Turp me libër shtëpie. Kështu i është përgjigjur Edi Rama kryeministrit Berisha, një ditë pas debateve në Parlament për ligjin e dosjeve. "Unë jam këtu për t'i thënë Sali Berishës se si djali i një nëne duhet të të vijë një herë turp, si burri i një gruaje duhet të të vijë dy herë turp, si babai i dy fëmijëve duhet të të vijë dhjetë herë turp, si gjyshi i nipave e mbesave të tua duhet të të vijë njëqind herë turp dhe si kryeministri i të gjithë shqiptarëve e shqiptareve që të shohin e dëgjojnë kur dhunon traditën familjare e kodin etik të tyre, duhet të të vijë njëmijë herë turp"-tha Rama dhe më tej i ka kujtuar se ai ka qenë sekretar partie. "Sali Berishës duhet t'i vijë turp nga shfaqja e shëmtuar e dyfytyrësisë që dha mbrëmë sepse teksa fliste për plagët e komunizmit e kishte mendjen tek lulet e korrupsionit, teksa ngrinte zërin për krimet politike të partisë së tij të vjetër, e kishte hallin tek krimet ekonomike të partisë së tij të re,

teksa akuzonte duke ngritur gishtin shokët e tij të dikurshëm në shërbim të diktaturës së proletariatit,

e kishte merakun tek gishti i ngritur nga organi i sotëm i akuzës në adresë të qeverisë së tij"-deklaroi Rama në përgjigje të akuzave të Berishës për lidhje me diktaturën, pasi është bir i anëtari të Komitetit Qendror dhe nip i një anëtari të Byrosë Politike të PPSH.

Sipas Ramës janë të panumërta arsyet pse Berishës duhet t’i vijë turp, si shkelës dhe dhunues i familjes, por mbi të gjitha për rolin e mbrojtësit të zjarrtë të të përndjekurve nga diktatura komuniste, për të cilët nuk ka dhënë asnjë qindarkë. Ndërkohë që në emër të të përndjekurve, ka thënë Rama, ai shkeli Kushtetutën vetëm e vetëm për të shkatërruar një pushtet gjyqësor që po heton qeverinë e tij, është kryeministri që ka një sekser serb, i cili, i vetëm,ka bërë me korrupsion në 3 vjetët e kësaj qeverisjeje, aq para sa do të duheshin për të dëmshpërblyer 3 milionë e 375 mijë ditë burgu politik ose 6 milionë e 750 mijë ditë internimi. Ai ka theksuar se mbrëmë shqiptarët e shqiptaret patën rastin të shohin sekretarin e djeshëm të partisë së Enver Hoxhës dhe kryeministrin e sotëm të vendit, komunistin e vjetër dhe demokratin e flaktë Sali Berisha, në njërën prej shfaqjeve më të shëmtuara të politikës së vjetër të dyfytyrësisë. Nuk është hera e parë që Sali Berisha prek të vdekurit e të gjallët e familjes së tij, - tha Rama, duke shtuar kur kam marrë përsipër të udhëheq betejën për ta larguar nga skena politike këtë monument të dyfytyrësisë së politikës së vjetër të 17 vjetëve tranzicion, i ka marrë parasysh të gjitha. Kreu i socialistëve ka kujtuar edhe njëherë se qëllimi i Berishës nuk është dënimi i diktaturës së komunizmit, po mbrojtja e diktaturës së korrupsionit.

******************************************************
PD: Rama të kërkojë falje për firmën e të atit për ekzekutimet

PD e ka sulmuar sërish Ramën nga selia blu duke publikuar emrat e disa intelektualëve të dënuar nga regjimi me firmën e të atit dhe të dajos së tij. "Kryeministri fton zotin Rama të gjejë kurajë dhe të shkëputet nga mbrojtja e lidhjeve të tija të vjetra, sepse kjo do ta ndihmojë të shikojë përpara."- thuhet në deklaratën e Gerti Bogdanit, zëdhënës i PD. Në njoftim thuhet gjithashtu se, " Pasi tërhoqi grupin parlamentar nga debati për ligjin e pastërtisë së figurave, Rama doli përpara shqiptarëve për të bërë sulmin e radhës ndaj Kryeministrit. Kryeministri ka respekt për të ekzekuarit e regjimit dhe familjarët e tyre, Kryeministri ka respektin më të madh edhe për të vërtetën, e cila tmerron Edi Ramën. Në diskutimin e tij Kryeministri theksoi se Rama po pengon Partinë Socialiste dhe po e rendit atë krahas Partisë Socialiste Serbe dhe Partisë Radikale Serbe, si tre parti që nuk e pranojnë lustracionin. Rama e bën këtë vetëm e vetëm për të mbrojtur lidhjet e tij me të kaluarën e zezë të tij. Në rast se zoti Rama do të faktojë të kundërtën, duhet tu kërkojë të falur shqiptareve, për firmën që ati i tij, si anëtar i Presidiumit të Kuvendit Popullor ka vendosur për ekzekutimin e intelektualëve të shquar Avzi Nela, Vilson Blloshmi, Gazmend Leka dhe dhjetëra e dhjetëra të tjerë. Zoti Rama duhet tu kërkojë të falur shqiptareve per dhjetëra e dhjetëra bij dhe baballare të cilët u ekzekutuan nga ekspertiza e pseudointelektualit Spiro Koleka. Zoti Rama e di mirë se kryeministri Berisha nuk bën përgjegjës djalin për të atin, por Rama, nuk pranon lustracionin dhe fakton se më shumë se gjithçka mbron të shkuarën e familjes së tij."

SOT