VLORË- Prokuroria ka kërkuar dënimin me 1 vit burg për kryetarin e bashkisë së Himarës dhe ndëshkim me gjobë në shumën e 5 milionë lekëve të vjetra për dëmin që ka shkaktuar me heqjen e tabelave. Kërkesa është bërë pak më parë, në seancën e radhës, ku ishte fjala e prokurorit për të paraqitur pretencën.
"Pas hetimit kërkojmë dënimin me 1 vit burg dhe pagesën e një gjobe në masën 5 milionë lekë"- ka thënë prokurori, Sokol Malaj. Pritet që seanca e radhës të zhvillohet në datën 24 mars, për të marrë edhe një vendim final lidhur me këtë çështje të nisur prej një viti. Akuzat që rëndojnë mbi Bollanon janë shpërdorim detyre. Procesi ka nisur për tabelat që janë hequr me urdhër të kryetarit të bashkisë Bollano, në aksin Qeparo-Llogora. Vlerësohet se dëmi që është shkaktuar nga heqja e tabela të jetë 21 milionë lekë të vjetra. Mbrojtësit nuk kanë pranuar akuzën, kanë kërkuar ndërrimin e trupit gjykues dhe pritet të flasin në seancën e radhës.
Shkak për hetimin e Bollanos u bënë ankesat e disa banorëve të zonës, të cilët kanë njoftuar prokurorinë për dëmin e shkaktuar në heqjen e tabelave orientuese në aksin Qeparo-Qafë Llogara. Pas verifikimeve në terren, ka rezultuar se policia bashkiake e Himarës i ka hequr ato me urdhër të kryetarit Vasil Bollano. Kështu, heqja e tyre për organin e akuzës përbën shkelje ligjore, e shoqëruar me një dëm ekonomik prej 21 milionë lekësh, për të cilën Bollano u mor i pandehur. Heqja e këtyre tabelave ka filluar dhe mbaruar brenda pak ditësh, duke krijuar edhe kaos tek qytetarët dhe turistët e shumtë që vizitojnë këtë zonë bregdetare të jugut.
Shekulli