Intervista e plote e presidentit Bamir Topi

Një eksponent i medias, garanci për agjentin serb

Presidenti Topi komenton situatën politike në vend dhe vizitën në Kosovë

Presidenti Bamir Topi, në një intervistë për emisionin Top Show, shprehet i bindur për marrjen e ftesës për anëtarësim të Shqipërisë në NATO. Presidenti Topi i cilësoi si trillime insinuatat e dhëna në media, sipas të cilave gjatë vizitës së bërë në Kosovë kishte pasur një incident. “Kur them se media duhet të jetë shumë e kujdesshme, kam parasysh edhe ndonjë fakt mjaft tronditës, dhe ky nuk është faji im, sepse ju e dini fare mirë që unë jam munduar gjithmonë që të jem në mbrojtje të së drejtës të gjithsecilit edhe për sa u përket interceptimeve apo përgjimeve telefonike. Në rrjetën e interceptimeve që u bëhet agjenturave serbe në Shqipëri, ditët e fundit është peshkuar edhe një eksponent i medias, i cili në kulmin e vizitës së Presidentit në Kosovës, i jepte garanci agjentit serb: “Shikoni se ç’do t’i bëj Presidentit në gazetë, sepse Presidenti kishte akuzuar politikën serbe dhe ruse që po minon procesin e paqes dhe marrjes së pavarësisë së Kosovës”, tha Kreu i Shtetit.

Gazetari: Është e vështirë në fakt, të kaloni nga nënkryetar i Partisë Demokratike në President të Republikës, të transformoheni në President të Republikës?

Presidenti Topi: Nuk mund të them këtu që gjithçka është e lehtë, sepse beteja në radhë të parë është me vetveten për të qenë i sinqertë në atë çka shpalos, dhe besoj momenti i betimit jo vetëm që është një moment solemn, por është edhe një moment kur praktikisht je në vëmendjen e gjithë publikut, të analistëve, sikurse jam edhe sot për të ushtruar pikërisht atë për cilën unë jam votëbesuar, për të cilën unë jam votëbesuar jo thjesht në Parlament, por edhe nëpërmjet sondazheve publike. Besoj që bëhet e lehtë në momentin kur je i motivuar, kur ke një qëndrueshmëri pikërisht të atij që sapo e shpreha, të karakterit, dhe ke një qëndrueshmëri për atë që je i mandatuar.

Gazetari: A ka një model tuajin, një model të paraardhësve?

Presidenti Topi: Jo, unë nuk shkoj me modele. Unë mundohem të jem vetvetja. Ajo që jam i detyruar të realizoj është pikërisht korniza kushtetuese, janë ligjet. Pastaj do të ishte gabim që t’i referohesha një modeli nga pikëpamja e sjelljes, nga pikëpamja etike, nga pikëpamja e marrëdhënieve me kolegët, ku secili ka modelin e tij. Pra, të jesh i natyrshëm është më e mira, dhe brenda natyrshmërisë të arrish suksesin ,është akoma edhe më mirë.

Gazetari: Duke qenë politikan i Partisë Demokratike ju është dashur të merrni pjesë në betejat që Partia Demokratike ka patur me paraardhësin tuaj, zotin Moisiu. Duke qenë brenda këtyre ambienteve, duke njohur nga afër ç’do të thotë të jesh President, a ka ndryshuar diçka në mënyrën se si e gjykoni dhe e vlerësoni Moisiun?

Presidenti Topi: Absolutisht, unë kam patur vlerësimet e mia për ish-presidentin Moisiu. Nuk jam kushtëzuar nga klima politike. Jam munduar të jem i ftohtë në gjykimet e mia. Kam ndarë në mënyrë të qartë betejën politike, e cila në Shqipëri sikurse dihet, herë pas here akutizohet dhe zhvillohet me tone shumë të ashpra dhe është mirë që politikani, pavarësisht nga intonacionet e betejës politike, kur është i detyruar, është mirë patjetër që të shpalosë argumente. Mund të ketë ardhur puna që të interferojë edhe figura e ish-presidentit, por gjithsesi kam qenë shumë i matur për ta respektuar figurën e presidentit dhe për ta gjykuar atë në rrethana konkrete, në rrethanat e një koniunkture të caktuar politike, që gjithsesi nuk kanë qenë të lehta as për ish-presidentin, por nuk kanë qenë të lehta dhe as për interlokutorët. Unë them që në atë kohë kam qenë një interlokutor i rëndësishëm i Partisë Demokratike dhe betejat kryesore janë zhvilluar në Parlament. Kryetari i grupit parlamentar, jo vetëm për shkak të pozicionit të tij institucional, por edhe për shkak të mundësive dhe aksesit që ka në marrëdhënie me kolegët, qofshin këta edhe të kampit tjetër, i jepet mundësia në momente delikate, i jepet misioni që të realizojë edhe pajtime e konsensuse, sikurse edhe janë realizuar.

Gazetari: Zoti President, duke mbetur tek reforma në drejtësi, ku natyrisht një pjesë e kësaj historie mbetet çështja e Prokurorit të Përgjithshëm. A nuk është e jashtëligjshme që ju të firmosni për prokurorët e parë të kalojnë në nivele të tjera pa pësuar ndonjë penalitet në lidhje me këtë?

Presidenti Topi: Jo, absolutisht jo! Unë natyrisht vendos firmën tek dekreti dhe sipas marrëdhënieve ligjore e kushtetuese, të gjitha propozimet vijnë nga kryeprokurori dhe mbi bazën e referencave ligjore, të cilat sigurisht janë të konsultuara edhe në planin juridik, vijnë dhe dekretohen nga Presidenti i Republikës. Pra, është ekskluzivitet organizimi i strukturave të Prokurorisë, ekskluzivitet i Kryeprokurorit me ligjet aktuale dhe në Kushtetutë parashikohet që dekretohet nga Presidenti i Republikës. Në të gjithë këtë linjë të komunikimit, ka patur sikurse thashë një konsultim mjaft profesional dhe absolutisht gjithçka është në një terren ligjor dhe kushtetues.

Gazetari: Ju në disa sondazhe përpara se të bëheshit President, kishit popullaritetin më të madh mes gjithë politikanëve të tjerë. Jeni ndopak i trembur që duke qenë në postin e Presidentit, mund të bjerë popullariteti juaj?

Presidenti Topi: Në veprimtarinë time asnjëherë nuk e kam patur mendjen te sondazhet, por gjithsesi i konsideroj mjaft të rëndësishme në vlerësimin e performancës kudo ku të jesh. Aq më shumë kur je në pozicionin e Presidentit të Republikës, sondazhet janë mjaft të rëndësishme. Besoj që në rastin konkret, të jesh në vëmendjen e shoqërisë do të thotë që shoqëria të vlerëson, ose të jep nota që nuk konsiderohen pozitive. Çdo njeri e ka të detyrueshme që të jetë përballë publikut dhe aq më shumë, e ritheksoj Presidenti i Republikës. Ç’ka do të thotë që në punë ke nevojë që të korrektohesh, edhe atëherë kur ke gabuar. Pra, është normale, askush të mos pretendojë që ka një performancë ideale. Askush nuk duhet të bjerë në klimë subjektivizmi. Kështu që unë e shikoj si një mekanizëm perfekt të demokracisë. Aq më shumë kur sot mikrofoni i hapur del në rrugë, është mikrofoni i hapur në studio, ka shumë pjesëmarrës, ka nivele të ndryshme, dhe ajo që ndodh në Shqipëri besoj është më e shprehur, sepse shumica e njerëzve janë shumë të lidhur me politikën, kjo edhe për shkak të asaj që kanë kaluar, por edhe për shkak të asaj që kanë shumë nevojë të mbështeten tek politika si një shpresë për të ndryshuar këtë realitet.

Gazetari: Do të flasim tani për disa çaste shumë të rëndësishme që janë të ditës dhe që kanë të bëjnë me rajonin. Kosova për pak ditë do të shpallë pavarësinë e saj. Cilat janë mesazhet tuaja për atë ditë?

Presidenti Topi: Mesazhet janë dhënë prej kohësh. Nuk besoj që të ketë mesazhe të reja, sepse ka qenë një proces mjaft i gjatë, një proces i lodhshëm, ka qenë një proces që na ka përfshirë të gjithëve. Mesazhi që mund të jepet për atë ditë është edhe ai që jep komuniteti ndërkombëtar. Është shumë e rëndësishme që të administrohet në mënyrë shumë të qetë Dita e Shpalljes së Pavarësisë, që tashmë është në prag. Këtë mesazh e kanë dhënë edhe liderët politikë kosovarë, sepse duhet të kemi parasysh jo vetëm realitetin që ekziston në Kosovë, si një realitet politik që i kalon kufijtë e Kosovës, me koniunktura të caktuara politike ndërkombëtare, por mbi të gjitha për të dhënë një sinjal shumë pozitiv për gjithë popullsinë dhe minoritetet serbe e të tjera që jetojnë në Kosovë.

Unë besoj se kohë pas kohe janë dhënë mesazhe qoftë nga Presidenti i Kosovës, zoti Sejdiu, qoftë nga Kryeministri Thaçi. Kanë qenë veprime mjaft të matura e të zbutura për t’i dhënë qetësi popullsisë serbe që të mos jenë pjesë e manipulimeve që vijnë nga qarqe të caktuara, që të jenë pjesë e trazirave; përkundrazi, për ta pritur këtë çast të lindjes së shtetit të ri me një mundësi të plotë për të jetuar në harmoni mbi bazën e të gjitha standardeve që përcaktohen nga Këshilli i Evropës e që përfshihen edhe në Planin e zotit Ahtisaari.

Gazetari : Ndërkohë, shtypi dhe mediat folën për një incident që ndodhi gjati vizitës suaj triumfale, ta quajmë, në Kosovë. Zëvendësministrja, e cila është diskutuar gjatë për postin e ambasadores në Shtetet e Bashkuara të Amerikës, kishte kërkuar që të mos ju jepej juve titulli “Honoris Causa”, të cilin ju e mbani tashmë në zyrën tuaj, por ai t’i jepej vetëm Kryeministrit Berisha. Cili është versioni juaj?

Presidenti Topi: Absolutisht jo, janë trillime që vijnë për fat të keq, nga një pjesë e medias dhe në një çast shumë të rëndësishëm kur e gjithë media duhet të jetë shumë e kujdesshme, pikërisht në klimën që kërkohet në prag të pavarësisë së Kosovës. Aq më shumë këto dalin në çastin kur Presidenti ishte në Kosovë. Unë mund ta deklaroj këtu që zëvendësministrja e Punëve të Jashtme, zonja Harxhi, ka qenë pjesë mjaft aktive e mbështetjes së kësaj vizite dhe dëgjojeni këtë drejtpërdrejt, pikërisht, nga goja ime.

Kur them se media duhet të jetë shumë e kujdesshme, kam parasysh edhe ndonjë fakt mjaft tronditës, dhe ky nuk është faji im, sepse ju e dini fare mirë që unë jam munduar gjithmonë që të jem në mbrojtje të së drejtës të gjithsecilit edhe për sa u përket interceptimeve apo përgjimeve telefonike. Në rrjetën e interceptimeve që u bëhet agjenturave serbe në Shqipëri, ditët e fundit, është peshkuar edhe një eksponent i medias, i cili në kulmin e vizitës së Presidentit në Kosovës, i jepte garanci agjentit serb: “Shikoni se ç’do t’i bëj Presidentit në gazetë, sepse Presidenti kishte akuzuar politikën serbe dhe ruse që po minon procesin e paqes dhe marrjes së pavarësisë së Kosovës”.

E përdora këtë si argument për të thënë se në situata kaq delikate, kur të gjithë janë shumë të kujdesshëm, që të krijojnë një terren sa më të favorshëm, media duhet të sinkronizohet dhe të mos merret me elementë që nuk ekzistojnë. Absolutisht, nuk ka pasur asnjë lloj situate të tillë për të penguar vizitën e Presidentit, përkundrazi, znj. Harxhi ka qenë pjesë shumë aktive, së bashku me të tjerët; kabineti i punës i Ministrisë së Jashtme dhe kabineti i Institucionit të Presidentit, të cilët kanë bërë të mundur që, në bashkëpunim me institucionet e Kosovës, të realizojnë një vizitë triumfale. E kam thënë edhe herë tjetër, nuk është pritur nominalisht Bamir Topi atje, por është pritur Presidenti i Republikës së Shqipërisë. Çdo president që do të shkonte në Kosovë në këtë situatë, do të pritej me bujarinë e vëllezërve kosovarë; nuk është se u prita vetëm unë, u prit i gjithë delegacioni, i cili përbëhej nga deputetë, ministra, biznesmenë, njerëz të artit, kulturës, njerëz që janë bërë shumë familjarë për familjet kosovare. Ne duhet që patjetër t’u largohemi këtyre etiketimeve që nuk i shërbejnë punës dhe në një moment shumë të rëndësishëm, kur vëmendja duhet të jetë e përqendruar pikërisht te çasti final, që është Shpallja e Pavarësisë së Kosovës. Administrimi i ditëve të mëpasme do të shkojë në qetësi kur Kosova do të jetë shteti i ri që çdo ditë do të fitojë sigurinë e vet. Gazetarët merren me çështje të tilla, të cilat për fat të keq, në çaste të caktuara janë shumë të dënueshme.

Gazetari: Duhet ta dimë emrin e këtij gazetari?

Presidenti Topi : Absolutisht jo! Unë e përdora në kontekstin e shpjegimit të nevojës që të gjithë duhet të kontribuojmë, të gjithë: institucionet e shtetit, politika, media dhe të gjithë të jemi shumë të kujdesshëm për t’i kontribuar këtij çasti. Ju e dini se çka ndodhur atje. Ju e dini se ç’ ka bërë populli i Shqipërisë gjatë kohës së eksodit biblik; janë përpjekur e martirizuar shumë njerëz. Pikërisht në këto çaste që konsiderohen shumë delikate dhe kur gjithçka duhet të trajtohet në mënyrë shumë fine, ekzistojnë edhe situata të tilla, ekzistojnë edhe elementë të tillë, të cilët kërkojnë të intoksikojnë një situatë që vetëm ata e dinë pse e bëjnë.

Gazetari: Do ta marrë Shqipëria ftesën për në NATO?

Presidenti Topi: Unë jam mjaft optimist nga të gjitha takimet që kemi zhvilluar dhe, nga të gjitha informacionet e fundit Shqipëria, së bashku me Maqedoninë e Kroacinë, së bashku në bllok, do të marrin ftesën për t’u anëtarësuar në NATO. Po bëhen të gjitha përgatitjet ceremoniale për takimin në Bukuresht. Kam një optimizëm real se Shqipëria do ta marrë këtë ftesë dhe kjo do të jetë një ngjarje e jashtëzakonshme për Shqipërinë.

Gazetari: Është e freskët tashmë për të gjithë ne historia e vizave, që u quajt “kriza e vizave” me Maqedoninë. Mendoni se ka një lloj diferencimi të palëve politike shqiptare nga ana e qeverisë në Maqedoni?

Presidenti Topi: Unë kam realizuar një takim, ku për hir të së vërtetës, qoftë Kryeministri dhe qoftë ministri i Jashtëm, kanë qenë me angazhime shumë të rëndësishme në Bruksel dhe në Shtetet e Bashkuara të Amerikës; çka do të thotë, jo se ka munguar interesi për të shmangur pikërisht këtë lloj marrëdhënieje që është krijuar midis dy qeverive të Shqipërisë dhe të Maqedonisë. Unë mund t’ju them se takimet me partitë politike të shqiptarëve në Maqedoni i kam të herëpashershme, nëpërmjet një komunikimi të domosdoshëm, sepse stabiliteti i rajonit është shumë i rëndësishëm qoftë në funksion të pavarësisë së Kosovës, qoftë edhe për ato sfida të përbashkëta që kemi në rrugën e anëtarësimit në Bashkimin Evropian dhe në NATO. Faktori shqiptar në Maqedoni është shumë i rëndësishëm për të përcaktuar edhe vendime që konsiderohen mjaft delikate. Unë nuk kam dashur ta ekspozoj këtë çast, sepse në pjesë të komunikimit të përditshëm jo gjithçka është e nevojshme që të dalë në publik, por duhet thënë se takimet kanë qenë efikase dhe, në përfundim të asaj dite, gjithçka është stabilizuar. Kjo, jo sepse çelësi magjik erdhi nga pikërisht nga ai takim, por ekzistonte një lloj prirjeje që gjërat të normalizoheshin, sepse normalizimi i gjërave nuk mund të vijë brenda orës ose ditës, por ekziston një frymë prirjeje e përbashkët, e cila po konkretizohet dhe po shkohet me terma që sot janë më të favorshme se ç’ kanë qenë përpara.

Intervista e plote e presidentit Bamir Topi

Intervista e plote e presidentit Bamir Topi

Intervista e plote e presidentit Bamir Topi :: Komentet