Urdhri për protestën, 48 orë në shesh dhe incidente



Fundi i protestave dy mujore të socialistëve duket se do të “kulmojë” në Tiranë. Ku socialistët pritet të bëjnë një “protestë të madhe” për ti treguar qeverisë e faktorit ndërkombëtar se ata kanë të drejtë në kauzën e tyre, nuk janë të vetëm por kanë nga pas qindra votues. E parë në këtë këndvështrim gjërat duken mirë, pro kryetari Rama nisur nga mitingjet e bëra deri më tani na çdo qytet të vendit ka vendosur të mos “turpërohet” më. Ai ka urdhëruar të gjithë

kryetarët e bashkive dhe komunave të cilat drejtohen nga zyrtarë të PS-së, që të sjellin në shesh të paktën çdo qark nga 1200 vetë dhe kjo do të bëhet me urdhër duke marrë shënim emrat e të gjithë punonjësve të pushtetit lokal, të cilët do të jenë të pranishëm në protestën e opozitës me 20 nëntor. Por urdhri i kryetarit Rama nuk është vetëm kaq. Gati 400-500 persona kryesish banorë të kryeqytetit mësohet se janë paguar, që të rrinë në shesh gjatë gjithë kohës derisa kryetari të japë urdhrin për shpërndarjen e mitingut. Gjithashtu këta persona bashke me militantët më të devotshëm të partisë janë informuar se kur kryetari Rama i shoqëruar nga Ngjela, Gjinushi e drejtues të tjerë të japin urdhrin për të tensionuar situatën, ata të jenë gati për të kaluar nga protestë paqësorë në protestë të dhunshme. Skenari pothuajse është i qartë të sulmohen institucionet dhe kryesisht KQZ-ja ku mendohet se janë kutitë e votimit të zgjedhjeve të 28 qershorit.

Paralajmërimi
Kryetari i PS-së Edi Rama sëbashku me kryetarin e PLD Spartak Ngjela në të gjitha mitingjet që kanë qenë muajin e fundit, kanë theksuar dhe ritheksuar se protesta e 20 nëntorit do të jetë e dhunshme dhe kutitë nëse maxhoranca dhe kryeministri Berisha nuk vendosin ti hapin me të mirë, do ti hapin militantët e PS-së me dhunë. Sipas tyre vetëm kështu vihet në vend “drejtësia”, ndaj opozita ka vendosur të mos tolerojë më, por të kalojë në masa ekstremë pasi deri më tani kërkesa e tyre ka rënë në vesh të shurdhër. Drejtuesit socialiste pretendojnë se zgjedhjet e 28 qershorit janë manipuluar nga maxhoranca gjatë procesit të numërimit dhe për të demaskuar këtë manipulim duhet të hapen kutitë e votimit. Konkretisht ata pretendojnë se manipulimi më i madh është bërë në qarkun e Shkodrës, Beratit dhe të Tiranës ndaj kërkojnë hapjen e kutive të votimit për këto zona. Por pretendimi i tyre deri më tani ka rënë në vesh të shurdhër, pasi kryeministri Berisha në emër të maxhorancës ju ka bërë të qartë disa herë se zgjedhjet e 28 qershorit janë certifikuar si rrallë ndonjehëre me 7 vota pro nga KQZ-ja dhe është miratuar vendimi pa asnjë kundërshtim nga Kolegji Zgjedhor, ndaj qëndrimet dhe komentet e tjera janë të kota. Berisha ka theksuar se kutitë nuk mund të hapet pasi Kushtetuta dhe Kodi Zgjedhor nuk e lejon të kundërshtojë vendimin e gjykatës.

Dështimi i protestave
Populli thotë se “dielli duket që në mëngjes”, shprehje që besoj i shkon për shtat protestave të opozitës. Partia Socialiste që ditën e parë kur nisi protesta nuk arriti të mblidhe në sheshet e qyteteve kryesore, një pjesë e të cilave pushteti lokal drejtohet prej njerëzve të saj më shumë se 1000 vetë. Numër ky që vinte duke rënë nga mitingu në miting. Mungesa e përkrahjes duket se e ka shqetësuar shumë kryetarin Rama, i cili ka urdhëruar që administrata e pushtetit vendor të dilte në protestë për të mbështetur drejtuesit e partisë në kërkesën e tyre për hapjen e kutive të votimit. Urdhrat e Ramës nuk kanë vlejtur shumë, pasi një pjesë e mirë e bazës është kundër këtyre protestave. Sipas tyre Rama dhe disa zyrtarët të tjerë të partisë kanë nisur protestat, të bindur se nuk kanë për tu hapur ndonjëherë kutitë e votimit, pro e kanë bërë gjithë këtë për të hequr vëmendjen e bazës nga shkaktari i humbjes së zgjedhjeve që është vetë kryetari i partisë Rama. Kundër protestave në rrugë janë shprehur dhe një pjesë e deputeteve të PS-së, të cilët kanë theksuar se këto protesta nuk duhet të mbeten vetëm në sheshe, por të shoqërohen me debatet politike në sallën e Kuvendit. Protestës së PS-së të iniciuar nga kryetari Rama i janë bashkangjitur kryetarët e partive të vogla të majta dhe të djathta, të cilat nuk arritën të merrnin asnjë deputet në zgjedhjet e 28 qershorit. Një pjesë e të cilëve janë drejtuar edhe në prokurori ku kanë bërë padi për hetimin e zgjedhjeve, duke kërkuar që të vihen para përgjegjësisë shkaktarët e manipulimit të tyre.



sot