Berisha: Rama spiunonte shokët e ekipit dhe trajnerët kur luante basketboll


Shefi i qeverisë në vazhdim të lojës së tij për spiunët, vazhdon të tregojë para të gjithë shqiptarëve se ai i disponon dhe i përdor ato sa herë që figurat e tjera politike i dalin kundër. Kështu, dje ai demonstroi se në momentin që kundërshtari i tij, e akuzoi gjatë një deklarate për shtyp, Berisha menjëherë nxjerr thonjtë dhe evidenton para të gjithëve të kaluarën e kryesocialistit, Rama. Dhe më konkretisht duke lëshuar akuza në distancë Berisha i drejtohet atij duke thënë se “Kryetari me korrespondencë i Bashkisë së Tiranës, nuk guxon të futet në një laborator informatike, sepse ka alergji të tmerrshme nga IT”, tha Kryeministri, duke nënvizuar se, e vetmja gjë që ai bën është “të kapë e të vërtisë 2-3 topa, edhe pse ka qenë një ndër basketbollistët më të dobët të këtij vendi që padiste gjithë ditën shokët e tij dhe trajnerët”. Deklarata të tilla, shefi i qeverisë i bëri pas një sërë inaugurimesh të disa rrugëve dhe shkollave, në komunat e Durrësit kryeministri Berisha është shprehur se qeveria po realizon premtimet e bëra duke iu kundërpërgjigjur kështu kryebashkiakut të Tiranës. Por, ajo që zë hapësirën më të madhe është komuna e Xhafzotajt, ku sipas kryeministrit në këto 3 vjet nga 28 km rrugë, janë asfaltuar 21 prej tyre. Ndërtimi i infrastrukturës së kësaj zone është shfrytëzuar nga kryeministri Berisha për t’iu rikthyer akuzave ndaj Edi Ramës, por jo si kryetar i partisë Socialiste. Kryeministri Berisha vizitoi shkollën 9 vjeçare të fshatit Xhafzotaj, një shkollë e ndërtuar gjatë këtij mandati të qeverisjes demokratike. Kryeministri Berisha vizitoi kabinetin e informatikës së kësaj shkolle, ku u informua nga Drejtori i shkollës, zoti Jakup Lala, se laboratorët e informatikës janë vendosur në 40 shkolla të këtij qarku, që përbëjnë 80 për qind të të gjitha shkollave të qarkut. Kryeministri u shpreh se shkolla 9 vjeçare Xhafzotaj është një shkollë model, duke vlerësuar punën e drejtorit të shkollës, zotit Jakup Lala dhe stafit drejtues të kësaj shkolle në kompletimin e kësaj shkolle, në ndërtimin e sheshit sportiv, lulishteve, laboratorëve të tjerë, krahas atij të informatikës, etj. Kryeministri theksoi faktin se kjo shkollë është e ndërtuar që në vitin 1916 dhe ka një histori të sajën, me të cilën ka të drejtë të krenohet gjithë zona. “Një mirëmbajtje e tillë e kësaj shkolle bëhet vetëm me dashuri të madhe për misionin fisnik të mësuesit dhe profesionin e tij”, tha Kryeministri. Drejtori i shkollës Jakup Lala e falënderoi Kryeministrin Berisha për mbështetjen e dhënë dhe shpalljen e arsimit si prioritet për qeverinë e tij. Por, gjatë vizitës në zonën elektorale të Shijakut, që mbahet nga partia Demokratike, kryeministri Berisha nuk është ndalur me kaq. Thuajse në çdo ndalesë të tij ai ironizoi Edi Ramën për administrimin e bashkisë së Tiranës. Kryeministri ftoi kryetarin e Bashkisë së Tiranës që të marrë shembull nga kryetari i komunës Xhafzotaj, Agim Hoxha për mënyrën se si shtrohen rrugët dhe përdoren paratë publike.“Nuk mund të mos më shkojë mendja tek balta e rrugicave të lagjeve të Tiranës dhe e ftoj kryetarin me korrespondencë të Bashkisë së Tiranës të vijë tek Agim Hoxha, kryetari i Xhafzotaj të mësojë se si shtrohen rrugët dhe si përdoren paratë”, u shpreh Kryeministri. Duke bërë një krahasim me rrugicat e rrugët e shtruara në Tiranë, kryeministri u shpreh se "do t’i kërkoj këshillit bashkiak të Tiranës që të masë rrugicat e shtruara, por jam i sigurt që janë shumë më pak sesa rrugët e shtruara në fshatin Xhafzotaj, Salmone, Rreth, të kësaj komune". “Shkoni dhe shikoni lagjen “Don Bosko”, në Tiranë, që përmbytet vazhdimisht dhe që ka baltë deri në gju dhe rrugë të paasfaltuar. Në Xhafzotaj punohet dhe kryetari i komunës nuk është me korrespodencë, por punon për komunitetin. Ky është kontrasti mes qeverisë së mirë dhe qeverisjes së shkuar”, u shpreh Kryeministri Berisha. Kryeministri i cili ka nisur prej kohësh turin nëpër Shqipëri, por në Shijak për herë të parë bëri të qartë qëllimin elektoral të këtij turi, duke zbuluar edhe një nga kartat e tij elektorale të vitit të ardhshëm. Megjithëse koha e mbajtjes së zgjedhjes është ende e paqartë, ajo që tani është e sigurt është se kryeministri Berisha ka nisur jozyrtarisht fushatën elektorale, që besohet se do të jetë një nga më interesantët dhe deçizivë për të ardhmen e dy drejtuesve kryesorë të politikës shqiptare, Sali Berishës dhe Edi Ramës.
SOT