Dashuria mund të kurojë depresionin

Dashuria e vërtetë mund të ndihmojë personat në depresion të shpëtojnë nga kjo gjendje. Kjo, falë veprimit të një hormoni që luan një rol të rëndësishëm tek impulset cerebrale

A mundet dashuria të shërojë depresionin? Ndoshta po. Por kjo mund të ndodhë falë ndërhyrjes së një hormoni, oksitocinës, që sekretohet kur përqafon, prek apo puth njeriun që do. Me pak fjalë, kur ke një kontakt fizik të këndshëm me një tjetër person. Ky hormon, i quajtur ndryshe edhe hormoni i dashurisë, luan një rol të rëndësishëm në forcimin e lidhjeve sociale dhe në ofrimin e shpresës atyre që vuajnë nga depresioni. Kjo është ajo që pritet të dalë nga përfundimi i një studimi të bërë nga kërkuesit amerikanë në Universitetin e Mjekësisë së Kalifornisë. Përmes një komunikate, ata kanë arritur të japin një pasqyrë të kësaj që mund të quhet një zbulim vërtet i dobishëm për shumë njerëz të prekur nga kjo patologji. “Te njeriu, oksitocina sekretohet kur përqafohesh apo kur ke eksperienca të tjera të këndshme me një person që e ndien afër. Po ashtu ky hormon është përgjegjës edhe për kënaqësinë gjatë një raporti seksual”, shpjegon në komunikatë Kai MacDonald, profesor i psikiatrisë në këtë universitet. Oksitocina, sipas kërkuesve, mund të “sillet” si një ndërmjetës i fuqishëm në sjelljen sociale të qenieve njerëzore. Duke vepruar mbi gjëndrën amygdala, vihen në aksion shumë stimuj të rëndësishëm emotivë, mes të cilëve shenjat e lidhura me njohjen sociale, përmes shprehjeve jo verbale. Së bashku me ndjesitë e prekjes, edhe syri bëhet një ndërmjetës i ndjenjave dhe emocioneve të lidhura me ndjenjat. “Ja përse oksitocina shpesh quhet hormoni i dashurisë. Thuhet se sytë janë pasqyra e shpirtit. Por me siguri thuhet se janë dritarja emotive e trurit. Ne dimë që komunikimi sy për sy, që ndikohet nga oksitocina, është thelbësor për komunikimin emotiv intim dhe për të gjitha llojet e emocioneve: dashuri, frikë, besim, ankth”. Duke nisur nga ky konstatim, që oksitocina mund t’i ndihmojë pacientët e prekur nga skizofrenia, siç ka konfirmuar një studim i mëparshëm, profesor MacDonald, bashkë me kolegun David Feifel, vendosi ta nisë këtë kërkim të ri për të ekzaminuar rolin e tij klinik në trajtimin e depresionit. Me të dhënat e para klinike në zotërim është arritur në përfundimin se oksitocina mund t’i ndihmojë plotësisht gratë që shfaqin simptoma ankthi. “Studimet mbi gjakun dhe faktorët gjenetikë te pacientët me depresion nxjerrin në pah mundësinë që ky hormon natyral mund të luajë një rol të rëndësishëm në ndihmën ndaj depresionit klinik. Më përpara, studimet tek individët e shëndetshëm kanë treguar se dozat e oksitocinës të marra përmes rrugëve endonazale reduktojnë aktivizimin e cirkuiteve cerebrale të përfshira në ndjenjën e frikës, duke rritur nivelet e kontaktit viziv, besimit dhe bujarisë. Është vërtet interesat fakti se personave që iu dha oksitocinë nuk thonë se ndihen ndryshe, por vihet re që vepronin ndryshe”. Pra, duke u bazuar te një person i dashur që mund të japësh dhe marrësh dashuri, ekziston mundësia që personi i prekur nga depresioni mund të nxjerrë avantazhe nga prodhimi natyral i oksitocinës përmes një shikimi miqësor, një përqafimi, një përkëdhelje. “Një përqafim apo një prekje që shkakton aktivizimin e këtij hormoni mund në një farë mënyre të modifikojë sinjalet e trurit. Duam të shohim nëse mundemi ta shfrytëzojmë këtë mundësi për të ndihmuar pacientët që vuajnë nga depresioni”, përfundon MacDonald. Kështu, nëse duam të ndihmojmë një të dashurin tonë që vuan nga depresioni, le të provojmë t’i ofrojmë pak dashuri. Sigurisht që keq nuk bën, dhe në rastin më të mirë do ta bëjë të ndihet ndryshe.

Shpëtimi tek ilaçet

Melankolikë, depresivë apo viktima të një sjelljeje çfarëdo, shpesh të rinjtë drejtohen te mjeku i familjes, i cili, duke mos qenë ekspert në këtë fushë, u këshillon ilaçe të kësaj kategorie, pa marrë parasysh rrezikun që mund të shfaqin. Është e vërtetë, shpjegojnë psikiatrit, që për të kuruar një njeri, i cili vuan nga depresioni, të duhen ndërhyrje komplekse, por më parë veprohet me rrugë të tjera, shqyrtohet situata në tërësi dhe pastaj hartohet një strategji veprimi. Po shtohen në mënyrë të frikshme ilaçet që përdoren për të luftuar ankthin, frikën dhe çrregullimet me ushqimin. Gjithmonë e më shumë të rinjtë kërkojnë tek antidepresivët zgjidhjen për shumë vështirësi të jetës, pa marrë parasysh rreziqet. Por përmirësimi i shëndetit mendor mund të arrihet vetëm nëse shikohet me kujdes që terapia çon në përmirësimin e gjendjes, apo që pacienti duhet të trajtohet në klinika të specializuara. Studimet e OBSH-së në 37 raporte ndërkombëtare tregojnë se 56 për qind e personave që vuajnë nga depresioni nuk janë diagnostikuar dhe nuk marrin ndonjë mjekim. Askush deri më tani nuk ka mundur t’i japë përgjigje pyetjes se përse vërehet një rritje shumë e madhe mes të rinjve antidepresivë që janë në mjekim të vazhdueshëm, në vend që të ndodhë e kundërta.

Dashuria mund të kurojë depresionin

Dashuria mund të kurojë depresionin

Dashuria mund të kurojë depresionin :: Komentet