Rama: S’do të jem në krye të listës së kandidatëve për deputetë

Nga L.Progni

Edi Rama ka deklaruar dje në mbledhjen e Asamblesë Kombëtare të PS, se nuk do të jetë në krye të asnjë liste kandidatësh për deputetë në zgjedhjet e vitit 2009. Ai është shprehur në mbledhjen e djeshme të Asamblesë Kombëtare të PS, se në vendet e para në listën e kandidatëve për deputetë në çdo qark do të jenë personalitetet e spikatura të qarqeve përkatëse. Në këtë mënyrë ai ka bërë të ditur se nuk do të ketë hapësira për privilegjim të deputetëve aktualë të PS, pasi në krye të listave do të jenë pikërisht personalitetet e qarqeve që jo domosdoshmërisht i bie të jenë deputetët aktualë të PS. Sipas deklarimit të djeshëm të Ramës në Asamblenë Kombëtare të PS, duket se Rama do të jetë te vendi i tretë i katërt apo i pestë i listës së kandidatëve për deputetë në qarkun e Tiranës, gjë e cila gjithsesi i garanton atij mandatin e deputetit. Në mënyrë të natyrshme ai ka qartësuar idenë se do të jetë deputet në parlamentin e ardhshëm dhe për pasojë ai lë postin e kryetarit të bashkisë së kryeqytetit, e cila pasohet me një tjetër sfidë të PS në Tiranë, përballë kundërshtarëve. Kjo për shkak se në rastin kur kryetari aktual i Bashkisë së Tiranës do të dorëhiqet nga ky post për të kandiduar për deputet të PS, atëherë do të zhvillohen zgjedhje të parakohshme për bashkinë e kryeqytetit. Në rastin kur Rama dorëhiqet nga posti i kryetarit të Bashkisë së Tiranës, në zgjedhjet për këtë bashki do të jetë rasti të verifikohet elektorati i dy partive, që i bie të ndodhë në mes të mandatit të parlamentit të ardhshëm.



Lista e kandidatëve

Në mbledhjen e djeshme të Asamblesë Kombëtare të PS janë hedhur kështu hapat e parë drejt zbardhjes së cilësisë së listës së kandidatëve për deputetë të PS në zgjedhjet e ardhshme parlamentare. Sa i përket vendimit të Ramës për të mos qenë në krye të listës së kandidatëve për deputetë, ai njëherësh i “mbyll” gojën deputetëve aktualë, për të qenë në krye të listave. Burime pranë PS thanë dje se, sa i përket përbërjes së listës, do të përfshijë shumë kandidatë që i përkasin shoqërisë civile, duke u mbështetur në filozofinë e Ramës: “Përtej së majtës dhe së djathtës është Shqipëria”. Nëse kjo do të ngjasë, atëherë problemi i Ramës në zgjedhjet e ardhshme parlamentare do të jenë pikërisht deputetët aktualë apo pretendentë të tjerë për të qenë deputetë në legjislaturën e ardhshme. Ata kanë mundësinë të akuzojnë Ramën për privatizim të PS nga shoqëria civile, gjë për të cilën ai prej kohësh është akuzuar dhe po vazhdon të goditet nga kundërshtarët. Sidoqoftë, në listën e kandidatëve për deputetë të PS në zgjedhjet e ardhshme parlamentare, sipas burimeve Rama do të jetë nga numri 3 apo katër, gjë e cila i jep garancinë e nevojshme për të fituar. Në qarkun e Tiranës do të jenë 33 kandidatë të PS, në Korçë 12, në Berat 8 kandidatë, Fier 17 kandidatë, Durrës 11 kandidatë, Shkodër 13, Lezhë 7, Kukës 4, Vlorë 11, Gjirokastër 7, Elbasan 13 kandidatë për deputetë. Sidoqoftë, kriteret që do të përcaktohen për hartimin e listave do të kalojnë nëpërmjet një procesi të gjatë debatesh në forumet e PS, por duket se fuqia e këtyre forumeve për të ndryshuar atë çfarë tashmë duket se është vendosur, është e pamjaftueshme. Kundërshtarët e Ramës në PS janë të paktë dhe pesha e tyre në këtë parti është e pamjaftueshme. Megjithatë, radhëve të të pakënaqurve do t’iu shtohen shumë shpejt të tjerë, pasi do të jetë pikërisht lista e kandidatëve që do ta shtojë dita-ditës këtë listë të pakënaqurish. Në mbledhjen e djeshme të Asamblesë Kombëtare mungoi Erion Braçe, nënkryetari i grupit parlamentar socialist, i cili pak ditë më parë ka shkëmbyer debate me kryetarin e PS për mënyrën e të bërit opozitë dhe për marrëveshjen me kryeministrin Berisha. Në mbledhjen e djeshme të Asamblesë Kombëtare të PS mungoi edhe profesori i socialistëve, ish-kryetar i parlamentit në kohën e qeverisjes socialiste, Servet Pëllumbi. Në mbledhjen pararendëse të Asamblesë Kombëtare të PS, Pëllumbi pati hedhur disa kritika ndaj Ramës, por edhe në shtypin e ditëve të fundit, Pëllumbi gjithashtu ka intensifikuar kritikat ndaj Ramës, kryesisht për mënyrën e të bërit opozitë dhe mangësive në aksionin opozitar kundër qeverisjes së PD.
Tema