Berisha kërcënon me jetë deputetin Balla: Nuk kthehesh më i gjallë në parlament

Nga L.Progni

Kryeministri, Sali Berisha, ka kërcënuar fizikisht një ditë më parë deputetin e Partisë Socialiste, Taulant Balla, gjatë diskutimeve në seancën e Kuvendit për buxhetin shtesë të qeverisë. Ndërkohë që për këtë veprim nga ana Konferencës së Kryetarëve (në të cilën merrnin pjesë vetëm anëtarët e mazhorancës), është dënuar pikërisht deputeti Balla me përjashtim prej 15 ditësh nga aktivitetet e Kuvendit, ndërsa për sa i përket kryeministrit të Shqipërisë, i cili ka përdorur një gjuhë vërtet të vrazhdë dhe aspak të denjë për një drejtues qeverie, nuk është marrë asnjë masë penalizuese.




Debati


Taulant Balla ka qenë diskutanti i fundit për buxhetin në seancën e nisur të hënën në orën 18, por që ka zgjatuar deri në orën 03.00 të mëngjesit të djeshëm. Sapo ka marrë fjalën, Balla ka përdorur një gjuhë paksa provokative në adresë të familjes së kryeministrit. Ai ka thënë se, pas marrjes së Ministrisë së Shëndetësisë nga Anila Godo, vajza e Sabri Godos, edhe vajza e kryeministrit do të kërkojë të bëhet ministre, dhe pse jo edhe të marrë postin e kryeministres. Kaq është dashur që kryeministri Berisha t’ia kthejë flakë për flakë përgjigjen Ballës, me sharje dhe fyerje familjare, të cilat kaluan çdo cak të etikës parlamentare. “Jot motër fundërrinë ç’do bëhet?! Prostitutë motelesh do të bëhet!”, - kanë qenë fjalët e para, me të cilat Berisha i është drejtuar Ballës. Nga ana tjetër, në një version të nisur nga vetë deputeti Balla mësohet se kryeministri e ka kërcënuar këtë të fundit duke i thënë: “Ti nuk shkel më i gjallë në këtë parlament! Unë do të të vras!”
Në këtë inkursion ka qenë i ndihmuar dhe nga ana e kryetares së Kuvendit, Jozefina Topalli, e cila, në vend të qetësonte gjakrat, i është drejtuar punonjësve të Gardës që ta kapin dhe ta nxjerrin për “zhelesh”. Pas kësaj, ditën e djeshme, Topalli ka thirrur Byronë e Kuvendit, ku është vendosur pezullimi i Taulant Ballës për 15 ditë nga aktivitetet e Kuvendit.




Braktisja e Ramës


Por, Balla duket se në këtë çështje nuk është mbrojtur as nga kryetari i partisë së tij, Edi Rama. Në kohën kur është mbledhur grupi i PS për të dalë me një vendim për braktisjen e të gjitha seancave të Kuvendit, ka qenë Rama ai që ka kërkuar nga deputetët e partisë së tij që të “mos ndërmarrin veprime radikale”, pra të vazhdojnë punën në Kuvend si zakonisht. Gjithsesi, pas mbledhjes së grupit ka dalë në një konferencë për shtyp Valentina Leskaj, e cila e konsideroi Berishën si të çekuilibruar politikisht




Debati Balla-Berisha


Taulant Balla: Të nderuar kolegë deputetë, një ndër arsyet më të rëndësishme që kryeministri është larguar më herët se të gjithë deputetët nga seanca sot, është që për shkak se ka dalë emri i vajzës së Sabri Godos për ministre e Shëndetësisë, kryeministrit i ka plasur sherri në shtëpi, se edhe vajza e tij do të bëhet edhe ajo ministre e pse jo kryeministre. Të nderuar kolegë deputetë, përballë një kryeministri dhe një qeverie mashtruese është e kotë që në analizën e këtij buxheti të hyjmë në detaje me shifrat e tij...
Berisha: Jot ëmë dhe jot shoqe çfarë do bëhet?.. Jot motër, çfarë do bëhet?
Balla: Po s’e di
Berisha: Ç’do bëhet, fundërrinë, jot motër?
Balla: Ej, mbush ti apo jo?!
Berisha: Prostitutë motelesh do bëhet?
Balla: Po si nuk të vjen turp more!
Topalli: Ulu z. Balla... ulu!. Në fakt, ky e meriton me e kap për zhelesh, e jashtë!
Berisha-Ballës: Jot motër shkër... hoteleve apo moteleve?
Topalli: Nxirreni jashtë atë zotërinë, nxirreni jashtë! Zotëri, kape jashtë e nxirre! Vagabond! Ik andej! Ik! Del jashtë! Edhe nuk hyn më. Ai djali duhet të dalë jashtë.
Topalli-deputetëve të PS: Ju duhet t’i tërhiqni vëmendjen, t’i tërhiqni vëmendjen.
Topalli: Ore zotëri oficer, e shikoni atë që vazhdon? Ndërpritet seanca




Versioni i debatit, sipas Ballës


Balla: Kryeministri ka një arsye, pse iu desh të largohej sonte nga seanca, sepse i ka plasur konflikti në shtëpi. Meqenëse vajza e Godos po bëhet ministre e Shëndetësisë, atëherë edhe vajza e tij tani mund të bëhet ministre apo edhe kryeministre.
Më pas fillova të lexoj fjalimin tim për buxhetin.
Në këtë moment dëgjoja nga prapa që Berisha kishte hyrë në sallë dhe po më bërtiste nga pas: “Po nëna jote, gruja jote, motra jote ku janë? Në bordello i ike. Ti ke çuar njerëzit e tu në bordello!” (këtë e përsëriti disa herë).
Më pas shumë deputetë të PD u drejtuan drejt foltores. Berisha filloi të bërtiste edhe më shumë duke më thënë: “Ti nuk shkel me i gjallë në këtë parlament! Unë do të të vras!” Në këtë kohë edhe Topalli filloi të bërtiste me të madhe “Kapeni për zhelesh atë vagabond dhe nxirreni jashtë! Ai nuk shkel më në këtë parlament!”
Jepet urdhri për largimin e kamerave nga salla. Menjëherë pas kësaj deputetët e PD bëhen edhe më agresivë, thyen kordonin e gardistëve dhe u orvatën të më godisnin.
Jozefina urdhëroi oficerët e Gardës jo të më mbronin, por të më merrnin e të më nxirrnin jashtë. Në këtë moment vendosëm si deputetë të largohemi të gjithë nga salla.




PS: Organet e ligjit të marrin në mbrojtje deputetin Balla


Grupi parlamentar i Partisë Socialiste ka zhvilluar dje një mbledhje të jashtëzakonshme lidhur me debatin që ndodhi dje gjatë diskutimit të buxhetit suplementar në Kuvend mes deputetëve të kësaj force dhe atyre të djathtë, debate që shkaktuan dhe pezullimin e seancës plenare, ndërkohë që ka kërkuar që deputeti Balla të merret në mbrojtje nga ana e strukturave të shtetit, pasi ndjehet i kërcënuar”. Grupi parlamentar i Partisë Socialiste, i mbledhur sot në mesditë, pas ngjarjes së mbrëmshme në Kuvendin e Shqipërisë, ku kryeministri Sali Berisha, me një fjalor rrugaçëror dhe banal, ofendoi deputetin Taulant Balla, kërkoi që ky rast të merret në shqyrtim nga institucionet ligjore në vend. Sipas kryetares, Valentina Leskaj, rasti i djeshëm, tregoi papërgjegjshmërinë e kryeministrit Berisha përballë opozitës. “Si kryetare e grupit parlamentar të Partisë Socialiste duhet të them se ndihemi të dhunuar në mandatin tonë për të përfaqësuar popullin me virtytet e cilësitë e tij më të mira, në një parlament ku gjuha e ashpër kaloi çdo kufi. Është e turpshme ajo që ka ndodhur dje, është dhe më e turpshme ajo që ka ndodhur sot në mbledhjen e Byrosë së parlamentit, ku nuk janë dënuar dhunuesit, por i dhunuari. Grupi parlamentar socialist ka bindjen se grahmat e fundit të politikës së vjetër, të urrejtjes e të goditjes primitive të kundërshtarit, do të rrisin vetëdijen qytetare e politike të të gjithë shqiptarëve për domosdoshmërinë e një ndryshimi të madh në drejtimin e vendit, i cili nuk duhet dhe nuk do të jetë më peng i një personazhi të vjetër të së shkuarës, si Sali Berisha, që turpëron Shqipërinë dhe shqiptarët e shekullit të XXI”, - tha Leskaj.




Topalli vendos: Balla të përjashtohet 15 ditë nga aktivitetet e Kuvendit


Konferenca e Kryetarëve ka mbledhur dje Byronë e Kuvendit dhe ka vendosur të pezullojë për një periudhë 15-ditore deputetin e PS, Taulant Balla, i cili, sipas saj, ka përdorur “provokacione dhe gjuhë të ulët, dhe duke krijuar probleme serioze në mbarëvajtjen e Kuvendit”. Sipas relacionit, Byroja është mbështetur në nenet 62 dhe 65 të rregullores së Kuvendit. “Kryetarja e Kuvendit i ka tërhequr vëmendjen në mënyrë të vazhdueshme deputetit Balla, por ai ka vazhduar të kryejë shkeljet e mësipërme në kundërshtim të hapur me nenet 62 dhe 65 të Rregullores së Kuvendit. Në mbështetje të nenit 65, pika 1 e Rregullores së Kuvendit, kryetarja e Kuvendit i ka kërkuar të dalë nga salla dhe ka ndërprerë seancën plenare. Deputeti Balla nuk i është bindur këtij urdhri dhe ka kundërshtuar daljen nga salla. Për më tepër, ai ka vazhduar të provokojë rrëmujë në sallë dhe të përdorë fjalë fyese, duke konsumuar shkelje të rëndë të Rregullores së Kuvendit, parashikuar nga neni 65, pika 2 e saj.
Në këto kushte, kryetarja e Kuvendit, në mbështetje të nenit 65, pika 2 e Rregullores së Kuvendit, i ka kërkuar Byrosë së Kuvendit përjashtimin e deputetit Taulant Balla nga pjesëmarrja në mbledhjet e komisioneve dhe të seancave plenare të Kuvendit, për një periudhë 15-ditore.
Byroja e Kuvendit, e mbledhur në datë 22.7.2008, diskutoi mbi marrjen e masës disiplinore ndaj deputetit Taulant Balla, për sjelljen e tij në seancën plenare të datës 21.7.2008, në shkelje të neneve 62 dhe 65 pika 2 e Rregullores, Anëtarët e Byrosë konstatuan me shqetësim se deputeti Taulant Balla, në mënyrë të përsëritur ka shkelur nenet 62 dhe 65, pika 2 e Rregullores së Kuvendit, ka përdorur fjalë fyese, ka shkaktuar rrëmujë në seancë plenare dhe nuk i është bindur urdhrit të kryetares së Kuvendit për të lënë sallën e seancës plenare. Për këto arsye Byroja e Kuvendit i konsideroi sjelljet e deputetit Taulant Balla si shkelje e hapur e neneve 62 dhe 65, pika 2 e Rregullores së Kuvendit dhe vendosi përjashtimin e tij nga pjesëmarrja në mbledhjet e komisioneve dhe të seancave plenare për një periudhë 15 ditore. Masa ndaj tij ishte e vonuar. Byroja nuk mund të pranojë të shndërrojë parlamentin në arenë shpifjesh e turpi”, - thuhet në relacion.
TEMA