Agim Neza

Deklarata e djeshme e Presidentit Topi se: “..Unë atë gatishmëri që kam pasur gjithmonë vazhdoj ta kem, por çështja qëndron tek vullneti politik i partive”, tregon se Presidenti Topi nuk e shikon veten si burrë shteti, por thjesht duket si “një Zëdhënës fillestar” që bën “show mediatik” dhe nuk tregon se sa i angazhuar është të punojë seriozisht për qytetarin shqiptar, për vendin, për drejtësinë në Shqipëri, aq më tepër të zgjidhë konflikte të politikës shqiptare. Me keqardhje i quaj veprimet e Presidentit të vendit tim si “donkishoteske”, por ky është realiteti për momentin. Opinioni publik nuk arrin të konceptojë Presidentin e vendit të lëshojë mesazhe të tilla qesharake, që të ngjasojnë më një arbitër futbolli, që është caktuar të gjykojë ndeshjen, i cili thotë: “Unë jam në tribunë, por ju vazhdoni “lojën” edhe nëse do të filloni “të ziheni me grushte”, kur të mendoni se unë jam i domosdoshëm atëherë vij dhe arbitroj lojën”. E solla këtë krahasim se e di se Presidenti Topi e pëlqen futbollin dhe për fat të keq prania e tij në stadium gjatë ndeshjeve tona të kombëtares me të huajt ka sjellë vetëm humbje.
Presidenti Topi duhet të kuptojë se nuk është Veterineri i nderuar dhe profesionist, por është Nr.1 i vendit, është Kreu i Shtetit, është Kryetari i Këshillit të Lartë të Drejtësisë, është Komandanti i Forcave të Armatosura! Pra, Presidenti është mbi palët, pikërisht për këtë Ai nuk duhet të bëhet palë. Presidenti nuk duhet të krijojë përshtypjen se me heshtjen e tij, të tjerët të mendojnë se Presidenti Topi po mbështet të majtën apo se rrëzimi i Berishës i krijon mundësinë për një mandat të dytë si President.
Për të qenë më i drejtpërdrejtë me opinionin publik, sipas mendimit tim nëse Presidenti Topi do të ishte një burrë shteti dhe mbi palët, Ai duhej të thoshte: “Kryeministri Berisha nuk mund të hapë kutitë e votimit, ashtu siç nuk mund t’i asgjësojë këto kuti”. Natyrisht këtu unë kam rezervat e mia edhe për Kryeministrin Berisha, i cili thotë se: “Nuk i hap kutitë e votimit”. Në fakt, ligjërisht Kryetari i PD-së dhe Kryeministri i vendit Berisha as nuk mund të hapë dhe as nuk mund të asgjësojë kutitë e votimit.
Pra, Presidenti Topi, i cili në një intervistë televizive për “Ora News” i përmendi pothuajse 70 herë fjalët “dialog” dhe “kushtetutë” duhet t’i bëjë të qartë opinionit publik dhe partive politike se kutitë e votimit nuk janë më pronë as e Sali Berishës as e PD-së, as e Edi Ramës, as e PS-së dhe as e Kryetares së Parlamentit Jozefina Topalli.
Zgjedhjet tashmë janë të certifikuara edhe nga ndërkombëtarët. Kjo ndoshta edhe për faktin se edhe me “lejen” e Presidentit Topi, Ambasadorët më të rëndësishëm të akredituar në Shqipëri patën vërshuar në Gjykatën e Apelit atje ku ndodhej Kolegji Zgjedhor, madje për këtë ishte lajmëruar e gjithë media. Pas vendimit të Kolegjit Zgjedhor nuk kemi dëgjuar ndonjë Ambasador të lançojë qoftë edhe një fjalë për këtë organ të pavarur.
Pse hesht Presidenti Topi për këtë vendim të Kolegjit Zgjedhor?
Nëse dikush duhet të flasë pozitivisht ose negativisht për vendimin e Kolegjit Zgjedhor, i takon Presidentit të Republikës të prononcohet, duke qenë se është edhe Kryetar i KLD-së. Pas kësaj deklarate që mund të bënte Presidenti Topi, atëherë mund të flitej për takim me dy krerët e Partive më të mëdha. Përmend vetëm PS dhe PD për faktin se me ligjin elektoral Berisha dhe Rama janë “peshkaqenët” e politikës, krerët e Partive të tjera janë “cironka” që lëvizin sa majtas dhe djathtas.
Presidenti i Republikës është për zgjidhje të problemeve, jo për të krijuar ngërçe apo për të teorizuar me “ngrica e ngrohje” të politikanëve!
Presidenti duhet të gjejë apo të paktën të sugjerojë konkretisht mënyrën se si opozita mund të jetë e pranishme në Parlament.
Presidenti më mirë se çdonjëri tjetër e ka të qartë se situata politike e krijuar ndikon negativisht në shumë drejtime dhe mbi të gjitha ndikon në sistemin e drejtësisë, që është në gjendje të mjerueshme, në veçanti në lidhje me korrupsionin e evidentuar nga organizmat ndërkombëtare dhe qytetarët shqiptarë.
Në lidhje me sistemin e drejtësisë, Presidenti Topi besoj se e ka dëgjuar zërin e deputetit Socialist z. Fatmir Xhafa (transmetuar nga TVSH) në një konferencë ndërkombëtare për shqetësimet në sistemin e drejtësisë dhe përgjegjësitë që zoti Topi ka si President i Republikës dhe kryetar e KLD-së (Këshilli i Lartë i Drejtësisë).
Presidenti i Republikës dhe Kryetari i KLD-së duhet të japë zgjidhjet dhe të marrë masa konkrete, që drejtësia shqiptare që për fat të keq është në ditët më të zymta të dalë nga kjo situatë dhe të mos flasë “për sekserë gjyqtarësh” apo “gjyqtarë sekserë”, por të thotë emra konkretë dhe të ndëshkojë ligjërisht ata gjyqtarë që Presidenti ynë i nderuar i konsideron “sekserë”. Nga ana tjetër kjo do të ndihmonte për të ruajtur të pastër figurën e qindra gjyqtarëve dhe prokurorëve që punojnë më përkushtim dhe ndershmëri për drejtësinë shqiptare.
Është disi e kuptueshme të kemi një Kryetar të Këshillit të Lartë të Drejtësisë “të dobët”, por është e pafalshme të kemi një President “hije” apo një President “honorifik”! Në veprimtarinë e një Presidenti nuk mund të ketë hatërmbetje, nuk duhet të ketë mllefe. Zoti Topi nuk duhet të quajë veten “të ekzekutuar politikisht” siç i pat etiketuar votat e maxhorancës, thjesht për faktin se deputetet votuan kundër propozimeve të tij për kandidaturat për gjyqtarë të Gjykatës së Lartë. Një President mund të mbajë inat personal, qoftë edhe për ndonjë shkrim si këto të miat ndaj jush si President, por jo të mbash inat politik që kanë të bëjnë me interesat e vendit dhe konsolidimin e shtetit. Aktualisht, ju duhet të jeni mbi politikën dhe jo të “fshihi” nën hijen e politikes.
Personalisht nuk kam asgjë me Presidentin Topi, por dëshiroj që Presidenti i vendit tim me veprimet dhe vendimet e tij politike të kontribuojë që shqiptarët të lëvizin pa viza, të mos jenë më të përçmuar se sa serbët dhe maqedonasit, të jemi anëtarë të BE-së.
Janë të shumtë ata që janë kënaqur që një organizëm prestigjioz e ka shpallur Presidentin Topi si një ndër “10 Presidentët më të bukur” e reklamuar nga Zyra e tij e Shtypit, por unë do të dëshiroja të dëgjoja një diplomat të huaj, një homolog të tij të thotë: “Presidenti i Juaj është një burrë shteti!”
Përsëri ka kohë gjatë mandatit në vijim që Presidenti Topi të tregojë se ka aftësi për t’u bërë një burrë shteti! Po presim...!
panorama