Ekipi ynë kombëtar e kaloi me sukses testin miqësor me Irlandën e Veriut. Kjo ishte sfida e parë e vitit 2010 për kuqezinjtë e trajnerit Josip Kuzhe. Për këtë ndeshje u përdor eksperienca e krijuar nga grupi në ndeshjet e shkuara, ku duhet të ishin të kujdesshëm në fazën mbrojtëse dhe kërkues në realizimin e fitores. Trajneri Kuzhe ka mbetur i kënaqur nga testi i djeshëm, megjithëse terreni i stadiumit “Qemal Stafa” ishte pengesa kryesore për futbollistët e të dy ekipeve. “Pas eksperiencave të fundit ne e kishim të qartë se si duhej vepruar ndaj skuadrës së Irlandës së Veriut. Detyra kryesore ishte që si fillim të ishim të kujdesshëm në fazën mbrojtëse dhe më pas të nisnim sulmin e kundërshtarit, ku pa dyshim duhej të merrnim rezultat pozitiv. Pas 15 minutave të para ekipi fitoi besim në vetvete dhe më pas nisëm të luajmë shumë mirë dhe me kombinime, duke qenë mirë edhe në aspektin fizik. Rënia në pjesën e dytë ka lidhje edhe me kushtet e terrenit, gjithsesi e mbajtëm drejtimin e ekipit dhe gjatë gjithë kohës ishim të organizuar. Them se në mbrojtje ishim mirë dhe në fund e merituam fitoren. Skuadra luajti me kombinime të shumta ndaj Irlandës së Veriut, pasi kjo gjë ishte e kushtëzuar nga gjendja e terrenit, e cila nuk të lë të luash lirshëm. Gjithsesi, loja me shumë stacione që bëmë ishte rezultative. Dallku luajti në qendër të mbrojtjes, por dua të them se me rikthimin e Canës ky pozicion do të jetë i tij. Jam i kënaqur me Lilën, si dhe me atë që dhanë mbrojtësit, pasi këto janë mundësi ekstra që na jepen për t’i shfrytëzuar në të ardhmen. Altin Lala është një figurë e fortë në ekip, si lojtar është i shkëlqyeshëm dhe mban kontrollin e lojës. Lala është shumë i rëndësishëm për ekipin, pasi ai është një lider i vërtetë, të cilën e tregoi edhe ndaj Irlandës,”- u shpreh trajneri Josip Kuzhe. Trajneri Josip Kuzhe erdhi në krye të bankinës të kombëtares sonë në majin e vitit të kaluar dhe iu desh të përfundonte rrugën e nisur nga holandezi Ari Han. Por kroati e pranon, se duke filluar nga ndeshja me Irlandën e Veriut, gjërat janë më serioze për atë, kështu që tani ka ardhur koha të thuhet se kjo është Shqipëria e Josip Kuzhes. “Kur mora drejtimin e Shqipërisë kisha të bëja me ndeshje zyrtare, që ishin të vlefshme për eliminatoret e Kupës së Botës, prandaj duke filluar nga ky takim me Irlandën e Veriut fillon Shqipëria e vërtetë e Josip Kuzhes. Sigurisht, tani është serioze, madje mund të them shumë serioze. Kjo është ndeshja e parë dhe ne duhet të vazhdojmë të luajmë lojën tonë dhe të mbajmë atmosferën festive,”-përfundon rrëfimi i trajnerit Josip Kuzhe në konferencën për shtyp.(Sporti Shqiptar)