Tiranë, bashkia i hap luftë biznesit duke i shkatërruar pronat
Biznesi shqiptar prej kohësh po jeton një periudhë “trazirash”, ku nuk po merr dot frymë. Si situata ligjore ashtu dhe pushteti qëndror e ai lokal i janë kthyer biznesit për t’i vjelur atij sa më shumë të ardhura dhe për ta vënë përpara presionit të realizimit sa më shpejtë të objektivave, për të mos rrezikuar më pas falimentin. Asnjë situatë nuk paraqitet favorizuese për biznesin sot. Këtë herë Dhoma e Tregtisë dhe e Industrisë, e përfaqësuar nga kryetari i saj Gjok Uldedaj, ka shprehur revoltimin mbi sjelljen e Bashkisë së Tiranës, që sipas kësaj dhome ka ndërmarrë “goditje selektive” ndaj një biznesi të caktuar.Sipas Uldedaj, ky është problem evident, i cili është shumë shqetësues për ecurinë e sipërmarrjes private, ngaqë rrezikon vetë ekzistencën e saj. Biznesi duket i revoltuar nga ky akt i Bashkisë së Tiranës, vetëm një javë para se hyjë në fuqi ligji i ri për legalizimet, nga i cili biznesi pret shumë. Ligji i ri i legalizimeve ka si objektiv të legalizojë, pra të formalizojë atë kapital që ndonëse është real, është nga ana tjetër edhe informal dhe për këtë arsye jashtë tregut të qarkullimit të vlerave. Nëpërmjet këtij ligji, biznesi do të bëhet një kontribues i tregut. Ky ligj do të rikthejë në treg një kapital me vlerë rreth 10 miliardë euro, që kanë qenë deri më sot një pronë e fjetur e këtij vendi. Sipas Dhomës së Tregtisë dhe Industrisë, ky proces do t’i japë shtetit një përfitim prej rreth 700 milionë eurosh, 80% e të cilave do të përdoren për kompensime të pronarëve dhe 20% për të nxitur zhvillimin urban. Sipas Uldedaj, veprimet e Bashkisë së Tiranës, duke shkatërruar pronat që pas një jave mund të formalizohen, janë në dëm më tepër të pushtetit. Biznesi kontribuon me 85% të GDP-së dhe punëson rreth 80% të fuqisë punëtore. Kreu i Dhomës së Tregtisë dhe Industrisë, vuri në dukje se për të gjitha reformat që i kanë kontribuar rritjes dhe konsolidimit të shtetit gjatë këtij 18-vjeçari, biznesi ka qenë nxitës dhe bashkëpunues. “Kemi përkrahur çdo iniciativë edhe pse ajo mund të ketë rënduar mbi sipërmarrjen tonë, pasi përtej kësaj kemi parë një interes të përbashkët për arritjen e standardeve ndërkombëtare. Kemi dalë thuajse jashtë kapaciteteve dhe mundësive tona reale, për të ecur në krah me homologët tanë nëpër Europë, për të treguar se jemi njerëz që marrin dhe realizojmë iniciativa, madje më mirë se sipërmarrësit e tjerë”, u shpreh Uldedaj.
Biznesi bashkohet kundër sulmeve abuzive
Në këto kushte, ku biznesi nuk po gjen një përkrahje, Dhoma e Tregtisë ka marrë një sërë iniciativash në kuadrin e përmirësimit të vazhdueshëm të punës së saj, si dhe në funksion të shërbimit dhe asistencës më të mirë ndaj biznesit ka ndërmarrë një fushatë të evidentimit të problemeve dhe shqetësimeve të tij. Me ligjin e ri të “Procedurave Tatimore” si dhe ligjin e “Falimentimit” të dekretuar pak javë më parë nga Presidenti Topi, problemet që do të ketë biznesi do të jenë të shumta edhe pse aktualisht biznesi i mesmë paraqitet me probleme, sipas qeverisë në mospagimin e detyrimeve të tij tatimore ndaj pushtetit vendor. Këtu përfshihen, vështirësitë dhe pengesat që ju krijohen bizneseve për shkak të mënyrës se si janë konceptuar aktet dhe procedurat. Gjithashtu do të jepet ndihmë dhe në raste të aplikimeve abuzive të akteve dhe procedurave. Në këtë kuadër do të trajtohen dhe raportet e biznesit me administratën në përgjithësi apo me sektorë të veçantë të saj.
Biznesi: Të bëhet legalizimi i aseteve
Biznesi kërkon të vë në lëvizje pasuritë e tij të “vdekura”. Edhe Dhoma e Tregtisë dhe e Industrisë e ka ritheksuar këtë kërkesë, një ditë pas deklaratës së Ministrit të Financave Bode, mbi përfundimin e draftit të amnistisë fiskale. Në këto kushte biznesi nga ana e tij duket i pakënaqur thjeshtë me një amnisti fiskale, për borxhet e këqija të tij, duke kërkuar më shumë se kaq. Sipas biznesit, drafti i ri i hartuar nga Ministria e Financave për faljen e borxheve të këqija, nuk është zgjidhja e problemit, pasi një pjesë e mirë e këtij borxhi është mbledhur nga biznese tashmë të falimentuara. Më shumë se kaq, biznesi kërkon legalizim të plotë të aseteve, një situatë kjo pak problematike, pasi shumë biznese mund t’i kenë ndërtuar asetet e tyre mbi baza informaliteti dhe legalizimi i tyre, do të thoshte t’i jepje dorë informalitetit në vend. Por pretendimet e biznesit, në këtë aspekt janë të tjera. Biznesi pretendon se, shumë kompanive për vite të tëra nuk i është bërë sistemimi i duhur i aseteve në bilanc. Sipas këtij pretendimi një pjesë e kompanive kanë investuar tej mundësive të tyre dhe këto investime nuk janë të pasqyruara plotësisht në bilance. Për këtë fakt duhet të ketë një rakordim të këtyre aseteve, pasurive, të cilat kanë ardhur si mosdeklarim për faj të të dy palëve. Biznesi e shikon legalizimin si një reformë rregulluese, e cila do t’i jepte frymëmarrje të plotë biznesit, ndërkohë që një amnisti fiskale do ta dëmtonte biznesin, pasi nuk do ta shpëtonte atë nga pagesa e principalit.
SOT