Saturday, 12 January 2008
Artistët operistikë shqiptarë duket se kanë filluar që të rrëmbejnë sukseset në skenat evropiane që në ditët e para të vitit 2008. Një nga vendet, i cili ka marrë ajkën e artistëve operistikë shqiptarë është vendi fqinj Italia, i cili sezonin artistik operistik të tij e ka hapur me artistët më të mirë shqiptarë, të cilët me zërin e tyre brilant janë bërë edhe përcjellës të artit shqiptar në vende të tjera. Në mbrëmjen e ditës së nesërme sopranoja e parë e Teatrit të Operës dhe Baletit Eva Golemi së bashku me një ndër tenorët më të talentuar shqiptar Armando Kllogjerido të ngjiten në skenën e qytetit të Leçes në Itali ku do të interpretojnë përkrah artistëve italianë në operën “Toska”. Para koncertit sopranoja e njohur në një prononcim dhënë për gazetën “Sot” u shpreh se ndihej e lumtur që do të interpretonte rolin e Toskës në shfaqjen operistike me të njëjtin emër, dhe ndërkohë ajo po përgatitej për shfaqjet që do të startojnë në skenën shqiptare, por pa harruar edhe skenat evropiane.“Unë dhe tenori Armando Kllogjeri kemi një koncert ditën e hënë në Leçe të Italisë me operën “Toska” dhe pastaj do të kthehemi po me operën “Toska” dhe Violetën në sezonin artistik që sapo ka nisur. Por, në datën 18 janar do të interpretoj në galanë e Teatrit të Operës dhe Baletit. Gjatë vitit 2008, përveç projekteve me Teatrin e Operës dhe Baletit, në muajt mars unë do të jem pjesë e një turneu ku do të jem në disa qytete të Italisë si në: Milano me “Al’rzianet e Çiliea” në këtë opera unë do të interpretoj rolin e Vivetës. Pas këtyre vjen opera “Don Karlosi” e Verdit ku unë do të luaj rolin e Elizabetës. Pas këtyre në Kroaci kam përsëri “Toskën”, më pas në Napoli “Traviatën” si dhe shumë projekte të tjera. Por, ndërkohë që do të jem pjesë e pandarë në veprat që do të vendosen në Teatrin e Operës dhe Baletit”- u shpreh sopranoja. Por, në këtë sukses nuk ngelet më pas edhe tenori Armando Kllogjeri, i cili ka interpretuar me shumë sukses në skenën shqiptare, por edhe në atë botërore, i cili do të interpretojë mes të tjerave edhe një arie të famshme franceze. Më tej gjatë fjalës së saj sopranoja shton se në këto bashkëpunime, përveçse krijimit të një marrëdhënie të ngrohtë mes kolegësh shumë e rëndësishme është edhe eksperienca. “Është shumë e rëndësishme të kesh sa më shumë kontakte, jo vetëm me regjisorë, por edhe me kolegë të teatrove të tjera, të shkollave të ndryshme nga kjo e jona, pasi gjithmonë ka diçka për të mësuar. Gjithçka është eksperiencë, dhe secili ka sjelljen e tij artistike. Mbi të gjitha duhet të mësosh të dish të kesh marrëdhënie të ngrohtë në skenë, pasi në të kundërt publiku do të qëndrojë larg, dhe për ne, shpërblimi i madh janë duartrokitjet dhe ajo çka arrijmë të përcjellim te të tjerët”- sqaron sopranoja. Viti 2007 ka qenë tejet intensiv për sopranon Golemi, jo vetëm në skenën tonë të operës, por edhe përtej. Nisi me “Buterfly” për të vijuar me “Traviatën” që e vuri në skenë Massimo Ranieri. Pas një audicioni në Milano, ishte në një turne, ku interpretoi Violeten në operën “Traviata”. Nga Italia në Gjermani, Angli, Francë, Danimarkë, Zvicër. Plot 11 shfaqje në rolin e Violetës në skena të huaja, duke mos llogaritur shfaqjet ne skenën e TOB-it. Për të vijuar mandej me Rozalindën, te “Lakuriqi i Natës”, e për ta përfunduar në galanë e fundvitit, që ishte edhe balloja e madhe vjeneze, që po synon të kthehet në një traditë edhe në Tiranë. Por, në skenën e italiane ka disa ditë që po interpreton në mënyrë të suksesshme edhe tenori tjetër shqiptar Josif Gjipali dhe pikërisht në Gjenova të Italisë. Tenori Josif Gjipali interpreton në operën "Manon Lescaut" që hapi sezonin operistik në Gjenovë, e cila njihet si historia e kalorësit De Grieux dhe Manon Lescaut ku rolin e kalorësit De Grieux e interpreton tenori shqiptar. Në këtë vepër operistike është respektuar epoka si në skenografi, ashtu edhe në kostume. Manon interpretohet nga Micaela Carosi që dy vjet më parë fitoi çmimin "Abbiati" të kritikës muzikore italiane, Lescaut nga Gabriele Viviani, Geronte nga Carlo Lepore, etj. Në Torino në 1 shkurt 1893, triumfi i "Manon Lescaut" u bë suksesi i parë i vërtetë dhe bekimi i Giacomo Puçinit. Trajtimi i historisë është kompleks pasi duhet të kalosh situata të ndryshme për të arritur në fundin tragjik. Ndërsa muzika ndjek dashurinë e dy të rinjve, studentit Renato (Josif Gjipali) dhe 18-vjeçares Manon, që ishte nisur për në një manastir. Vepra ka arie të mrekullueshme si në momentet e dëshpërimit, ashtu dhe në ato të trishtimit. Vepra do të ngjitet në skenë deri në datën 20 janar. Roli i radhës për tenorin shqiptar është ai i Rikardos në "Një ballo me maska" në muajin mars në Marsejë. Në skenën shqiptare opera “Toska” u interpretua në vitin 2002 me dirigjent grekun Viron Fidexhi me pjesëmarrjen e solistëve të orkestrës së TOB. Kjo vepër operistike në atë vit u vendos në skenën shqiptare edhe falë bashkëpunimit me Institutin Italian të Kulturës në vendin tonë, i cili mundësoi edhe ardhjen e tenorit të famshëm italian Alifio Grasi. Por, në role të tjera në këtë kohë interpretuan edhe emra të tjerë të njohur si: Edit Mihali me rolin e Florias, Gjergj Sulioti, Ylber Gjini etj, të cilët nën regjinë e Nikolin Gurakuqit sollën në skenën shqiptare një rifreskim të kësaj shfaqjeje operistike.