Rai 3 i kthen përgjigje Ramës në lidhje me akuzat për shtimin e kanabisit me 12 herë në Shqipëri.

Pas reportazhit ku televizioni italian raportonte për rritjen me 1200% te kanabisit, kryeministri Rama u hodh direkt në sulm duke akuzuar median italiane.
Kryeministri e quajti si një turp gazetaresk lajmin e Rai 3 përmes një postimi në Twitter në datën 28 janar.
“Lajmi i mbrëmshëm në RAI 3 mbi gjoja 12-fishimin e kultivimit te kanabisit në Shqipëri është një turp gazetaresk, pa asnjë lidhje me realitetin e monitoruar dhe certifikuar nga vetë Guardia di Finanza! Uroj që partnerët tanë të shkëlqyer ta thonë vetë pa humbur kohë të vërtetën!” – shkroi Rama në Twitter.
Ndërkohë, më 30 janar Rama sërish bëri një postim në Twitter për këtë çështje duke falënderuar autoritetet e policisë italiane që ndihmojnë në luftën kundër kanabisit, duke përgënjeshtruar lajmin. Ai në postimin e tij i është referuar një lajmi nga agjencia italiane e informacionit Adnkronos.
 “Ja edhe e vërteta zyrtare për raportimin skandaloz të RAI3! Faleminderit autoriteteve të policisë italiane që na ndihmojnë përditë në afirmimin e fitores së përbashkët kundër kultivimit të kanabisit dhe në këtë rast na ndihmuan të fitojmë ndaj një gënjeshtre të madhe mediatike” – shkroi Rama në Twitter më 30 janar.
Por këto deklarata të Ramës nuk kanë ngelur pa përgjigje nga televizioni italian. Përmes edicionit informativ të ditës së premte, gazetarët e Rai 3 janë shprehur se nuk tërhiqen nga ajo që kanë raportuar.
“Folëm për BREXIT, por ka edhe nga ata që duan të hyjnë në Evropë, Shqipëria. Por unioni i kërkon të bëjë hapa përpara në luftën kundër krimit të organizuar dhe korrupsionit. Në udhëtimin tonë atje ne kemi folur për një rritje masive të plantacioneve të marijuanës, numra që policia shqiptare i mohon, por ndryshe nga e kaluara nuk ka nxjerrë të dhëna zyrtare. Ne, në bazë të burimeve tona, i konfirmojë shifrat qe kemi nxjerrë. Sot do të shohim se si Shqipëria kërkon të afrohet me standardet evropiane që janë drejtësia dhe liria e shtypit” – thuhet në prezantimin e kronikës së Rai 3.
Në kronikë flitet për procesin e Vettingut, reformën në drejtësi, si dhe lirinë e medias, duke përmendur edhe televizionin e Ramës, ERTV, si një burim të komunikimit politik të kryeministrit.


mapo.al