet doganës së Kapshticës, ndërsa janë marrë të gjitha lejet përkatëse”, - thotë Vullnet Haka. Po sipas tij, firma “Etna Polimer” ka katër aksionerë nga Greqia dhe Turqia (mesa duket, ministria që kryesohet nga Xhuveli ende nuk e di këtë fakt), ndërsa ai është aksioneri i vetëm shqiptar. Por me gjithë sqarimet e dhëna nga Haka, banorët e Bilishtit shprehen se nuk po durojnë dot erën e keqe dhe se mbetjet plastike rrezikojnë jetën e tyre. Ata kërcënojnë se do të vazhdojnë protestat, nëse firma nuk largon nga qyteza tonelatat me mbetjet e rrezikshme.