Kryeministri Berisha, ka takuar sot pasdite Sekretaren amerikane të Shtetit Hilari Klinton. Në bisedën mes tyre tema kryesore ka qenë anëtarësimi i Shqipërisë në NATO, si edhe zgjedhjet në vend. Të dy bashkëbiseduesit kanë mundur të diskutojnë edhe për ligjin e lustracionit, i cili sipas Berishës është një ligj i plotë dhe kushtetues. Berisha ka siguruar Klinton se zgjedhjet që do të zhvillohen në qershor do të jenë të lira dhe sipas standarteve të kërkuara. Ndër të tjera, Berisha e ka bërë me dijeni Sekretaren amerikane të Shtetit se Shqipëria është e gatshme për të dërguar trupa shtesë drejt Afganistanit. Kryeministri Berisha zhvilloi në Uashington një takim të veçantë me gjeneralin Uesley Clark. Në këtë takim të ngrohtë dhe tepër miqësor, Kryeministri Berisha vlerësoi lart figurën e gjeneralit Clark për ndihmën e madhe dhe rolin që ai ka luajtur për dhënien fund të barbarisë së regjimit të Millosheviçit kundër të drejtave të njeriut në Kosovë. Falë edhe kontributit të zotit Clark, u shpreh Kryeministri Berisha, Kosova është sot një shtet i lirë dhe i pavarur. Gjenerali Clark vlerësoi reformat e qeverisë së kryesuar nga Kryeministri Berisha dhe shprehu bindjen për rrugën e sigurt të Shqipërisë në NATO.