Ben Qimja, skandali i dytë i drejtësisë
Letër-porosia e ardhur nga Anglia, me gjurmët e gishtave, është falsifikuar




Arrestimi nga Policia e Shtetit i Ben Qimes, pa urdhër nga prokuroria, ka sjellë skandalin e radhës në drejtësinë shqiptare. Letër-porosia e ardhur nga Anglia me gjurmët e gishtave në pistoletën që vrau Pirro Koçiun në vitin 2002 dyshohet se është falsifikuar. Lajmi bëhet i ditur nga burime pranë akuzës qendrore. Sipas saj, prokuroria shqiptare ka përgatitur materialin për letër-porosinë, material i cili është dërguar në Ministrinë e Drejtësisë. Kjo e fundit e ka përkthyer dosjen dhe besohet se kërkesën e ka dorëzuar pranë policisë angleze në datën 16 qershor të këtij viti. Por e papritura për organin e akuzës ka qenë kthimi i përgjigjes nga pala angleze, e cila në shkresën përcjellëse shkruan se materiali ka ardhur në Shqipëri në datën 12 qershor. Pra, sipas hetuesve, letër-porosia më parë ka ardhur sesa është dërguar në Angli. Gjithashtu, hetuesit e Prokurorisë së Tiranës përcaktojnë se në letër-porosinë e ardhur nga Anglia ka të tjera parregullsi. Një ndër to është origjinaliteti me ekspertizën e parë të siguruar në mënyrë private. Gabimi procedural i radhës është eksperti që ka kryer ekzaminimin në Angli, i cili është i njëjti ekspert që ka hartuar dy ekspertiza. Sipas ligjit shqiptar, në rastin që dërgohet për ekzaminime një provë në vendet e tjera, atëherë kërkesa duhet të shoqërohet me një ekspert shqiptar. Por edhe në këtë rast ka munguar një procedurë e tillë. Të gjitha faktet e mësipërme kanë hedhur dyshimin se Drejtësia Shqiptare nuk ka dërguar asnjë kërkesë në shtetin anglez, përkundrazi ekspertiza e pistoletës që u vra Pirro Koçiu në vitin 2002 është falsifikuar në Shqipëri. Për hetimin e këtij rasti po merret Prokuroria e Tiranës. Por skandali ka edhe përfituesit. Mbrojtja e Ben Qimes do të kërkojë lirimin në vlerësimin e masës së sigurisë, pasi mosmarrja e provës në mënyrë të ligjshme ka detyruar prokurorinë dhe gjykatën të rishikojnë masën e arrestit. Pas vendimit të dhënë nga Gjykata e Apelit në Tiranë për masën e sigurisë ndaj Arben Isufajt, avokati mbrojtës hodhi dyshime lidhur me kohëzgjatjen e mbërritjes së ekspertizës. Genc Gjokutaj ka deklaruar se ekspertiza ka ardhur brenda 24 orësh, çka bie ndesh me shërbimin që kryen posta diplomatike. Gjithashtu, avokati mbrojtës, i cili ka folur në emër të Ben Qimes, ka thënë se shteti po kërkon me ngulm që të inkriminojë klientin e tij në vrasjen e pazbardhur prej autoriteteve policore. "Lidhur me këtë vendim që ka dhënë Gjykata e Apelit Tiranë, unë pohoj faktin se në datën 11 qershor Prokuroria e Tiranës ka dërguar për ekspertizë në Angli shenjat e gishtërinjve të gjetura në një armë zjarri tip pistoletë që është siguruar si provë materiale në vendngjarje në ditën që është vrarë shtetasi Pirro Koçiu. Së bashku me shenjat e gishtërinjve të klientit tim, Arben Isufaj, janë dërguar edhe dy deklarata dëshmitarësh", ka pohuar avokati. Bashkëngjitur me këto materiale, ai ka dërguar edhe dy pyetje për t‘u sqaruar së bashku me materialet e prokurorisë, të cilat janë futur në një zarf dhe i janë dërguar palës angleze që do të kryente ekspertizën. Kthimi i përgjigjes për 24 orë, sipas avokatit, ishte tërësisht i pamundur për shkak të afateve. Këtë gjë e argumentonte me faktin se posta diplomatike me të cilën dërgohet dokumentacioni për raste të tilla zgjat të paktën dy javë.

Disa javë më parë, Prokuroria e Tiranës kishte siguruar një provë, e cila hidhte sadopak dritë mbi mënyrën e vrasjes së shtetasit Pirro Koçiu. Materialet ishin marrë nga familjarët e viktimës, të cilët kishin kryer një akt-ekspertimi në Angli të pistoletës që është kryer vrasja. Nga të dhënat rezultoi se në pistoletë kishte shenja të Arben Isufajt. Në bazë të kësaj prove, prokuroria kërkoi në gjykatë arrestimin e Ben Qimes. Shkalla e Parë dhe e Apelit vendosën të pranojnë kërkesën e organit të akuzës. Dosja është ankimuar në Gjykatën e Lartë, e cila vendosi të mos e pranojë kërkesën e organit të akuzës, ndërsa urdhëroi që personi në fjalë duhet të lirohet. Vendimi është dërguar në Prokurorinë e Përgjithshme. Kjo e fundit i ka kthyer një përgjigje Gjykatës së Lartë, se personi në fjalë nuk është i arrestuar. "Si mund të lirojmë një person që nuk është në burg?!!!" - ishte përgjigjja e organit të akuzës drejtuar Gjykatës së Lartë.






Premçi: Është më mirë

ta kemi në qeli Qimen


"Është më mirë ta kemi në qeli Arben Isufajn, që të mund ta përballim me provat". Ky është pohimi i drejtorit të Përgjithshëm të Policisë së Shtetit, Ahmet Premçi, një ditë pas arrestimit të Arben Isufajt, të njohur në Fier me nofkën Qimja. Policia duket se është befasuar nga lajmi se 37-vjeçari fierak është shpallur i pafajshëm nga Gjykata e Lartë për akuzën e vrasjes së Pirro Koçiut. Drejtori i Përgjithshëm i Policisë ka deklaruar se "ne nuk kemi qenë në dijeni të ndryshimit të masës së sigurisë për Arben Isufajn, ndaj dhe arrestimin e tij e quajmë të vlefshëm dhe konform ligjit". Por i vetëdijshëm për fuqinë e vendimit të gjykatës, Premçi thotë se "ne do të kërkojmë nga prokuroria që Isufaj të mbetet në burg, pasi duke qenë i prangosur është më e lehtë përballja e tij me provat e siguruara nga policia".
Shqip