Ekspertët besojnë tani se një depresion i shkallës së ulët dhe i moderuar mund të jetë i mirë për ne – dhe madje të na ndihmojë që të jetojmë më gjatë. Ja si mund të përfitojmë nga një situatë depresive

Në mënyrë të vazhdueshme dëgjojmë se si depresioni është duke na shkatërruar jetët, duke nga gërryer ekzistencën, por ka disa ekspertë të cilët kanë dalë së fundi me një teori shumë interesante edhe pse shumë kundërthënëse që të paktën në disa raste depresioni është një forcë e mirë në jetën tonë. Për të gjithë ata që janë në prag të depresionit, apo të përfshirë prej tij nga format më të lehta deri në ato më të rënda, një logjikë, apo një përfundim i tillë mund të duket absurd dhe madje edhe tallës apo dashakeq. Depresioni klinik – një situatë e ndryshme nga ajo që provojmë nga mungesa e lumturisë apo ndjenja e të qenët i “vrarë shpirtërisht” është një sëmundje e frikshme që mund të shkatërrojë jetët e njerëzve dhe t’ua tronditë jetën që në themele, por sipas ekspertëve, për disa njerëz mund të ketë edhe në një situatë të tillë disa përfitime. “Nëse keni depresion, i cili nga vetë përcaktimi i termit do të thotë mungesë motivimi dhe paralizë emocionesh mund të jetë shumë e vështirë që të shohësh ndonjë gjë pozitive në këtë situatë, por unë mendoj se ata që arrijnë të kalojnë një situatë të tillë bëhen më të fortë. Një situatë e tillë mund të jetë një forcë e madhe mbijetese, sepse vetëm kjo situatë të bën që me të vërtetë të prekësh fundin dhe të shohësh kulmin e errësirës”, thotë Majorite Wallace, një mjeke dhe paciente e depresionit. Një deklaratë e tillë mund të tingëllojë thjesht si një dëshirë e mirë, por kësaj i shtohet edhe argumenti. Dy vjet më parë, profesori Jerome Wakefield nga Universiteti i Nju Jorkut shkaktoi shumë diskutime kur në librin e vet: “Humbja e Udhëtimit” ndër të tjera shkruante se si psikiatria e ka transformuar ndjenjën e asaj që mund të quhet një hidhërim normal në një sëmundje depresive, se nëse do të përballemi me depresionin kjo do të na i ndryshonte jetët për mirë duke na ndihmuar përmes gabimeve që kemi bërë të kuptojmë se çfarë duam në të vërtetë. Ka edhe një kërkim tjetër shkencor i bërë në Holandë, i cili sugjeron që njerëzit, pasi kanë kaluar depresionin, duket se ia dalin që të përballojnë jetën më mirë me një vitalitet shumë më të lartë dhe me shëndet psikologjik të përmirësuar. Ndërsa në vitin 2002, në studimin e “Duke University” arriti që të dilte në konkluzionin se gratë që kanë pasur në jetën e tyre momente depresioni ka më shumë shanse që të jetojnë më gjatë duke nxitur spekulime në këtë rast se depresioni i lehtë mund të ndihmojë që të përballojmë më mirë situatat e vështira në jetë dhe të shmangim situatat e dëmshme. Ekspertë të tjerë me shumë kujdes pohojnë se depresioni mund të çojë një individ në vetëvrasje ndaj nuk duhet marrë shumë lehtë, por ka shumë nga ata njerëz që e kanë kaluar depresionin dhe që thonë se ai pas shumë të këqijave që u ka shkaktuar më në fund i ka ndihmuar që të vlerësojnë se çfarë është e rëndësishme, sepse mësojnë se si mund të mbijetojnë çka është një burim për vetëbesim dhe forcë. Sipas një tjetër mjeku që është ekspert në çrregullimet psikiatrike dhe në atë të ndryshimit të humorit te njerëzit, depresioni edhe pse është i tmerrshëm në vetvete dhe e transformon njeriun për keq dhe se askush nuk do ta zgjidhte kalimin e një përvoje të tillë në disa raste mund të na ndihmojë që të bëhemi më realistë. Dhe pikërisht se është kaq i dhimbshëm, ne përpiqemi me të gjitha mënyrat që të mos biem më në kurthin e tij dhe të arrijmë që ta shmangim. Sipas tij, mjekimet ndihmojnë deri diku, por nëse ndërkohë sillesh në të njëjtën mënyrë si edhe kur re pre e depresionit, askush nuk mund të të ndihmojë. Tamara Mercieca, një balerinë dhe autore e librit “Nga lart, poshtë” është një njeri që pasi vuajti një situatë depresioni të thellë për një kohë të gjatë në jetën e saj e madje pasi e ka shkuar shpesh ndërmend vetëvrasjen, vendosi që të bënte ndryshimin e madh në jetën e saj. Këtë e filloi me ndalimin e bërjes së një pune me turne dhe të qëndronte për një kohë më të gjatë në ajër të pastër dhe jo e mbyllur brenda. Puna me turne dhe qëndrimi brenda ishin disa nga shkaqet kryesore që e çuan në depresion dhe ajo vendosi që t’i shmangte. Ndërkaq, vendosi që të hante në mënyrë më të shëndetshme dhe të bënte një jetë më të pastër dhe higjienike larg alkoolit dhe duhanit. Pasi arriti që të dilte nga gjendja e rëndë, sot ajo i është “mirënjohëse” depresionit “Në tejkalimin e sëmundjes unë fitova aftësi që më kanë ndihmuar që të kaloj edhe pengesa të tjera. Kam pasur besime negative dhe më është dashur që të punoj shumë për t’i hequr nga mendja dhe vetja ime. Kam qenë një perfeksioniste dhe asgjë dhe askush nuk ishin mjaftueshëm për mua dhe gjithçka ishte një shkak për një pakënaqësi, por tani kam një marrëdhënie shumë të mirë me veten. Depresioni më ndihmoi që të ndihmoja edhe të tjerë përmes përvojës sime. Sipas saj, një përvojë depresive kur tejkalohet i bën njerëzit që të kenë një dimension më shumë në jetën e tyre, dimension që të tjerët nuk e kanë. Ka të tjerë që mendojnë se paraqitja kësisoj e depresionit, pra e anëve pozitive të tij është shumë e rrezikshme. Kjo, sepse, sipas tyre, njerëzit mund të mendojnë se një fat i tillë mund t’u ndodhë të gjithëve atyre që kanë depresion. Në fakt, jo të gjithë e kanë këtë fat, pra për të përjetuar anët e mira të kësaj sëmundjeje dhe se gjithçka është në radhë të parë individuale dhe në varësi të shkallës së sëmundjes dhe të kohëzgjatjes së saj.
Ajo për çka të gjithë ekspertët janë në një mendje është se marrja e mbështetjes së duhur është kyçe për një shërim të shpejtë. Gjëja më e rëndësishme për shërimin nga sëmundja dhe ardhmërinë është mbështetja e të afërmve dhe shokëve. Kanali i komunikimit duhet që të jetë i hapur. Një pjesë e madhe e njerëzve arrijnë që të shërohen dhe të mos kenë rikthime të situatës dhe kjo është një tjetër anë e mirë dhe shkak për të qenë optimistë dhe për ta parë sëmundjen si një nga sfidat e jetës.