PR, presion Berishës për postin e zv/kryeministrit
Godo: Ministri i PR, sa të kthehet Berisha

Republikanët ngusin sërish Kryeministrin për të emëruar ministrin e kësaj partie që u vendos parimisht të shtunën. Kreu i asamblesë, Sabri Godo, theksoi për "Shqip" se gjithçka pritet të zgjidhet me ardhjen e Berishës nga Franca. Brenda 16 ditëve, Kryeministri do të përcaktojë se cilën ministri do të lërë në dorë të republikanëve, por edhe të vendosë se cilin nga aleatët do ta largojë nga karrigia e ministrit për ta postuar në ndonjë dikaster tjetër. Përfshirja e republikanëve në qeveri do të riformatojë kabinetin, duke vënë në rrezik aleatët. Presidenti i Asamblesë së nderit të PR-së, Sabri Godo, i cili ka marrë pjesë edhe në takimin e fundit të republikanëve me Kryeministrin Berisha, shprehet se javën tjetër do të jetë përcaktuar gjithçka. "Presim përgjigjen e Kryeministrit Berisha dhe negociatat do të vijojnë nga java tjetër". Java e fundit e muajit korrik do të përcaktojë edhe ndryshimet e mundshme në qeveri dhe duket se do të sjellë për opinionin publik qeverinë për të cilën ata do të votojnë apo jo në zgjedhjet e përgjithshme parlamentare të vitit të ardhshëm. Godo ka mohuar gjithashtu se posti i zëvendëskryeministrit do të administrohet nga republikanët dhe se është folur për një dikaster të veçantë në takimin që Berisha bëri me republikanët ditën e premte. Burime nga Kryeministria pohojnë se pjesë e negociatave janë postet nga ministritë e drejtuara nga aleatët. Nga ana tjetër, deputetët demokratë kërkojnë postin e zëvendëskryeministrit, i cili prej pesë muajsh qëndron i lënë pezull. Republikanët kanë kthyer sytë nga Ministria e Shëndetësisë, Ministria e Arsimit dhe Ministria e Punës. Kërkesa e republikanëve vjen pasi prej pesë muajsh ata janë jashtë qeverisjes dhe për rrjedhojë kanë humbur vendet e tyre të punës militantët dhe mbështetësit e kësaj force politike, që deri në mars ishin të punësuar në Ministrinë e Mbrojtjes, por pas largimit të Mediut nga kjo ministri dhe reformimit të saj nga ministri i ri Oketa, mbështetësit e PR-së e kanë parë veten pa vende pune. Ultimatumi i republikanit Godo kërkon që brenda këtij muaji të përcaktohet ministri i ri që do të përfaqësojë republikanët në kabinetin qeveritar. Godo pohon gjithashtu se ndoshta kjo lidhet edhe me ndonjë ndryshim tjetër që Kryeministri Berisha eventualisht do të bëjë me qeverinë. "Ne kemi pritur kaq gjatë, mund të presim edhe dhjetë ditë", ka paralajmëruar Godo, Sipas tij, "do të ishte me të vërtetë e papranueshme që kjo të shtyhej, le të themi për në vjeshtë". "Duam një ministri që do të kishte peshë, ne nuk ngremë dot gishtin mbi ndonjë ministri, sepse ky është atribut i Kryeministrit", u shpreh Godo.

Aleatët të trembur

Demokristianët rinisin nga kërcënimet. Kreu i PDK-së, njëkohësisht ministër i Shëndetësisë, Nard Ndoka, ndryshimet në qeveri i ka kapërcyer me çështjen e hapjes së dosjeve të ish- sigurimsave. Ndoka shprehet se drejtuesit më të lartë të Partisë Demokratike i kanë parë dosjet e ish-bashkëpunëtorëve të Sigurimit të Shtetit gjatë viteve ‘95-‘96. Kreu demokristian thotë se në atë kohë ky informacion u përdor për të pastruar partinë nga ish-bashkëpunëtorët vetëm në nivelet e dyta dhe të treta të saj, ndërsa për drejtuesit e lartë ato u fotokopjuan.
Shqip