Valentina Madani

Taksat, tregtarët i ankohen Bashës: Rama po na falimenton bizneset. Basha: Ulje taksash për biznesin e vogël dhe zhvillim të lagjeve

Lulzim Basha, kandidati i PD-së për Bashkinë e Tiranës, merr garancinë e qytetarëve të Tiranës se falë sukseseve të arritura dhe premtimeve të mbajtura në qeverinë “Berisha”, do të votohet me 8 maj për postin e kryebashkiakut të kryeqytetit. Kandidati Lulzim Basha, ashtu siç premtoi dy ditë më parë në fjalimin hapës të fushatës elektorale, nisi dje takimet dhe dëgjesat publike me banorët e qytetit. Turi i Bashës nisi në lagjen ku ai u rrit, pranë rrugës së Dibrës. Basha takoi qindra banorë të njësisë nr 8 në rrugën ‘Riza Cerova’ dhe në ‘Rrugën e Saraçëve’. Ata ndanë shqetësimet e tyre me kandidatin Basha.

Banorët evidentuan problematikat që ndeshin çdo ditë ndërkohë që tregtarët iu ankuan z.Basha se Rama po falimenton bizneset e tyre për shkak të taksave të larta. Ata thanë se taksat janë të larta, u mungojnë trotuaret, dhe shtëpitë e vjetra kanë nevojë urgjente për rikonstruksion. “Paguaj 850 mijë lekë taksa në vit. Paguaj 350 mijë lekë për gjelbërimin dhe 190 mijë lekë për pastrimin. Nuk mungon as taksa e tabelës. Deri tani në mesditë kam bërë xhiro vetëm 3 mijë lekë. Do të detyrohemi të punojmë në të zezë sepse nuk e përballojmë dot. Na duhet zgjidhje”, - i tha Bashës një pronar i një lokali të vogël. Banorë të tjerë ndanë shqetësimin e infrastrukturës dhe faktin se lagjja e tyre ka mbetur e pazhvilluar megjithëse gjendet në mes të Tiranës. Basha i dëgjoi banorët e zonës dhe bisedoi me ta problemet e jetës së përditshme.

“Nisa takimet në këtë zonë sepse jam rritur këtu”, - tha Lulzim Basha. Kandidati për kryebashkiak bëri të ditur se prioritet është zhvillimi i zonave. Në veçanti ai u ndal në problemet e infrastrukturës, biznesit të vogël, taksave lokale, varfërisë dhe përkujdesjes sociale për qytetarët në nevojë. “Kjo lagje ka nevojë për zhvillim. Pasurinë shpirtërore të lagjes duhet ta ruajmë dhe ti japim zgjidhje varfërisë”, - deklaroi z.Lulzim Basha. Ai premtoi se kur të jetë kryebashkiak do të ulë 2 deri në 5 herë taksat si dhe do të ketë prioritet zhvillimin dinamik të lagjeve të Tiranës.

Ai mori dhe mbështetje në këtë zonë. “Do tu votojmë sepse ti i ke mbajtur premtimet”, - tha një e moshuar që shtrëngoi duart me kandidatin Basha gjatë turit të tij në ditën e parë të fushatës për zgjedhjet lokale të 8 majit 2011.



standart