Rruga e vështirë drejt dijes së tregut

ALBAN BALA

Para pak ditësh, një njeri që importon çorape, më pyeti si mund t’i investonte gati një milion dollarë që ka fituar për disa vite punë në “dyqanin” e tij, 15 metra katror, në Tiranë. Me mallra të lirë ai ka fituar një pasuri të shtrenjtë. “Por njerëzit nuk blejnë më si dikur”.

Tregtia që ai zhvillon i zë vetëm gjysmën e ditës, ngase puna e tij prej vitesh është shitja me shumicë. “Meqë kam kohë pasdite, - tha - mund të bëj edhe ndonjë gjë tjetër. Por nuk dua t’i humb ato para. Dua t’i shtoj. Sipas teje, çfarë mund të bëj?”.

Përballë këtyre pyetjeve të thjeshta, të arrish tek përgjigjet nuk është kaq kollaj. Ndaj edhe konsulenca mbetet një çelës i artë për të hapur dyert e shumë kapitaleve që ose jetojnë të trembura në errësirë, ose qarkullojnë pa adresë dhe pa efikasitet.

Nëse dilema proverbiale e tregut mbetet “më mirë të dish apo të kesh?”, sot e vërteta është se mund t’i kesh të dyja, nëse di.

Banka Evropiane për Rindërtim dhe Zhvillim ka nisur t’u përgjigjet këtyre dilemave në mënyrën më të mirë përmes Programit të Këshillimit të Biznesit – BAS. Ajo mbështet financiarisht kompanitë vendase të mesme e të vogla që të blejnë konsulencë, ndërsa i trajnon të dyja palët që të ngrenë profilin profesional në bashkëveprim.

Programi BAS po shërben aktualisht edhe si urë lidhëse mes kompanive shqiptare dhe Bankës Evropiane për Rindërtim dhe Zhvillim, kur kompanive – brenda vizionit strategjik të rritjes – u duhet mbështetje financiare me kredi apo përfshirja si ortak e bankës në investime.

Por shpesh kompanitë shqiptare nuk e dinë se çfarë u duhet, sepse ajo që bëjnë nuk është e ndërtuar mbi baza profesionale. Intuita që udhëhoqi ngritjen e biznesit gjatë viteve të para të tranzicionit, tani mund të vlejë për biseda nostalgjike në përvjetore themelimi, por jo për të mbështetur vizionet evropiane të së ardhmes.

Fakti që shumë kompani, të mesme e të vogla, po synojnë të ngrenë standardin e menaxhimit në nivele të reja cilësore drejt certifikimit ndërkombëtar, po rehabilitojnë imazhin dhe marketingun, tregon se tregu pas rritjes së shpejtë sasiore të dy dekadave të para, po zhvendoset drejt rritjesh cilësore.

Kjo pritet të shtresëzojë edhe masën konsumatore, duke i forcuar asaj instinktet e kërkimit të cilësisë dhe largimin nga nivelet mesatare e të ulëta.

Ndërkohë, është rritur marketingu i markave dhe janë forcuar tipologjitë identitare, të cilat më herët thuajse neglizhoheshin. Rritja e tregut në vizionin cilësor është e ndjeshme në këto vite, me gjithë luhatjet e fuqisë blerëse, theksuar kjo edhe nga kriza botërore e shumë komoditeteve.

Konkurencialiteti i kompanive sot synon garën, sa përmes një menaxhimi efikas të burimeve të brendshme, po aq edhe përmes zgjerimit të hapësirave në treg për produktet. Kësaj i janë shtuar sistemet e integruara informatike të menaxhimit të informacionit dhe ngritja e komunikimit të brendshëm e të jashtëm në nivele të reja.

Shumë shpejt në treg nuk do të sundohet më thjesht me çmime dhe me shpërndarje intensive të produktit. Panorama e re e mjedisit evropian, ku po afrohemi, sendërton çdo ditë e më shumë nevojën e përqafimit të konsulencës së specializuar, ku suksesi matet me rezultate financiare, me fleksibilitet në gjykim dhe me aftësi të shtuara.

Është koha e dijes së specializuar që gjeneron fitime përmes formave të planifikuara të zhvillimit ekonomik. Është koha e rritjes në mendim. Pa këtë rritje, çdo kapital është një “Bukuroshe e fjetur”, një pasuri muzeale, që nuk e shumëfishon dot vetveten.
Standart

Rruga e vështirë drejt dijes së tregut

Rruga e vështirë drejt dijes së tregut

Rruga e vështirë drejt dijes së tregut :: Komentet