aristir lumezi

Kodi Zgjedhor nuk do të hyjë në seancën e ditës së enjte për miratim dhe shtyhet për ditët në vazhdim. Maxhoranca duket se kërkon të përfitojë përsëri kohë për një përplasje të re PS-LSI në lidhje me Kodin Zgjedhor, pas ngjarjeve me grevën e urisë së 10 deputetëve. Nga ana tjetër, burime nga Komisioni i Ligjeve bënë të ditur se ende nuk ka një pozicionim të qartë të maxhorancës në lidhje me dekretin e Presidentit, nëse do të ketë një votim për ta rrëzuar apo do të bëhen ndryshimet që sugjeron Topi. Aktualisht drafti i Kodit Zgjedhor që u kthye nga Presidenti i Republikës ndodhet në Komisionin e Ligjeve të Kuvendit, ku pritet të diskutohet nëse do pranohet kërkesa e Presidentit apo ajo do të rrëzohet. Ende nuk ka një reagim nga Partia Socialiste nëse do të ulet dhe të bisedojë me Lëvizjen Socialiste për Integrim për çështjet e Kodit Zgjedhor. Nga ana e tij, Ilir Meta ka bërë ftesë të hapur për të biseduar me kreun socialist Edi Rama, për të garantuar standardet në zgjedhjet e ardhshme të vitit 2009. Në këtë mungesë reagimi nga ana e PS-së, duket se kërkon të përfitojë e djathta, e cila lë hapësirë kohore për të diskutuar për Kodin, me shpresë se të majtët do të thellojnë përçarjen e tyre, gjë që do t’i interesonte asaj në zgjedhjet e ardhshme. Pritet që në ditët në vazhdim kjo ‘djallëzi’ e maxhorancës të vërtetohet ose të dështojë në varësi që të majtët, PS dhe LSI do të mbajnë në lidhje me bashkimin ose përçarjen e tyre më të thellë për çështjet e Kodit. Injorimi momental i ftesës së LSI-së nga ana e socialistëve për të biseduar dhe gjetur zgjidhje në nenet e Kodit që i referohen administrimit të zgjedhjeve, jep përshtypjen se plani i maxhorancës do të dalë i suksesshëm. Në fakt, Partia Demokratike dhe kryetari i saj, Sali Berisha, hodhi akuza ndaj Presidentit të Republikës për qëllimin e vërtetë të kthimit të Kodit Zgjedhor sërish në Kuvend, ndërsa e cilësoi argumentin e tij për përplasje mes neneve si pseudoargument. Sipas tij, Presidenti Topi e ktheu Kodin sepse kërkon të ketë një ujdi midis Edi Ramës dhe Ilir Metës.
Por me shtyrjen e shqyrtimit të Kodit Zgjedhor dhe moskalimin e tij sa më shpejt në Kuvend, për të mos humbur, ashtu siç u kërkua, kohën e nevojshme për të nisur përgatitjet e zgjedhjeve të ardhshme, duket se është e interesuar e gjithë e djathta, e cila pret se ç’do të ndodhë në kampin e majtë.
Panorama