Firmat e ndërtimit përdorin substanca të rrezikshme, punëtorët, të pasiguruar
Nga Alketa Alia
Ministri i Punës, Çështjeve Sociale dhe Shanseve të Barabarta ka denoncuar dje mungesën e inspektorëve të punës në komisionin e dhënies së licencave për firmat. Ministri theksoi se ministria nuk mundet dot të kontrollojë zbatimin e licencave të dhëna për firmat e ndërtimit dhe të pastrimit, sipas të cilit, pengesë për këtë është marrëdhënia e vështirë institucionale. Gjithashtu, ai bëri të ditur se ka kërkuar hetim penal edhe për firmën ndërtuese që kryente punime në Shkollën Teknologjike në Tiranë, ku pas shkëputjes së tavanit humbën jetën 2 punëtorë. Pas aksidentit të ndodhur në Bankën Kombëtare Tregtare, Barka deklaroi se ministria, gjatë 2007-ës ka denoncuar penalisht 5 firma, ndaj të cilave nuk ka pasur asnjë reagim. Sipas Inspektoriatit Shtetëror të Punës, në analizës 1-vjeçare rezulton se numri i aksidenteve në punë kanë shënuar ulje në masën 24 %. Gjatë vitit të kaluar, numri i aksidenteve ishte 111 aksidente, nga të cilat 26 me pasojë vdekje. “Krahasuar me vitin 2006, ku numri i aksidenteve ishte 146, rezulton të kemi një ulje të numrit të aksidenteve në masën 24 %”, - bëri të ditur Miço. Të dhënat sipas ISHP-së tregojnë se aksidentet në punë përgjithësisht ndodhin nga mungesa e kushteve të punës, përdorimi i teknologjive të vjetra, moszbatimi i rregullave të sigurimit teknik dhe niveli i ulët i kualifikimit të punëmarrësve. Me këtë rast, ISHP iu kërkoi subjekteve që të marrin masat përkatëse për të siguruar kushtet e punës. Një prej masave që kërkon ISHP është ushtrimi i kontrolleve dhe inspektimeve, në mënyrë sistematike ndaj subjekteve, për të parandaluar aksidentet në punë si dhe sëmundjet profesionale. ISHP pohon se, nga kontrollet e kryera kanë rezultuar 165 subjekte që përdorin substanca të rrezikshme.

Në këto subjekte janë të punësuar 3 629 persona. Duke analizur këtë fakt, Drejtoria Qendrore e ISHP-së ka përgatitur për të orientuar drejtoritë rajonale “Kujtesë për substancat e rrezikshme, shoqëruar me listën e kimikateve dhe limitet e lejueshme për to”, - tha Miço. Kryeinspektori Miço pohoi se, vetëm 13 subjekte kanë shërbimin e mjekut të ndërmarrjes, duke akuzuar kështu Ministrinë e Shëndetësisë se nuk ka marrë ende masat e duhura për përgatitjet e mjekëve që t'i përgjigjen këtij lloj shërbimi. Lidhur me të dhënat e tjera të punës së ISHP-së rezulton se vitin e kaluar janë inspektuar 8 203 subjekte, ku krahasuar me vitin 2006 ka një rritje prej 12.7 % të subjekteve të inspektuara. Numri i punëmarrësve të evidentuar në subjektet e kontrolluara është 103 120 persona, ku karahasuar me dy vite më parë ka një rritje prej 28.7 % të numrit të tyre. Si rrjedhojë, vitin e kaluar informaliteti në punë ka shënuar ulje në masën 3.4 për qind. Gjatë vitit 2007 janë vendosur 253 gjoba në vlerën e 39. 796. 060 lekëve.

Në ndryshim me vitin 2006, në vitin e kaluar, mbi 80 % e tyre janë vendosur kryesisht për shkelje të legjislacionit të punës në drejtim të sigurisë e shëndetit në punë. ISHP delaron se, fenomeni i punësimit të të miturve nga mosha 16-18 vjeç ka pësuar ulje. “Ky fenomen i punësimit të të miturve, të cilët kanë mbrojtje të veçantë nga Kodi i Punës, po eliminohet nga ISHP-ja përmes rolit këshillues, kontrollues dhe sanksionues të punëdhënësve të subjekteve private, për masat që parashikon ligji për punësimin e fëmijëve”, - tha ai. Ministri i Punës, Çështjeve Sociale dhe Shanseve të Barabarta, Kosta Barka, deklaroi se, për subjektet që nuk zbatojnë ligjin nuk do të ketë asnjë tolerancë. “Tolerancë zero ndaj subjekteve që nuk zbatojnë legjislacionin në punë, pasi çdo shkelje mund të kushtojë jetë”, - tha ai.




Aksidentet në punë janë ulur në 24 %




Numri i aksidenteve në punë ka shënuar ulje në masën 24 %, sipas Inspektoriatit Shtetëror të Punës. Drejtuesi i kësaj strukture, Thoma Miço, gjatë analizës vjetore të punës tha dje se, viti 2007 numëron 111 aksidente, nga të cilat 26 me pasojë vdekje. Krahasuar me vitin 2006, ku numri i aksidenteve ishte 146, rezulton të kemi një ulje të numrit të aksidenteve në masën 24 %. "Ky rezultat i përfituar ka ndodhur në sajë të orientimit drejt inspektimit cilësor dhe efektiv të biznesit. Jemi fokusuar në ndarjen e bizneve të mëdha sipas llojit, numrit të punëmarrësve, shkallës së rrezikshmërisë të vendit të punës, etj., të cilat kanë sjellë rritjen e efektivitetit të inspektimit", - vlerësoi Miço, duke theksuar se, nga ana tjetër edhe vetë biznesi duhet të përmirësojë kushtet e punës. Të dhënat e ISHP-së tregojnë se aksidentet në punë përgjithësisht ndodhin nga mungesa e kushteve të punës, përdorimi i teknologjive të vjetra, moszbatimi i rregullave të sigurimit teknik, niveli i ulët i kualifikimit të punëmarrësve, për të cilat ISHP iu kërkon të gjitha subjekteve që të marrin masa. ISHP, institucioni që siguron zbatimin e legjislacionit të punës dhe në këtë kontekst, sigurinë dhe shëndetin në punë, në fokus të veprimtarisë së tij ka edhe masat për parandalimin e aksidenteve. Një prej masave që kërkon ISHP është ai i ushtrimit të kontrolleve dhe inspektimeve, në mënyrë që ato të jenë sistematike, rezultative dhe parandaluese për aksidentet në punë dhe sëmundjet profesionale. Qëllimi i inspektimeve, vuri në dukje Miço, "nuk është vënia e gjobave, por zbatimi i ligjit dhe ndërgjegjësimi i subjekteve për domosdoshmërinë e njohjes dhe zbatimit të Kodit të Punës". Ai u kërkoi inspektorëve që të vazhdojnë të evidentojnë nga afër të gjitha shkaqet e mundshme të aksidenteve dhe në bashkëpunim me institucione të tjera, të hartojnë raporte teknike sa me transparente. Duke paraqitur situatën e sigurisë se shëndetit në punë ai theksoi se, "në këtë drejtim jemi në hapat e para të punës dhe mbetet shumë për të bërë".




ISHP: Vetëm 685 fëmijë të pajisur me leje pune




Rreth 685 fëmijë të punësuar nën moshën 18 vjeç gjatë vitit të kaluar janë pajisur me leje pune dhe janë ndjekur me përparësi nga Inspektoriati Shtetëror i Punës (ISHP), u shpreh dje kryeinspektori Thoma Miço gjatë analizës vjetore të institucionit që ai drejton. "ISHP, përmes punës me kontrollet e ushtruara ka arritur të rrisë numrin e pajisjes me autorizim nga Inspektoriati i Punës për të miturit nga mosha 16-18 vjeç", - vlerësoi Miço, sipas të cilit, viti i kaluar ka shënuar përmirësim në drejtim të fenomenit të punësimit të fëmijëve. Në vitin 2006, ISHP evidentoi tendencën në rritje të punësimit të fëmijëve nën moshën 18 vjeç nga subjektet private, të cilat punësonin të miturit, duke iu falsifikuar të dhënat në dokumentin identifikues. Ky fenomen i punësimit të të miturve, të cilët kanë mbrojtje të veçantë nga Kodi i Punës, po eliminohet nga ISHP-ja përmes rolit këshillues, kontrollues dhe sanksionues të punëdhënësve të subjekteve private, për masat që parashikon ligji për punësimin e fëmijëve. Kodi i Punës në nenet 98, 99, 100, 103, si dhe një varg vendimesh të Këshillit të Ministrave dhe udhëzimesh të qeverisë, trajtojnë punësimin e femijëve nën moshën 18 vjeç, duke i marrë ata në mbrojtje. Sektorët ku konstatohet më shumë punësimi i të miturve është ai i rrobaqepsisë, prodhimit të këpucëve, hoteleri-turizëm, etj.
Gazeta Tema