Rama miratoi lejen e ndërtimit mbi rrugën duke e cilësuar pronë private

Skandali i zaptimit dhe përvetësimit të pronave dhe rrugëve në Tiranë nga Edi Rama nxjerr çdo ditë fakte të reja. Gazeta ka arritur të siguroi Hartën Treguese të Regjistrimit, e tërhequr pranë Zyrës së Regjistrimit të asurive të Paluajtshme për rrugën “Urani Pano” dhe pronën e qytetarit Ilir Mata, mbi të cilën Dash Peza ka ngritur pallatin e tij 12 katësh. Gjithashtu për të bërë krahasimin me situatën aktuale në terren, kemi nxjerrë edhe hartën mbi të cilën Edi Rama

ka miratuar lejen e ndërtimit, duke e përfshirë me vetëdije të plotë edhe rrugën “Urani Pano” në zonë ndërtimi të mikut të tij të ngushtë Peza. Falsifikimi duket qartë në lejen e ndërtimit të lëshuar nga Edi Rama, i cili ka futur në sipërfaqen e sheshit të ndërtimit edhe rrugën. Nga ballafaqimi i dokumenteve rezulton se sheshi i ndërtimit të miratuar nga Edi Rama është 191. 5 m2 me një sipërfaqe ndërtimi prej 148.4 m2. Ndërkaq nga dokumentet e lëshuara nga Zyra e Regjistrimit të Pasurive të Paluajtshme, rezulton se prona e Ilir Matës që është shfrytëzuar nga Dashi për ndërtim është 140.5 m2, afro 8 metër katrorë nga sipërfaqa e ndërtimit. Kujtojmë se jo e gjithë sipërfaqja e pronësi të Ilir Matës është shfrytëzuar pasi për shkak të thyerjes së sipërfaqes së pronës afro 30% e saj është e pa shfrytëzueshme për ndërtimin e pallatit 12 katësh. Nga ballafaqimi i këtyre dokumenteve duket qartë se Edi Rama i ka falur rrugën mikut të tij të ngushtë Dashamir Pezës, si dhe i ka miratuar një leje ndërtimi që nuk përmbush asnjë prej kushteve të urbanistikës.

Abuzimi
Abuzimi i kreut të bashkisë me rrugën “Urani Pano” duket qartazi në të gjitha dokumentet e që ekzistojnë si për vendndodhjen e pronës ashtu edhe për lejen e ndërtimit. Në të gjitha dokumentet vihet re se në lejen e ndërtimit është përfshirë edhe rruga, duke bllokuar kalimin e dhjetëra e qindra familjeve që kalojnë aty. Në lejen e ndërtimit përpiluar nga KRRT-ja e Ramës dhe e firmosur prej tij, cilësohet se pallati do të ndërtohet mbi pronën e Ilir Matës, por mesa duket kreu ynë i bashkisë nuk ka llogaritur se sipërfaqja e sheshit të ndërtimit është edhe dy herë më e madhe se prona e vënë në dispozicion për ndërtim, ose mund ta ketë vënë re dhe për këtë arsye i ka vënë në dispozicion mikut të tij edhe rrugën, e cila konsiderohet si vijë kufitare në lejen e ndërtimit. Çdo ditë botohen fakte që tregojnë veprimet korruptive të kryetarit të Bashkisë së Tiranës dhe prokuroria nuk ka regjistruar asnjëherë ndonjë procedim penal për rastin konkret apo edhe për raste të tjera ku ndërtuesit e Ramës kanë zaptuar pronat publike janë me dhjetëra kryetarë bashkish e komunash që janë dënuar me burg kur kanë dhënë leje ndërtimi mbi një pronë shtetërore, apo nuk kanë kontrolluar siç duhet aktin e pronësisë. Atyre tashmë u lind e drejta që të kërkojnë dëmshpërblim për dënimin e marrë duke nxjerr si precedent rastin e Edi Ramës, i cili shet dhe jep leje ndërtimi mbi pronat shtetërore sipas qejfit të tij.

Leja e ndërtim
Në vendimin e 22 shtatorit 2001, KRRT-ja e Bashkisë së Tiranës vendosi “në parim” për sheshin e ndërtimit, me kushtin që ajo ti shiste rrugën Dash Pezës, sërish edhe ky vendim nuk u respektua. Jo vetëm kaq, por, pas pak më shumë se një muaji më pas, KRRT-ja e Bashkisë së Tiranës, i jep lejen e ndërtimit Dash Pezës, end epa u zbardhur leja për shesh ndërtimi. Me pak fjalë, në datën 27 tetor 2001, KRRT e Bashkisë së Tiranës me vendimin e saj Nr. 28, miratoi lejen e ndërtimit, për kompaninë e Dash Pezës, “T. T. T. ALBA – L.A.M.” sh.p.k ende pa u përcaktuar sheshi i ndërtimit, madje ende pa u zbardhur leja për shesh ndërtimi që Edi Rama kishte firmosur vetëm pak më shumë se një muaj më parë. Leja për sheshin e ndërtimit, për të cilin Edi Rama firmosi edhe lejen e ndërtimit, u zbardh vetëm një vit më pas. Pikërisht, në datën 4 shtator 2002, zbardhet leja e sheshit të ndërtimit (sipas formularit Nr. 2), Në bazë të zbardhjes së kësaj leje për shesh ndërtimi, mësohet se sipërfaqja e sheshit ishte 191.5 m2, ndërsa sipërfaqja e ndërtimit 148.4 m2. Koeficienti i shfrytëzimit 0.77. Afati i kësaj leje ishte deri në datën 22. 03. 2002. Më pak se 10 ditë pas zbardhjes së lejes së sheshit të ndërtimit, por edhe një vit pas marrjes së lejes së ndërtimit, saktësisht në 13 shtator 2001 (sipas formularit Nr. 4), u zbardh edhe afati i lejes së ndërtimit të dhënë në 27 tetor 2001 nga KRRT-ja e Bashkisë së Tiranës, për Dash Pezën. Afati i kësaj leje është deri në 27. 10. 2004.

Pezullimi dhe rifillimi i punimeve
Për shkak të abuzivizmit flagrant në këtë ndërtim, ish-qeverisja socialiste vendosi të pezulloi punimet, por pezullimi zgjati vetëm një vit dhe sërish iu hap rruga Dash Pezës që të rifilloi grabitjen e rrugës “Urani Pano” nga një vendim i KRRTRSH Nr. 10 datë 15. 03. 2005, ku thuhej se është kryer një inspektim, është konstatuar se nga ana e ndërtuesve janë respektuar kondicionet por duke përfshirë edhe rrugën. Në vendim thuhet se është revokuar vendimi i KRRTRSH Nr. 12 datë 23. 06. 2004 “Për rishikimin e vendimit të KRRT të Bashkisë së Tiranës Nr. 28 datë 27. 10. 2001 për leje ndërtimi për objektin 11 dhe 12 kate në Rrugën “Urani Pano”, për subjektin ndërtues “T. T. ALBA- L.A.M”. gjithashtu në këtë vendim thuhet se Bashkia e Tiranës duhet të parashikojë lënien e kalimit këmbësor publik Veri-Jug. Për zbatimin e këtij vendim,i ngarkohet Ministria e Rregullimit të Territorit dhe Turizmit dhe Bashkia Tiranë. Që prej këtij vendimi, Dash Pezës iu hap rruga që të përvetësonte rrugën, për të cilën do të vazhdojë të paguajë një qira qesharake dhe duke i hequr njëherë e përgjithmonë qytetarëve rrugë hyrëse për në banesën e tyre. Banorët e zonës i luten zotit që mos të bjerë ndonjë zjarr apo të kenë ndonjëherë nevojën e ambulancës, pasi Dash Peza ua hoqi të drejtën e ndihmës.

Romir Saraçi



sot