Politika e re e Ramës, me metodat e vjetra të Berishës dhe Nanos


Nga Kastriot Myftaraj - Kryetari i PS, Edi Rama, para disa ditësh, në festën e FRESSH përsëriti refrenin e tij politik se ai do t’ i japë fund politikës së vjetër të politikanëve të vjetër, duke pasur parasysh në radhë të parë Sali Berishën dhe Fatos Nanon. E megjithatë Edi Rama po jep çdo ditë prova se ai përdor metodat më të këqija të politikanëve të vjetër Berisha dhe Nano, metoda me të cilat ata bënin dhe njëri prej tyre, Berisha, ende bën politikën e vjetër. Sigurisht që praktika më e keqe e politikës së vjetër të tranzicionit në Shqipëri, të trashëguar nga koha e komunizmit, dhe treguesi më i saktë i natyrës autokratike të politikanëve të vjetër, është se kur ata bëjnë veprime shumë të rëndësishme politike anëtarët e forumeve të larta të partisë së tyre, i mësojnë ato vetëm në cilësinë e telespektatorit, nga ekrani i televizorit të tyre. Kështu ka ndodhur me Berishën dhe me Nanon. Në këtë pikë Edi Rama nuk ndryshon shumë nga këta të dy. Lëvizja politike e fundit e Edi Ramës, propozimi për një pakt kombëtar për drejtësinë, ishte në traditën më të keqe autokratike të Berishës dhe të Nanos. Në rast se Rama do të ishte vërtet njeriu i politikës së re, atëherë ishte dashur që ky propozim të ishte bërë nga Rama duke folur në një mbledhje të forumeve të PS, të kryesisë ose të Asamblesë, dhe pasi të ishte shqyrtuar atje, të ishte formuluar dhe të dilte si qëndrim zyrtar i PS. Por nuk ndodhi kështu. Edhe një lëvizje tjetër shumë e rëndësishme politike e Ramës, para disa ditësh, shpallja e të famshmeve pesë Jo-ve të PS në lidhje me reformën zgjedhore, edhe pse kishte rëndësi shumë të madhe, se në tre prej tyre, kishte impakt shumë serioz në marrëdhëniet e PS me partitë e opozitës, duke rrezikuar në perspektivë koalicionin opozitar, megjithatë nuk u bë në një mbledhje të forumeve të PS, ku të hidhej si ide dhe pasi të shqyrtohej të shpallej si qëndrim zyrtar i partisë. Pesë Jo-të e famshme u shpallën në një intervistë të Edi Ramës në emisionin “5 pyetje nga Babaramo” në News-24. Kështu të krijohet përshtypja se Edi Rama u frymëzua nga titulli i emisionit të Babaramos, kur vuri numrin e Jo-ve të tij. Mirë që Edi Rama nuk jep intervista në gazetën e Fahri Balliut, se pastaj Rama do të kishte dalë me 55 “Jo” për reformën zgjedhore dhe kjo nuk do të mund të bëhej kurrë. Kur politikanët e vjetër Nano dhe Berisha i anashkalonin forumet e partisë, duke i vënë anëtarët e tyre në pozitën e telespektatorëve, këtë nuk e bënin se ishin aq të obseduar nga autokracia sa të nuk hiqnin dorë as nga detaji më i vogël i saj edhe në formë, kur mund ta sakrifikonin atë si diskrecion i domosdoshëm për mos t’ u kompromentuar si autokratë deri atje ku nuk ishte e nevojshme. Nano dhe Berisha e bënin këtë gjë se donin të afirmoheshin si interlokutorë të ndërkombëtarë para ndjekësve të tyre, por edhe vetë ndërkombëtarëve. Nano dhe Berisha e kishin mësuar sekretin e politikës, se ky protagonizëm politik, qoftë edhe me çmimin e dukjes autokrat, është i domosdoshëm për të fituar staturën e liderit dhe për të mbijetuar gjatë në politikë. Tekefundit ndërkombëtarët, duan si interlokutorë në vende si Shqipëria liderë të fortë, të cilët i kanë gjërat nën kontroll në partitë e tyre, si në kur vijnë në pushtet, dhe kjo nuk arrihet pa ushtruar një lloj autokracie. Edi Rama nuk mund t’ i shpëtojë këtij ligji të politikës shqiptare, dhe në fakt ai po vepron sipas tij, siç ka bërë dhe Nano para tij, dhe siç ka bërë dhe po vazhdon të bëjë Berisha. Ironikisht, në rastin e Ramës, nëse mund të flitet për një politikë të re, kjo ka të bëjë me atë se Rama po demonstron se ka aftësi autokratike që i kapërcejnë ato të Nanos dhe Berishës të marra së bashku. Rama është edhe më i rrezikshëm si autokrat se Nano dhe Berisha, se Rama shfaq simptoma të qarta të çrregullimeve psikike. Historia është plot me shembuj autokratësh me psikikë të çrregullt që ka shkaktuar katastrofa. Rama në pushtet mund të jetë një rast i tillë. Berisha dhe Nano kanë prodhuar konflikt dhe katastrofa në politikën dhe shoqërinë shqiptare, më tepër për shkak të përplasjes së forcave të kundërta ndërkombëtare. Por Nano dhe Berisha kanë ditur të frenohen në buzë të humnerës. Ndërsa Rama duket se e shijon katastrofën, ashtu si kolegu i vet piktor sadomazokist, Hitleri.