Vendosur: 21/01/2008 - 11:10
• Pesë deputetët socialistë të përjashtuar për shkak të votimit të Bamir Topit president, pritet t’i bashkohen grupit parlamentar të PBDNJ-së.

Aristir Lumezi

Durim Lamaj, Durim Hushi, Bukurosh Stafa, Taulant Dedja dhe Hamit Kosta, do të regjistrohen sot, sipas të gjitha gjasave, si deputetë të grupit parlamentar të qendrës, duke iu larguar shumë programit nga i cili kanë marrë votat e socialistëve dhe të së majtës. Vetë kryetari i PBDNJ-së, Dule as e pohon dhe as e mohon një gjë të tillë duke ruajtur kofidencialitetin e këtij akti deri në momentin e fundit. Burime pranë deputetëve, pohuan se pozicionimi i tyre në qendër nuk është dalje në të kundërt të programit nga i cili elektorati i ka votuar, për shkak se edhe vetë PS-ja sot ka shumë elementë të djathtë në platformat e saj të shprehura në takimet e kryesocialistit Rama me elektoratin. Që prej përjashtimit të tyre nga grupi parlamentar socialist, ish-deputetët socialistë kanë qenë në mbështetje të vendimeve të opozitës, duke treguar se ata mbeteshin në gjirin opozitar. Por kjo ka ndodhur edhe për shkak se, deri pak kohë më parë, bëheshin përpjekje që ata të riintegroheshin në gjirin e PS-së. Vetëm një prej gjashtë votave socialiste për presidentin Topi, Paulin Sterkaj, e ka përcaktuar me kohë qëndrimin e tij në grupin parlamentar republikan. Lëvizja për Politikë Institucionale brenda PS-së kishte rritur shpresat e deputetëve të përjashtuar se pas përplasjeve me drejtuesit socialistë dhe qëndrimit të një grupi deputetësh ndaj mënyrës se si Rama po drejton PS-në, ky grup të zgjerohej edhe me deputetë të tjerë për të bërë të mundur një grup të ri parlamentar brenda të majtës. Por dështimi i platformës së kësaj lëvizje në Asamblenë e fundit Kombëtare, bëri që ajo të dobësohej mjaft dhe të shuante shpresat për shkëputjen e një grupi të konsiderueshëm deputetësh nga grupi parlamentar socialist drejt një grupi të ri parlamentare të majtë. Ka qenë ky momenti, që shënoi kthesën në strategjinë e pesë deputetëve që të pranonin një nga ofertat që ata kanë pasur nga grupet e tjera parlamentare. Duhet thënë se PS dhe PBDNJ kanë pasur një bashkëpunim mjaft të mirë. Madje dhe deputetët e saj Solis dhe Peçi, janë produkte të këtij bashkëpunimi, kryesisht gjatë periudhës që Nano ka qeverisur vendin në katërvjeçarin e dytë, 2001-2005. Por pranimi i një bashkëpunimi të tillë nga ish-deputetët socialistë me grupin parlamentar të PBDNJ-së ka sjellë dhe një tjetër qëndrim të kryetarit të kësaj partie, Vangjel Dule, i cili në mënyrë të përsëritur kërkon ndryshime në qeverinë “Berisha”. Një rikompozim i qeverisë, veçanërisht pas Samitit të Bukureshtit, do të rriste peshën specifike të këtij grupi parlamentar, tashmë të zgjeruar në qeverisje, duke bërë të ndryshonin dhe raportet e aleatëve brenda koalicionit maxhoritar.

Dule: Ndryshime të menjëhershme në qeveri

Pak ditë më parë, kryetari i Partisë Bashkimi për të Drejtat e Njeriut, Vangjel Dule, ritheksoi se kryeministri Berisha duhet të kryente në mënyrë të menjëhershme ndryshimet në qeveri. Sipas Dules, nëse këto ndryshime vonojnë të kryhen nga Berisha, atëherë në një kohë të dytë ato do të ishin të panevojshme. “Nëse edhe në ditët në vazhdim nuk do të ketë reagim nga kryeministri për ndryshime në qeveri, më vonë s’do kishte kuptim”, deklaroi kreu i PBDNJ-se, duke theksuar se ky ishte momenti më i përshtatshëm për ndryshime në kabinet. Sipas tij, sektorët më problematikë në vend janë ai i ekonomisë dhe energjetikës, duke lënë të kuptohet se duhet të zëvendësohej ministri i Ekonomisë dhe Energjetikës si dhe kreu i ministrisë që ka për detyrë mbledhjen e parave dhe mbajtjen nën kontroll të çmimeve dhe ekonomisë së vendit.

Panorama