Rama: Parlamenti i Berishës teatër imoraliteti i lindur nga Dushku


Liderët e së majtës dhe së djathtës vazhdojnë serinë e akuzave dhe kundërakuzave, duke iu referuar incidentit të së hënës në sallën e parlamentit. Reagimi i radhës ka ardhur nga kreu socialist Edi Rama, që i është rikthyer fjalorit fyes të përdorur në parlament nga kryeministri. Rama akuzoi Berishën se ka ulur ndjeshëm besimin e shqiptarëve tek institucioni i parlamentit. Refuzimi i kryeministrit për të kërkuar ndjesë pas incidentit me deputetin socialist Balla ka ashpërsuar tonet e kryetarit të partisë socialiste Edi Rama,që e quajti këtë aktin më të fundit dhe treguesin e politikës së rrugës më të cilën sipas tij kërkon të qeverisë Berisha. “Për fat të keq më duhet të riflas sepse pas agresionit nuk erdhi ndjesa, madje nuk pasoi as heshtja, po vijoi shfaqja e ulët duke e ulur edhe më poshtë shkallën e besimit të shqiptarëve tek kjo politikë e vjetër e tek ky parlament i lindur nga imoraliteti i Dushkut dhe i katandisur në një teatër të të gjitha varieteteve të imoralitetit politik” është shprehur kryesocialisti, gjatë një konference për shtyp. Sipas tij, nuk mund të heshtet përpara aktit edhe më të turpshëm të justifikimit të turpit me një turp tjetër, ku turpi tjetër ishte kalimi i fajit të pashlyeshëm nga agresori tek viktima, përmes justifikimit se kryeministri na qenkej provokuar. Kryetari i partisë Socialiste duke ironizuar sloganin me të cilin PD erdhi në pushtet koha për ndryshim, theksoi se me këtë drejtim Shqipëria po kthehet në një xhungël amoraliteti dhe dhune "Koha për Ndryshim", koha ka ndryshuar dhe çdo qytetar e qytetare, çdo familje e komunitet, duhet të bëjë kujdes të mos provokojë me vështrime, gjeste, fjalë, ndonjë "të fortë" të lagjes apo ndonjë grup rrugaçërisë në mjedisin publik, po të uli kokën e të mbylli gojën kur ka të tillë rreth e rrotull. Madje pse jo, të mbyllet më mirë në shtëpi”. “Dhe pas këtij leksioni halucinant, të kryeministrit të Shqipërisë, ne kemi vetëm një rrugë, shtoi Rama, për të shpëtuar nga pasojat e kësaj rruge pa krye ku Sali Berisha dhe të tijtë kanë futur vendin dhe kjo është rruga e bashkimit të qytetarëve shqiptarë, burra e gra, të moshuar, të reja e të rinj, përtej të majtës e të djathtës, në një rrjet të madh mirëkuptimi e solidariteti njerëzor”.
SOT