Si m’i përdhunuan fëmijët
Intervistoi: Elona Elezi

Kreu i shoqatës “Fëmijët e Tij”, aktualisht përballet me akuzën e abuzimit seksual me fëmijët për të cilët kujdesej. Por ai mohon gjithçka. Dhe thotë se akuzat ndaj tij janë të montuara. Se prokurorët i kërcënojnë me armë fëmijët për t’i detyruar të dëshmojnë kundër tij. Dhe se ai nuk ka besim tek autoritetet shqiptare

Kur dera e dhomës së Këshillimit hapet, një burrë shtatlartë dhe me thinja hyn brenda, duke falënderuar pas çdo veprimi gardianët. I veshur me një bluze ngjyrë blu të pambuktë, pantallona të shkurtra dhe shapka, të përshëndet me një shqipe të pastër e nis prezantimin, sikur të ishte personi më i panjohur i botës. Nënshtetasi skocez, 57-vjeçari John David Brown, i njohur nga skandali i abuzimeve seksuale me “Fëmijët e tij”, është një nga të para-burgosurit e shumtë të institucionit të paraburgimit 302, në rrugën “Mine Peza”. Pasi ka pranuar të japë një intervistë, duke falënderuar Zotin e duke theksuar se kjo është hera e parë që atij i jepet mundësia për të sqaruar pozicionin pas akuzave të shumta për abuzimet me tetë fëmijë, bamirësi rrëfehet për herë të parë gjatë këtyre dy 17 muajve në qelitë shqiptare. Duke nisur nga ardhja e tij në Tiranë, e deri në pohimin se ka punuar 20 vjet në gjykatën skoceze, në seksionin ndaj abuzimeve seksuale me të mitur, Brown largon çdo akuzë nga vetja, duke deklaruar se ka qenë “shpëtimtari” i 14 fëmijëve në kryeqytet, e jo njeriu që i ka tmerruar me dhunë seksuale dhe fizike. Në intervistën e tij dhënë “Korrierit”, 57-vjeçari akuzon publikisht dy britanikët e ekstraduar pak kohë më parë, Dino Kristodulu dhe Robin Arnold, duke drejtuar gishtin drejt tyre, si “mostra” të vërteta që u bëjnë keq të miturve.







Si keni mbërritur në Shqipëri?

Në fakt, në vitin 1999 unë isha në Kosovë për të ndihmuar persona në nevojë, pas luftës. Atje bëra një punë shumë të mirë. Po në Kosovë unë dëgjova për problemet e fëmijëve në Shqipëri. Dhe vendosa që të vija vetë.



Dhe erdhët në Shqipëri. Kishit menduar ndonjëherë se do të ishte vendi në të cilin do të ndërronte rrjedha e jetës suaj?

Unë nuk e kisha planifikuar që të jetoja në Shqipëri. Sepse unë kam një shoqatë në Indi, me 50 fëmijë që pata ndihmuar atje. Por kur erdha këtu, po ju them shumë sinqerisht se sytë më panë fëmijët më të vuajtur të botës, më të varfrit. Më mbusheshin sytë me lot. Kisha dhimbje në shpirt kur i shikoja duke shtrirë dorën. Atëherë mendova që kishte shumë punë për të bërë këtu dhe se Zoti më kishte sjellë për të përmbushur një mision këtu.



Dhe misioni ishte...?

T’u jepja këtyre fëmijëve një jetë më të mirë se ajo që kishin. Shumë herë më të mirë. T’i nxirrja nga rruga e vjedhjes, t’u hiqja veset e këqija e t’i mbaja larg familjeve që i keqtrajtonin.



Mendoni se ja arritët qëllimit?

Besoj se ja arrita. Bëra që ata fëmijë të dashuroheshin pas meje. Dhe unë i dua shumë.



Shoqata juaj duhet të kishte qëllim bamirësie e të ndihmonte fëmijët në nevojë. Ju çfarë keni bërë për këta fëmijë?

Fëmijët e mi ishin fëmijë me probleme shumë të theksuara ekonomike dhe sociale. Njëri prej tyre, 8-vjeçari A.Q, ishte shumë i sëmure dhe i varfër kur unë e gjeta rastësisht rrugëve të Tiranës. Ai ishte rrahur shumë keq nga babai i tij dhe e ëma ishte shumë e sëmurë që të kujdesej për të. Unë pagova për të që të shërohej, për të ëmën e tij, dhe e largova nga i ati që e rrihte, duke e strehuar në shtëpinë time. Dhe këtë e bëra dhe me trembëdhjetë të tjerët. Unë isha shpëtimi i tyre.



Atëherë, nëse ishit “mrekullibërësi” për këta fëmijë, si ka mundësi që përfunduat në qeli e tani jeni në një proces penal si i akuzuar se keni abuzuar me tetë prej tyre?

Jo gjithmonë gjërat janë ashtu siç duken. Mua më futën në kurth.



Fëmijët e vegjël ju futën në kurth?

Punonjës të ministrive përkatëse që s’më donin mua në Shqipëri dhe s’donin që të më jepnin lejen që të regjistroja shoqatën “Fëmijët e tij”. Ka shumë njerëz që mua s’donin të më shihnin tek shpëtoja fëmijë.



Si do ta bindni gjykatën shqiptare për pafajësinë tuaj?

Unë nuk jam fajtor. Unë jam i pafajshëm. Si do ta bind gjykatën? Fakti i parë që vërteton pafajësinë time është që unë jam impotent që kur kam qenë vetëm 21 vjeç. Për këtë arsye edhe nuk jam martuar asnjëherë deri më sot.



Kush e provon pretendimin tuaj, se ju nuk mund të kryeni marrëdhënie seksuale?

Ekzaminimet mjekësore, të kryera nga klinika ABC por edhe nga ekspertë të prokurorisë e të policisë. Të gjitha ekspertizat e kryera ndaj meje kanë provuar faktin se unë jam impotent.



Klinika ABC është klinika që ju ka dalë në mbrojtje gjatë gjithë procesit, apo jo? Keni miqësi me drejtorin e klinikës, Guy Eshelman?

Hera e parë që kam dëgjuar për klinikën ka qenë kur gruaja e një vartësit tim, Nathan, ma përmendi. Pasi ajo është shqiptare dhe punon si infermiere pranë kësaj klinike. Ajo (Lea), më ka ndihmuar madje edhe pasi unë zbulova që mbi fëmijët e mi ishte abuzuar. Më ndihmoi që në klinikën ku ajo punonte unë të ekzaminoja të gjithë fëmijët që ishin abuzuar seksualisht në shtëpinë time. Drejtorin nuk e njihja personalisht. Por në momentin që u kujdes për ekzaminimin e fëmijëve atëherë e respektoja.



Që ishin? Kush abuzoi me fëmijët tuaj?

Dino Kristodulu, personi me prindërit grekë që ishte rritur në Angli. Ishte ai që torturonte dhe ngacmonte seksualisht fëmijët e mi të vegjël. Bënte me ta akte të turpshme dhe më pas u digjte trupin me çakmak.



Dhe ju, që pretendoni se kujdeseshit shumë për fëmijët, si nuk e vutë re këtë makabritet që po ju ndodhte para syve?

Në fakt, kjo është një nga gjërat që kam peng në jetë. Si e lejova unë të ndodhte ajo gjë para syve të mi. Por Dino i kërcënonte fëmijët që të mos tregonin. Vetëm në fund, pasi kishin ndodhur gjërat e tmerrshme unë jam vënë në dijeni.



E çfarë bëtë juve pasi u vutë në dijeni se personi që juve e konsideronit si ndihmës kishte bërë këtë gjë?

E pezullova nga puna menjëherë dhe më pas ai u largua për në Angli.



Për çfarë periudhe bëhet fjalë?

Nuk e mbaj mend mirë, më duket se në tetor të vitit 2004.



Dmth, ai përdhunoi fëmijë nga 3 vjeç e deri në 13 vjeç, u dogji atyre trupin, i traumatizoi dhe gjithë çka bëtë ju ishte pezullimi nga puna?

Po, për momentin vetëm kaq bëra. Pas disa ditësh takova një pastor, që ishte eprori im dhe e vura në dijeni të gjithë gjërave që kishin ndodhur. Ai më premtoi që do të më caktonte një takim me një përfaqësues britanik të Interpolit. U takuam me të në një kafe të Tiranës dhe i vura në dispozicion të fakteve dhe provave që kisha ndaj Dinos, duke i dhënë edhe fotografi të fëmijëve me shenja në trup. Më pas mësova se ata thjesht e kishin thirrur Dinon në Tiranë për ta marrë në pyetje e ai ishte kthyer përsëri mbrapsht në Angli.



Ju patët kontakte me Dino Kritodulun gjatë kohës që erdhi për t’u marrë në pyetje?

Po. Erdhi të më takonte tek shtëpia. Por nuk e prita.



Në ç’rrethana e keni njohur Dino Kristodulun? E gjetët juve atë apo ai ju gjeti juve?

Prej kohësh ai punonte me një shoqatë bamirësie, si vullnetar për të ndihmuar fëmijët. Pasi kishte qenë në vende të ndryshme të botës, erdhi dhe në Shqipëri për një projekt. Këtu u takuam nëpërmjet kishës, e më tha se donte të punonte si vullnetar me mua dhe shoqatën time, “Fëmijët e tij”.



Juve pranuat, pa u i interesuar më parë se ç’të kaluar kishte ai njeri dhe që do t’i linit të kujdesej për fëmijët që thoni se i doni aq shumë?

Patjetër që u interesova pranë shoqatës ku ai ishte i anëtarësuar. Më folën fjalë të mira për të dhe unë besova.



Po me Robin Arnold si u njohët?

Dy muaj pasi kishte ikur Dino, nga dhjetori, në periudhën e Krishtlindjeve të vitit 2004, nëpërmjet disa britanikëve që kanë disa shoqata këtu, njoha Robin. Më tha se ishte vënë në dijeni të abuzimeve që kishte bërë Dino me fëmijët e mi dhe se ishte shumë i prekur e donte të ndihmonte me seanca psikologjike me ta, për të kaluar sadopak traumën që kishin përjetuar.



Dhe “ndihma” ishte duke abuzuar dhe ai me ta?

Më lër të shpjegohem. Unë pata besim tek Robin, i cili duke pasur dhe një moshë më të madhe, do të ishte njeri i përgjegjshëm. Në fillim nisi t’u blinte fëmijëve të mi lodra të shtrenjta e t’i çonte madje dhe në restorante. Në fakt kjo gjë më habiti. Por mendova se ishte thjesht një gjest bamirësie. Unë edhe pse e mbaja në shtëpi, nuk është se më pëlqente shumë. Tek unë erdhi si vizitor, ndenji vetëm një javë. Dhe dy ditë pasi kishte ikur fëmijët më vunë në dijeni të abuzimeve të tij, të akteve të tij të turpshme.



Si e lejuat këtë gjë të ndodhte, që dy herë brenda dy muajve takuat njerëz që ju strehuat në shtëpi, e si pa të keq abuzuan seksualisht e tmerruan tetë fëmijët tuaj?

Nuk e di as unë. Këtë e kam peng. Por gjërat mua në atë shtëpi m’i fshihnin.



Ju po thoni që me fëmijët kanë abuzuar Dino Kristodulu dhe Robin Arnold? Ndërsa ju jeni i pafajshëm e s’keni bërë asgjë të keqe?

E di që s’më besoni. Unë e di që s’më beson askush. Dhe kanë të drejtën e tyre. Por unë kam besim tek Zoti dhe vetëm atij i druhem. Unë kam frikë nga Zoti. S’do kisha bërë kurrë gjëra të tilla, sepse e di që Ai më shikon gjatë gjithë kohës.



Nëse jeni i pafajshëm, si ka mundësi që tetë fëmijë, të cilët ju thoni se i shpëtuat nga jeta e varfër që bënin, të kenë rrëfyer gjatë marrjes në pyetje gjëra që një fëmijë 3 ose 6 vjeç s’mund t’i dijë nëse nuk i kanë ndodhur vërtet?

Një nga fëmijët e mi, E.R., më pati treguar gjatë gjyqit se prokurori e kishte kërcënuar gjatë marrjes në pyetje me një armë zjarri, për të thënë gjëra të pavërteta për mua. Që e kishte rrahur. Fëmijët e mi që kanë dëshmuar në gjyq janë manipuluar që të gjithë të thonë gjëra të pavërteta.



Z.Broën, pse nuk u drejtuat në polici pas skandalit që zbuluat?

Për të qenë i sinqertë, unë nuk kam besim tek policia shqiptare. Sepse në vitin 2003, pata një eksperiencë me ta që më bënë të humbja besimin. Në atë kohë, gjeta një fëmijë të rrugë, i cili ishte gjakosur e nxirë nga i ati, që ishte alkoolist. I bëra disa foto të plagëve që kishte në të gjithë trupin, e u drejtova për në komisariat. Pasi kërkova të flas me një inspektor që të merrte dëshminë time për atë që më kishin parë sytë, arrita të kontaktoj me një punonjës. Pasi më dëgjoi për disa minuta, u lodh, shkroi diçka në një letër dhe e flaku tutje. Nuk u mor fare me rastin që unë i tregova. Që aty humba besimin.



Në të njëjtin burg, keni dhe dy personat që dyshohen që kanë abuzuar me fëmijët, Kristodulu dhe Arnold. Kontaktoni me ta?

Jo, i shoh rastësisht kur dalim në ajrim. Disa herë Dino ka tentuar të vijë e të më shfajësohet, duke mohuar kategorikisht që të ketë gisht në abuzimet me fëmijët e mi. Ndërsa Robin nuk me flet fare.



Si e kaloni kohën e lirë këtu?

Duke lexuar Biblën, dhe duke u lutur gjithë kohën.



Për çfarë luteni?

Kërkoj që të laj mëkatet që kam bërë, duke lejuar që t’u ndodhin ato gjëra të tmerrshme fëmijëve të mi, që i dua aq shumë e që s’munda të parandaloj tragjedinë.



Mbani kontakte me ta? Kanë kërkuar ndonjëherë t’ju takojnë?

Posi jo. Dërgojnë herë pas here letra duke më shkruajtur që më duan shumë dhe se ata e dinë që nuk jam unë personi që kam abuzuar.



Po për prindërit e tyre keni ndonjë mesazh?

Po. E kam një mesazh për ta. Dua të më japin një herë të vetme mundësinë për t’u shpjeguar para tyre që unë s’kam gisht në akuzat që më bëjnë dhe se ua dua fëmijët siç i duan dhe ata vetë. Dhe se s’do të mund të bëja kurrë gjëra të tilla me ta. As gjatë procesit nuk më është dhënë kurrë mundësia që të jap versionin tim të fakteve.

Korrieri