22 vendet më të varfra në botë, mes të cilave edhe Shqipëria, mund të kenë nevojë për një fond shtesë prej 25 miliardë dollarësh për këtë vit, ndërsa kriza globale financiare ka shkaktuar shqetësime në mbarë botën, e sidomos në vendet afrikane, të cilat janë mjaft të izoluara nga problemet bankare ndërkombëtare. në deklaratën e tij, të publikuar tek e përditëshmja “Wall Street Journal”, drejtorit i Fondit Monetar Ndërkombëtar, Dominik Shtraus Kahn, thekson se pasi ka dëmtuar vendet e pasura dhe kombet në zhvillim, vala e tretë e krizës financiare tashmë po godet edhe vendet e varfra, të cilat gjithashtu janë më të prekshme prej saj.
Sipas studimit të FMN-së, mes vendeve që institucioni i përcakton si “tepër të prekshme” nga kriza financiare, renditet edhe Shqipëria, e pasuar nga Armenia, Haiti, Hondurasi, Vietnami e Taxhikistani. Shtraus Kahn theksoi se FMN-ja dëshiron të përgjysmojë interesin e ulët të huadhënies për këto vende, me deri në 11 miliardë dollarë fitim në 5 vitet në vijim. Megjithatë, sipas tij, ky fond ende nuk do të ishte i mjaftueshëm për të mbuluar nevojat e këtyre kombeve, duke theksuar kështu se nevojiten të tjera para nga vendet e pasura. Megjithatë, ende nuk dihet nëse këto shtete do të japin një ndihmesë në përputhje me kërkesat që përmend FMN-ja. Edhe Banka Botërore po kalon një fazë problemesh duke marrë vetëm 0.7 për qind të paketës stimuluese nga shtetet, një shifër kjo më pak se 10 miliardë dollarë në tërësi, për të ndihmuar vendet e varfra tashmë të prekura nga kriza financiare globale.
Bota Sot