Autori,mesjeta,kopja, kopjaci

Edison Ypi
Një tjetër Mesjetë më e errët dhe më e egër se ajo e inkuizicionit, djegies së librave dhe mendimtarëve në turrën e druve na ka hy brenda me të gjitha të zezat, pa trokitur hiç te dera. Autorin e vranë. Origjinalin e helmuan. Janë zëvendësuar nga kopja dhe kopjaci, që po rrëshqasin si minj nëpër vrima dhe qenefe. Livadhi i freskët dhe i shëndetshëm i librave të mirë dhe leximeve emocionuese tashmë nuk ekziston.
U mbush me rrëshqanorë, u bë batak i helmët e i qelbët legenash që mburrin veten. Vlerat që mezi u formësuan nga njerëzimi gjatë shekujve dhe mileniumeve, improvizimi, alternimi, kreativiteti na lanë shëndenë. Përtacia, parazitizmi, qejfi për me rrejt, qejfi me mbush dhe me zbraz barkun, fukarallëku i mendjes, shterpësia e imagjinatës, vrazhdësia e hajdutllëkut, e bënë punën e vet, e vranë artin si stërmundim, si vullnet, sakrificë, vetëmohim, i janë vërsulur kopjimit.

Thirrja e egër ardhur nga kohët e lumtura të gazetës “Drita” dhe revistës “Nëntori”, mbledhjet, plenumet, miqësia vëllazërore me vende nga fundi i botës, hajnia, rrena, frika, i thanë bujrum Mesjetës dhe ulën në krye të sofrës kopjen dhe kopjacin. Origjinali po se po që është zhdukur pa nam e nishan. Por edhe kopja e ka humbur orientimin. Kopja nuk po di kopje e cilës kopje është, kopje e kopjes së parë, kopje e kopjes së dytë, të tretë, apo të njëqindtë. Kopja me autor kopjacin ka rrafshuar të gjitha relievet, ka mbushur të gjitha honet e thella, humnerat mendimtare. Tashmë që kopja mbahet për origjinal, dhe kopja e kopjes, kopja e kopjes së kopjes kanë zaptuar gjithçka, duket tepër vonë për të ndrequr diçka.
Fjalori është katandisur te nja treqind fjalë gjithsej, ja pesëqind, kurrë më tepër. Librat, jo vetëm artistikë, janë kopje për ibret të njëri-tjetrit. Fjalimet e të gjitha llojeve janë kopje të varfëruara e shkurtuara si kurrë më parë. Titujt e programeve televizive, formatet dhe brendia e programeve janë të kopjuara. Çfarë ka ndodhur me poezinë dhe letërsinë lus të më mirëkuptoni që s’po e them këtu. Flasin, shkruajnë, pyesin, përgjigjen, lëvizin, duke kopjuar më të kollajtët, bërllogun social, politik, mediatik, që sjellin dallgët nga përtejdetit.
Kopjes po i vjen në ndihmë me sa mundet motra e saj, klisheja. Zullumet që po bën kopja dhe klisheja me pjesëmarrjen e të kudondodhurës rrenë, udhëhequr nga kopjaci, janë tashmë një det pa anë e fund plot me këllira që i mbajnë për kryevepra, dështime që i shesin për suksese, marrëzira që i imponojnë për urtësi. S’është dëgjuar kurrë të thuhet, për shembull, zoti Biden, apo zoti Berluskoni, apo zoti Blair. Vetëm nëpër dreka e darka e qoka, zotërinjtë u drejtohen njëri-tjetrit me zoti filan, zoti fistek.
Megjithatë, shqipo kopjaci servil e frikacak i kompleksuar deri në tmerr, edhe kur për tjetrin flet keq dhe në hell do ta shkojë, u drejtohet me zoti Berisha, zoti Rama, zoti Meta etj., etj. me një qurravitje kopjace të turpshme të panevojshme. Ku ka ndodhur një krim, prej kohësh nuk shkon më një polic, por një “efektiv policie” (!) dhe kur për të ndihmuar ndokënd që theu tre brinjë kur e preku një makinë, nuk vete ta ndihmojë një mjek, por një “bluzë e bardhë” (!).

“Kënaqësi që ma pranove ftesën”, ose “faleminderit që u bëre pjesë e emisionit tim”, thotë pa i lëvizur qerpiku copa e mishit që i thotë vetes moderator ose moderatore kur dihet se nuk është aty për t’u mburrur me manovra të fëlliqta autoreferenciale, por për t’i shërbyer publikut. Në vendin e kopjeve, klisheve, rrenave, kafeja, uji dhe në përgjithësi lëngjet, nuk pihen por konsumohen (!), Ngjarja nuk ndodh në katundin x, por në aksin (!) mes qytetit y dhe z. Ku kopja dhe kopjaci janë përhapur si ferrat në përrua, çfarë shkruhet, çfarë pikturohet, çfarë kompozohet, çfarë filmohet, janë pleh, llum, bërllog dhe nuk i interesojnë askujt, nuk kanë asnjë rëndësi.
Rëndësi ka kopertina me lustra, titulli bombastik i kopjes, emri i kopjacit të lavdishëm, lehjet e tij plot me kalkulime, jeta me bëma të paqena, ku ishte, ku s’ishte, si e ktheu gotën, si e rrufiti kafen, çfarë brekësh mbath, çfarë ushkur përdor, çfarë ha, çfarë pi, sa dashnore ka. Aq e rëndësishme është bërë kopja, sa tamam si në Mesjetë, i kanë ngritur dhe këngë. Kopje moj të qofsha falë Ishe çupë por qënke djalë Kopje moj që na kënaqe Del e bredh nëpër çardhaqe Kopje moj që gjeç belanë Ma zure në fyt trahananë.
"Panorama"

Autori,mesjeta,kopja, kopjaci

Autori,mesjeta,kopja, kopjaci

Autori,mesjeta,kopja, kopjaci :: Komentet