70% e prodhimeve fallco, jeta e qytetareve ne rrezik

70 për qind e tregut joushqimor fals, kërcënohen konsumatorët

BLERINA ZYLYFTARI

31/01/2008 IQT kontroll për sigurinë në treg, gjoba për ata që tregtojnë mallra të pakontrolluara

Tregu joushqimor vendas është i mbushur tej e tej me mallra që cenojnë sigurinë e konsumatorit. Bëhet fjalë për 70 për qind e të gjithë mallit që qarkullon në këtë treg, i cili është gatuar fals deri në pikën e kërcënimit të shëndetit të qytetarëve, të cilët shpenzojnë para për blerjen e tyre. Kryesisht bëhet fjalë për mallrat e origjinës nga vendet aziatike dhe ato turke, të cilat nuk arrijnë në asnjë formë parametrat e sigurisë. Këtu mund të renditen mallrat elektronike si frigoriferët, televizorët, tharëset e flokëve, si dhe spinat, prizat apo edhe lodrat apo produktet plastike. Madje këto të fundit kanë shumë mundësi të jenë imazhi i ricikluar i një sasie të përqendruara lëndësh kimike. Duke u dhënë një formë estetikisht të pranueshme, mbërrijnë deri në duart e konsumatorëve shqiptare, të cilët që nga ky moment nisin e bashkëjetojnë me produkte që janë në çdo çast të dëmshme dhe të pasigurta. Pra, pjesa më e madhe e produkteve që i ofrohet shqiptarëve nga tregjet e bollshme vendase s’janë gjë tjetër veçse produkte false burim për efekte negative si dhe mallra të pakontrolluar e defektoz.

Kontrolli

Një situatë tillë u prezantua nga Inspektorati Qendror Teknik, i cili ka për detyrë kontrollin e këtij tregu. Kreu i këtij institucioni, Ilr Kurti, pohoi se për këtë vit, inspektorati do të fokusohet në kontrollin e këtyre produkteve joushqimore, të cilat janë bërë një kërcënim serioz për konsumatorët. “Për sa i përket vitit 2008 specifika do të jetë kontrolli i tregut, i cili do të fokusohet në kontrollin e produkteve industriale, të cilat nuk garantojnë sigurinë e konsumatorit. Mund të them se situata e tregu joushqimor është problematike. Më duhet të them se rreth 70 për qind e tregut është fals e keqe”, theksoi Kurti. Sipas tij, kjo do të thotë ka produkte, të cilat nuk i ngjajnë atij produkti që falsifikohet ose e thënë ndryshe nuk ka asnjë tregues prej tij, duke gënjyer në elementët e tij. Gjithashtu sipas tij, i gjithë ky produkt fals është me parametra të ulët sigurie.

Sensibilizimi

Krahas kësaj, nga autoritetet zyrtare kërkohet që konsumatorët të mos heshtin apo të pranojnë produktet për të cilat konstatojnë që ka diçka që nuk shkon. Inspektorati Qendror Teknik kërkon që të vihet në dijeni përmes numrit jeshil mbi çdo rast të hasur dhe të evidentuar nga qytetarët për produkte të ndryshme që rezultojnë me defekte, shkaktojnë shoke elektrike, shkëndija apo kanë efekte negative gjatë përdorimit të tyre. Një situatë e tillë duket se ka molepsur të gjithë tregun vendas, ku produktet aziatike mbizotërojnë nga cepi në cep. Duke marrë spunto nga raste reale IQT ka vendosur të ndërhyjë kësaj here përmes çfarëdolloj mase administrative që është e përcaktuar në ligjin “Për sigurinë e përgjithshme kërkesat thelbësore dhe vlerësimin e konformitetit të produkteve joushqimore”. Një ndërhyrje e tillë paraqitet e domosdoshme për tregun tonë, me qëllim që të pastrohet nga mallra të tillë e të zëvendësohen më të tjerë mallra të sigurt, duke i ngjarë kështu tregjeve evropiane. Ndërkaq, gjobat që mund të aplikohen nga IQT-ja variojnë nga 200 mijë lekë të vjetar deri në 6 milionë lekë për çdo subjekt që tregton mallra të pasigurt.

Lodrat e rrezikshme

Në fund të vitit të shkuar, Ministria e Ekonomisë, Tregtisë dhe Energjetikës njoftoi se një kategori lodrash të kompanisë “Fishe Price”, të cilat paraqisnin rrezikshmëri për përmbajtjen e plumbit mbi nivelet e lejuara. Sipas ministrisë, kjo shoqëri ka kërkuar vetë tërheqjen e këtyre lodrave. Nga ana tjetër, në kuadër të Sistemit për Këmbimin e Shpejtë të informacioneve për produktet e rrezikshme të vendosura në tregun e brendshëm të BE-së, Ministria e Ekonomisë informoi për një kategori tjetër lodrash të rrezikshme. Bëhej fjalë edhe lodra të tjera që vijnë kryesisht nga Kina, të cilat paraqisnin rrezikshmëri të lartë ndaj asfiksimit ose helmimit, shokut elektrik, dëmtimeve të ndryshme fizike, apo bakteriologjike të provuara nga testimet e laboratorëve të vendeve të Bashkimit Evropian. Në këtë kuadër, Ministria e Ekonomisë, Tregtisë dhe Energjetikë (METE) është përgjegjëse për marrjen e të gjitha masave për të garantuar sigurinë e produkteve jo ushqimore në treg, si dhe mbrojtjen e të drejtave të konsumatorëve. Ajo tërheq në vazhdim vëmendjen jo vetëm të konsumatorëve për mosblerjen e tyre, por edhe të shitësve të pakicës dhe shumicës për ndalimin e tregtimit të këtyre kategori lodrash. Gjatë asaj periudhe nga ana e ministrisë u morën masa për koordinimin me sukses të këtij aksioni me Drejtorinë e Përgjithshme të Doganave për pezullimin e zhdoganimeve, si dhe me Inspektoratin Qendror Teknik

70% e prodhimeve fallco, jeta e qytetareve ne rrezik

70% e prodhimeve fallco, jeta e qytetareve ne rrezik

70% e prodhimeve fallco, jeta e qytetareve ne rrezik :: Komentet