Nga Besi BEKTESHI


Nuk ka pasur shprehje "më të madhe" se sa të një burri nga Tropoja i cili e quajti Edi Ramën... komandant!! Në fakt shprehja e burrit hallexhi i cili ju ankua Ramës ishte:

Me buqeta me lule nuk ikën Saliu... o komandant!! Nejse, zoti Rama mbajti një qëndrim jo shumë sqarues dhe inkurajues për burrin që ai vetë e pyeti nga ishte, sepse në fakt dialekti po kuptohej. Ky është edhe momenti për të reflektuar qartë, edhe pse nuk ka asgjë për të reflektuar në të vërtetë. E gjithë strategjia e deri tanishme e PS-së dhe sidomos e Ramës, ka qënë që në fund të fundit njerëzit ta thërrasin "Komandant" kreun e Partisë Socialiste Shqiptare. Në një formë të përsëritur si Rama dhe Hoxha ishin më të gjatë se populli, e shikonin atë nga lart poshtë, ishin me të vërtetë një kokë më lart se sa njerëzit që ishin anash, dhe nuk do shumë mënd se lartësia e tyre ishte një aksesor i mirë, për ti vendosur edhe realisht mbi popullin.
Pastaj fjalitë në emër të tij, angazhimet në emër të popullit, lufta politike që proklamohet në emër të popullit, betejat e reja në të ardhmen për të drejtat e popullit, lufta deri në fund për hapjen e kutive po në emër të popullit, dhe lufta deri në fund që është rrëzimi i qeverisë Berisha (nëqoftëse nuk hap kutitë) po në emër të njerëzve dhe popullit. Të gjithë termat, si luftë, beteja, përballje, rezistencë... janë terma që i shkojnë një "Komandanti", një luftëtari të madh që lidhjen e vetme e saktë është me "luftën" dhe patjetër që lufta ka një komandant. Por edhe Enverin, kështu e thërrisnin "vegjëlia"... komandant e thërrisnin, kur ai futej midis popullit dhe i pyeste si jetonin!! E populli i përgjigjej... jemi mirë, kemi për të ngrënë, kemi të gjithë të mirat, nuk na mungon asgjë, të plasi nga inati kapitalizmi amerikan dhe social imperializmi sovjetik, ty të kemi sa malet o komandant...etj., etj. Pastaj komandanti i gjatë, ju fërkonte kokën njerëzve dhe popullit lavdërues, plakave dhe pleqve, por edhe vogëlushëve me shallin e pionierit në qafë edhe kur ishte mbasdite vonë.
Kurse komandanti i ri Rama (së paku kështu i thanë gjatë vizitës si tij në popull) kur e pyet popullin i thonë: Jemi keq, nuk kemi se ç'të hamë, kemi pension të vogël, energjia është shtrenjtë, uji po ashtu, ilaçet dhe veshmbathja, si t’ia bëjmë o komandant si t’ia bëjmë... Saliu na varfëroi... ai na mori shpirtin, por na rruaç ti... të marrtë nëna të keqen oooo komandant!!
E Rama ju thotë të gjithëve: Te sheshi, të gjithë te sheshi, me rob shpie të gjithë, me motra dhe nëna, baballarë dhe vëllezër me djem dhe vajza, ku ti keni, të vini të sheshi që të bëjmë rezistencë dhe të largojmë këtë qeveri, që nuk hap kuti. Ai shpesh herë ja fërkon kokën popullit ankues, dhe atij sigurisht i bëhet qejfi dhe i çohet në maksimum entuziazmi. Komandanti i ri i shqiptarëve tanimë, është në drejtim të punëve të pikërisht komandaturës që është PS-ja, por që populli që dikur i gëzohej Enverit komandant, sot i gëzohet Edit po komandant.
Kur Berisha takohej me Rasmunssen ose "Sekretarin e NATO-s" komandanti i madh i popullit të majtë shqiptar takohej për problemin e protestës me Erion Veliajn dhe Spartak Ngjelën. Po, dy nga komandantët më të vegjël, por që kanë ushtri të mëdha pas tyre. Komandantët Veliaj dhe Ngjela janë normalisht edhe njerëzit që frymëzojnë turmat, i udhëheqin ato në beteja të mëdha, që ideohen nga Kryekomandanti Rama. Këto dy komandantë janë akoma më të saktë në batutat e tyre të frymëzimit të turmave dhe batutave të forta që kanë të bëjnë me beteja historike të mëdha... më të mëdhatë të para ndonjëherë në historinë e Shqipërisë.
Komandantët më të vegjël se Rama, Veliaj dhe Ngjela, janë sot "shtyllat vertebrale" të PS-së liberale, që po ndërton Kryekomandati Rama. Të egërsuar nga "padrejtësitë", komandantët Veliaj dhe Ngjela, të mbetur pa bukë, pa fonde dhe pa të drejta dhe liri, po përpiqen të mbajnë "frontin" revolucionar kundër Berishës. Strategjitë e tyre janë të mëdha. Bie fjala Veliaj shpallte edhe mbështetjet e mëdha nga Kongresi Amerikan dhe bota dhe me sa duket e kishte fjalën për "Chavistin" Bill Delahunt, që në shtator del në pension. Veliaj ka denoncuar edhe shtypin, sepse e ka akuzuar se fut duart në para që nuk janë të tijat.
Ndërsa komandant Ngjela, me siguri që ka botën anglosaksone pas, dhe nuk ka dyshim, që aty ai është një person mjaft i njohur në drejtim të aseteve të mëdha elektorale që ka...!! Është edhe komandante zonja Leskaj që ka porositur perëndimin të ketë kujdes me shqiptarët se do ta mbysin Europën po të largojë vizat, kjo e fundit. Se mos vetëm komandante Leskaj... edhe komandante Dade po ashtu si Veliaj është e sigurtë se bota është më PS-në dhe komandantët e saj.
Të tillë komandantë nuk kanë lënë pa bërë asgjë, për të vonuar integrimin pse për faj të tyre nuk kanë fituar zgjedhjet. Nuk kanë lënë asnjë lloj sulmi pa përdorur për rrugën e Kosovës, duke ditur se është një mrekulli ekonomike dhe strategjike. Fjalët më të këqija për Bechtel-Enka kanë thënë këto komandantë edhe pse dihet qartë se ku ka punuar kjo kompani, ka edhe cilësi më të lartë, biles shumë më të lartë se sa aty ku kanë punuar kompani shqiptare!! Ku të ketë suksese... nga komandantët do të ketë luftë dhe beteja...!
Sepse kështu është mentaliteti i Komandantit të Madh dhe legjendar. Në qoftëse dje "Komandanti" donte të dëgjonte çdo gjë mirë, sot ai do të dëgjojë se çdo gjë është keq. Sepse nuk është sistemi i tij politik. Por ama, në një pikë "komandanti" është si dje dhe sot. Ai sillet si një "komandant" në takim me popullin, sepse asnjëherë nuk është një komandant në luftë të vërtetë. Asnjëherë komandantët e tillë, nuk janë për luftëra të vështira, ku progresi është diçka e domosdoshme. Izolimi dhe frika si tabu, ndaj ndarjes së popullit këtu me njerëzit në botë, është një dëshirë e komandantëve të tillë. Joshja e njerëzve dhe mbushja e mendjeve me sabotimin e plotë të dëshirave për integrimin, është një nga momentet më të dobëta të historisë politike pluraliste të Shqipërisë.
Kur njerëzit e thërrasin "komandant" Ramën, në fakt (ai mbase nuk shqetësohet) është për tu shqetësuar. Shumë, dhe sidomos për vetë Ramën. Sepse njerëzit te ne, turmat dhe populli, si një diçka e mesme si koncept midis të dyjave kur afeksionohet shumë, kur arrin të pasionohet dhe të besojë kaq shumë gati verbërisht... ndodh diçka. Diçka jo e mirë, për "Komandantin", dhe për historinë e tij në dekada dhe ndoshta shekuj.
Gjithsesi sot, komandantët e popullit, do ta marrin edhe njëherë atë për dore, apo për koke, për të bërë protestën e re dhe betejën e re. Komandantët dhe Komandanti, po e thërrasin edhe njëherë popullin që të protestojë për komandantët duke e siguruar se pastaj do të hajë më mirë, do të ketë pension më të mirë, do të ketë portofol më të madh dhe të fryrë, dhe nuk do të paguajë drita dhe ujë.
Komandanti dhe komandantët e vegjël, po përgatiten edhe njëherë të luftojnë dhe këtë e bëjnë edhe në emër të popullit dhe në emër të "Don Kishotit" që në fakt ishte vërtetë i varfër, kur komandantët e sotëm të PS-së, janë më të pasurit në Shqipëri, por përfaqësojnë ( thonë ato) të varfërit. Komandantit i duhet edhe kjo beteje që të marrë edhe gradën e fundit. Po, gradën e fundit në spaletat e mëdha që si dikur edhe sot... Komandanti në Shqipëri, kishte dëshirë të vishte. Por ama "komandatët Don Kishot" në demokraci, bëjnë edhe dëm, sidomos ku përkrahen edhe nga sharlatanë që nuk meritojnë as nominimin Sanço Panço. Prandaj kujdes dhe vëmendje, duhet të kenë ato, që "Don Kishotin" e kanë lexuar përpara komandantëve, dhe sidomos e dinë se çfarë "komandantësh prodhon ky vend në kohë krizash ideologjike dhe pasioni politik në pasurim". Sot kutia e kërkuar është Dylqina e djeshme, por kur kalojmë në vite, arsyeja për Dylqinën me të vërtetë që shfrytëzon idiotizmin, për të pasur pastaj pushtetin"
Kujdes!



SOT