viti 267 Shkelja e Gotëve në Shqipëri e Epir, që rrënojnë vendin. Perandori Marcian i thyen barbarët por më pas bie në luftë kundër gjeneralit romak Aureolus.

279 Probi (M. Aurelius Valerius), perandor ilir (276 – 282) kalon në Iliri dhe nënshtron Gotët.

374 Kuadët, fise gjermane, e Sarmatëtshkatërrojnë Ilirinë. Kundër tyre lufton perandori Valentinian I (364 – 375).

379 Perandori romak Teodosi i Madh (379 – 395) dëbon Gotët, Alanët e Hunët nga Dakia, Trakia e Iliria.

381 Teodosi i Madh thyen Hunët që plaçkisnin Epirin e Maqedoninë.

396 Alariku I, mbreti i Visigotëve (382 – 412) përshkon Greqinë e plaçkit Epirin, Thesalinë, Maqedoninë, ku rri për 4 vjet.

397 Alariku, sulmuar nga gjenerali romak Stilikon, ngre kampin në Epir me gjithë ushtrinë e vet.

434 Atila, mbret i Hunëve, i quajtur edhe flagellum Dei, plaçkit Trakinë e Maqedoninë.

447 Atila pushton e plaçkit Epirin.

493 Ostrogotët hyjnë në Shqipëri, të udhëhequr nga Teodoriku.

535 Perandori ilir Justiniani I (527 – 565) largon Ostrogotët nga Shqipëria.

551 Totila, mbret i Ostrogotëve të Italisë, në krye të një flote prej 300 anijesh, rrënon Sarandën (Onchesmos), pushton e plaçkit Nikopolin (Prevezën).

595 Shkupi plaçkitur e rrënuar nga Serbët.

619 Dyndja e Avarëve.

626 Antët, ose Sllavët e Detit të Zi, çohen kundër Avarëve e dynden me leje të Heraklit I, në Iliri.

640 Depërtimi i Serbëve në Shqipërinë veriore.

687 Sllavët zenë vend në Maqedoni.

917 Pushtimi i Shqipërisë nga Bullgarët. Car Simeoni i mund Serbët dhe pushton Shqipërinë jugore, Epirin me kryeqytet Nikopolin dhe arrin deri në Himarë.

990 Car Samuili, i biri i Car Shishmanit, pushton Durrësin.

996 Flota bizantine rifiton Durrësin, i cili në katër shekuj (992 – 1392) ndërron kështu 32 herë sunduesit.

1010 Duke filluar nga shekulli XI, Normanët e Napolit, Venedikasit e Hungarezët zaptojnë Shqipërinë e ngrenë shtete të vogla.

1018 Ivan Vladislavi, nipi e princi trashëgimtar i car Samuilit, duke dashur të pushtojë Durrësin, vdes gjatë rrethimit të këtij qyteti.

1019 Autorët bizantinë të shekullit XI i quajnë shqiptarët Αλβανιται ose Αρβανιται, emër i rrjedhur nga fjala Αλβανοι me të cilën Ptolemeu (150 e.s.) quan një fis shqiptar të Shqipërisë qëndrore, afër Elbasanit a Krujës.

1019 Vasili II, perandor i Lindjes (976 – 1025) nënshtron Bullgarët më 1014 dhe i dëbon nga Shqipëria më 1019.

1034 Bullgarët nënshtrojnë Durrësin e rrënojnë Nikopolin.

1059 Dyndja e Uzëve, popullsi serbe, në Epir.

1077 Gjenerali Nikephoros Bryenne ngrihet kundër perandorit bizantin dhe vetëshpallet perandor në Durrës.

1080 Normanët, nën udhëheqjen e Robert Guiskardit (1080 – 1085) pushtojnë një pjesë të madhe të Shqipërisë: Durrësin, Vlorën, Kasiopenë, Butrintin, Ohrin e Shkupin.

1081 Aleks Komneni I, perandor i Konstandinopojës (1081 – 1118) merr pjesë në mbrojtje të Durrësit kundër Normanëve, por i duhet të dorëzohet.

1083 Boemundi, i biri i Robert Guiskardit, pushton Artën dhe Janinën.

1084 Duke filluar nga ky vit, emri „Albania“ hyn në përdorim ndër kombe perëndimore për të treguar vendin e banuar nga shqiptarët.

1085 Aleks Komneni I përfiton nga vdekja e Robert Guiskardit (17 korrik) për të rifituar Durrësin, në marrëveshje me Venecianët e me Amalfitanët dhe ia lëshon sundimin Ioan Dukasit.

1107 Boemundi pushton Epirin dhe një pjesë të Maqedonisë.

1109 Bizantinët ripushtojnë Shqipërinë dhe e mbajnë deri më 1204.

1145 Ruggerio, i biri i mbretit të Napolit plaçkit Epirin.

1180 Pushtimi i krahinës së Shkodrës dhe Shqipërisë veriore nga ana e mbretit serb Stefan Nemanjit.

1185 Normanët shkelin në Epir, plaçkisin Janinën.

1204. Themelimi i despotatit të Epirit, nga ana e Mihail Komnenit I, despotati përfshin të tërë Shqipërinë jugore dhe familja e Komnenëve sundon deri më 1318.

1214 Theodor Komneni nënshtron Prilepin, Elbasanin, Ohrin e Durrësin.

1215 Durrësi pushtohet nga Venecianët të cilët themelojnë dukatin e Durrësit.

1230 Cari i Bullgarëve, Ivan Aseni I, ripushton Shqipërinë deri në Durrës.

1231 Theodor Komneni pushton Durrësin.

1253 Mihail Komneni II u lëshon Bizantinëve qytetet e Veleshit, Prilepit, Durrësit dhe Krujës, me gjithë rrethina.

1257 Mihail Komneni II me ndihmën e Shqiptarëve ripushton tokat që u lëshoi Bizantinëve.

1257 Durrësi e Berati me Shqipërinë qëndrore bien nën sundim të mbretit të Siçilisë.

1259 Princi Mihail Komneni II, i mundur nga Bizantinët, humbet tokat e tij në Maqedoni dhe Shqipëri të mesme.

1259 Martesa e Elenës, të bijës së princit Mihail Komneni II me princin Manfred të Puglias nga dera gjermane Hohenstaufen. Si pajë e nuses caktohet Shqipëria e mesme me Durrësin, Vlorën, Butrintin, Sopotin dhe Beratin.

1267 Princi Mihail Komneni II rifiton tokat e humbura duke luftuar kundër Bizantinëve më 1259.

1267 Charles d’Anjou, mbreti i Napolit pushton Shqipërinë e mesme dhe themelon «Regnum Albaniae», që mbetet në sundimin e familjes së tij deri më 1368.

1272 Charles d’Anjou pushton Durrësin që mbetet nën Anzhuinët deri më 1385.

1284 Charles II d’Anjou ia lëshon mbretërinë e Shqipërisë djalit të tij më të vogël, Filipit Anjou, princ i Tarantos.

1304 Perandori bizantin Androniku II Paleologu merr pjesë në shtypjen e kryengritjes së Epirotasve.

1318 Princat e familjes Orsini marrin në dorë despotatin e Epirit me Shqipërinë jugore (1318 – 1358).

1346 Stefan Dushan Nemanji, mundësi i Bizantinëve e i Bullgarëve kurorëzohet Car ose perandor i Serbëve, Shqiptarëve, Bullgarëve dhe Grekëve.

1355 Vdekja e Stefan Dushanit dhe shkatërrimi i perandorisë së tij. Shqipëria veriore ndahet në shumë principata të pavarura, kryesuar nga fisnikë vendas. Përmenden sidomos Balshat që sundojnë (1356 – 1421) në Shkodër, Tivar, Ulqin, Lezhë e rrethina. I njëjti fenomen ngjan edhe në Shqipëri të mesme e jugore, ku sundimi bie në dorë të bujarëve vendas.

1385 Shfaqja e parë e Turqve në Shqipëri nën sulltan Muratin I (1319 – 89).

1389 Beteja e Kosovës dhe shpartallimi i ushtrisë së krishterë serbo-bullgaro-shqiptare. Mbarimi i fuqisë sllave.

marre nga Ba Bai dhe revista KRITIKA © 2008