Sulka: “Qeveria rrëzoi skemën e minatorëve”

Sulka: “Qeveria rrëzoi skemën e minatorëve”
Sipas zëvendësministrit të Punës, është duke u hartuar një skemë e dytë për trajtime të veçanta për 6 mijë minatorët
Dorina Azo
Është thyer më në fund heshtja qeveritare për 17 minatorët e ngujuar prej 23 ditësh për plotësimin e kushteve të punës, rritjen e masës së pensionit dhe uljen e moshës së punës. Zëvendësministri i Punëve Sociale, Kastriot Sulka, ka deklaruar dje në Komisionin Parlamentar të Veprimtarisë Prodhuese, se nga ky institucion është llogaritur fatura financiare për rritjen e pensionit të minatorëve, por ajo është hedhur poshtë nga Ministria e Financave. Fatura financiare e llogaritur për vetëm 400 minatorë kishte si efekt financiar 1 milion dollarë në vit, në të cilën janë përfshirë disa shtesa pensionesh, por nuk është pranuar nga Financat. Deklarata e numrit dy të Ministrisë së Punës është bërë gjatë raportimit në këtë komision, i thirrur nga deputetët për projektligjin “Për një trajtim të veçantë të punonjësve të nëntokës”. Përveç kësaj, sipas Sulkës, në mbledhjen e Këshillit Kombëtar të Punës janë miratuar dy projektligje në ndihmë të minatorëve, por të cilët janë rrëzuar nga qeveria. Sakaq, zëvendësministri i Punës, Kastriot Sulka, ka pranuar që statusi i minatorit kërkohet që prej një viti nga sindikatat, duke shtuar se për këtë dikasteri i Ministrisë së Punës është në negociata me minatorët për të arritur një rezultat final. Sipas tij, ky është një shqetësim dhe një përgjegjësi e Ministrisë së Punës, pasi është e vetmja ministri që funksionon në bazë të një Këshilli Kombëtar të Punës. “Kërkesa kryesore e minatorëve është ajo për statusin dhe brenda tij, dy më kryesorët janë mosha dhe pensionet”, tha Sulka. Gjatë diskutimeve, deputetët kërkuan hartimin e një raporti nga tri ministri, ajo e Financave, e Ekonomisë, si dhe Ministria e Punës mbi ecurinë dhe mundësinë e realizimit të kërkesave të minatorëve.

Ministria e Punës: “Gati skema II për minatorët”

Një skemë e dytë për trajtimin e veçantë të minatorëve pritet të krijohet, por përpara se ajo të fillojë nga aplikimi, më parë do të bëhet përllogaritja e efekteve financiare që vijnë nga zbatimi i kësaj skeme. Janë ekspertët e Ministrisë së Punës, ata që janë duke hartuar këtë skemë të dytë për trajtimin e kësaj kategorie, por ajo do të fillojë nga zbatimi vetëm pasi të jetë bërë përllogaritja e efekteve financiare. Detajet e skemës janë bërë të ditura dje në Komisionin Parlamentar të Veprimtarisë Prodhuese, ku në thelb kanë zbatimin e trajtimeve të veçanta financiare nga shteti, të cilat nuk dëmtojnë skemën e sigurimeve shoqërore. Sipas Ministrisë së Punës, efektet financiare për zbatimin e kësaj skeme duhen rillogaritur, pasi efektivisht ajo u studiua kur u bë skema e parë, ku fillimisht u mendua për 1300 minatorë dhe doli se ajo duhej zbatuar për 6 mijë minatorë në total. Pra, në atë kohë METE mori një iniciativë për dyfishimin e formularëve që do të bënin regjistrimin e minatorëve. Nga ana tjetër, Ministria e Punës ka kërkuar rritjen e investimeve për kushtet e punës së minatorëve.

Drafti i opozitës

Projektligji për trajtim të veçantë të punonjësve të nëntokës është iniciativë e deputetëve të opozitës, të cilët parashikojnë që punonjësit që kanë punuar në miniera për një periudhë jo më pak se 11 vjet e gjysmë në nëntokë dhe janë një periudhë sigurimi jo më pak se 23 vjet, në rastet kur nuk ushtrojnë veprimtari ekonomike, trajtohen me përfitim. Masa e përfitimit për këta punonjës është e barabartë me 60 për qind të bazës së vlerësuar. Me ndryshimin e paraqitur, kërkohet që këta minatorë të mos marrim 6 mijë lekë në muaj, por 10 mijë lekë, aq sa është pensioni minimal në qytet. Gjithashtu, në relacionin e projektligjit thuhet se rasti i trajtimit të veçantë të punonjësve të nëntokës është tejet specifik dhe ai duhet të rregullohet në bazë të një ligji të nxjerrë në vitin 2000.

Korrieri

Sulka: “Qeveria rrëzoi skemën e minatorëve”

Sulka: “Qeveria rrëzoi skemën e minatorëve”

Sulka: “Qeveria rrëzoi skemën e minatorëve” :: Komentet