Merret peng dhe perdhunohet 19-vjecarja



Eshtë marrë peng në mes të ditës, është përdhunuar në një hotel, ndërkohë që policia ende nuk ka mundur ta dokumentojë këtë ngjarje dhe të arrestojë autorin. Ngjarja e rëndë ka ndodhur në mes të Tiranës, ku sipas denoncimit të 19- vjeçares së dhunuar, personi ka qenë duke udhëtuar me një mjet, kur e ka futur me forcë brenda dhe ka bërë me të çka dashur. Policia e kryeqytetit bëri të ditur se kjo ngjarje e rëndë është denoncuar dy ditë më parë, ndërkohë që ka nisur puna për kapjen e autorit. Vajza e re, e cila është studente e vitit të parë në shkollën e lartë, është paraqitur në Komisariatin e Policisë Nr. 2 dy ditë më parë. Rreth orës 08.30 minuta, e veshur thjesht, e tmerruar dhe me lot në sy, ajo është paraqitur para derës së Komisariatit, ku oficeri roje e ka pyetur se çfarë kërkonte. “Dua të kontaktoj me ndonjë shef policie”, është shprehur ajo me gjysmë zëri, ndërsa dihaste nga trauma që kishte kaluar. Menjëherë policia është vënë në dispozicion të saj, duke e pyetur se për çfarë kërkonte ndihmë nga policia. E në këto kushte, pasi ajo është qetësuar, ka treguar se e kishin marrë peng dhe e kishin përdhunuar. Ajo ka rrëfyer se disa ditë më parë, pikërisht më datë 10 mars, ka qenë duke ecur në rrugën “Ylbere Bylykbashi”, kur një makinë, tipi i së cilës nuk deklarohet nga policia për arsye hetimore, i ka ndaluar para këmbëve dhe ka filluar ta ngacmojë. Duke dashur të vazhdojë rrugën, vajza 19-vjeçare, me iniciale K. A., i ka kërkuar ta linte të qetë, por kjo e ka nevrikosur edhe më shumë agresorin, ende të paidentifikuar. Në këto kushte, ai ka zbritur me nerva, e ka kapur me forcë për krahu, ndërkohë që askush nuk kalonte në rrugë, ia ka kërcitur me pëllëmbë fytyrës dhe e ka futur në makinë. Vajza e re ka treguar se në ato çaste ka humbur ndjenjat dhe e ka parë veten në një hotel, që nuk ka ditur të tregojë ekzaktësisht vendndodhjen. Aty, ajo është përdhunuar disa herë nga agresori, ndërkohë që më pas e kanë lënë sërish të lirë, duke e çuar me makinë, pikërisht ku e ka marrë. Megjithatë, vajza e re ka mundur të ruajë pak qetësi në ato momente të vështira dhe të mbajë në mendje një imazh të tij. Pas kësaj ngjarjeje, ajo ka shkuar në shtëpi, duke u ndjerë fajtore për çfarë i kishte ndodhur dhe nuk ka dashur të denoncojë në polici. Por, me kalimin e ditëve, është ndjerë më e qetë dhe ka vendosur të denoncojë në polici, me shpresën se uniformat blu do e arrestojnë agresorin e saj dhe do e dërgojnë para drejtësisë. Grupi hetimor, pasi ka dëgjuar dëshminë rrëqethëse të adoleshentes, ka ndërtuar një identikit të agresorit të saj, që vajza mendon se ishte pronari i hotelit, ku është përdhunuar, pavarësisht se nuk ka ditur të tregojë vendin. Më pas, hetimet i kanë kaluar seksionit kundër krimeve seksuale dhe lirisë së personit, i cili që prej tri ditësh po merret me dokumentimin e plotë të kësaj vepre penale. Sipas policisë, është identifikuar një i dyshuar për këtë ngjarje, por ende nuk ka prova për arrestimin e tij.

Burimi: Gazeta Shqip