Plehrat, “dekori” i Edi Ramës që zbukuron qendrën e Tiranës

Wednesday, 23 January 2008

Plehrat, “dekori” i Edi Ramës që zbukuron qendrën e Tiranës Plehra

Bashkia e Tiranës, ka tashmë një problem serioz, me të cilin nuk po ballafaqohet më kreu i bashkisë Edi Rama, por qytetarët, të cilët e vujanë përditë në mjediset ku jetojnë dhe punojnë. Eshtë fjala për plehërat, të cilat kanë pushtuar tashmë gjithë mjediset e kryeqytetit. Prej mëse katër vjetësh, ky problem nuk po zgjidhet, përkundrazi, po bëhet më shqetësues.
Qendra e Tiranës, “qendër plehrash” që shtohen
Nga vëzhgimi i bërë dje në Tiranë, konstatuam se në pothuaj të gjithë mjediset në qendër të qytetit,pra brenda unazës mjediset publike ishin të mbushur me plehëra. Tek Stacioni i Trenit, plehërat pastrohen 1 herë në javë. Aty hidhen gjithë mbeturinat e familjeve dhe sidomos të tregut, të cilat përbëjnë një volum të madh mbetjesh ndotëse. Po kështu, mbrapa selisë së Kryeministrisë, pra ngjitur me Qendrën Ndërkombëtare të Kulturës hidhen dhe mbeten aty prej disa ditësh e javësh, sasi të mëdha mbeturinash të cilat nuk pastrohen. Të pa evaduara, janë plehërat prej mëse 10 ditësh, përballë hyrjes së zyrave të Postës Qëndrore. Pamje e tillë, me mbeturina që nuk pastrohen është dhe në rrugën e “Kavajës”. E ngarkuar ishte situata e plehërave që nuk pastrohen, tek qyteti i nxënësve, në bllokun e pallateve tek Tirana e Re, tek blloku i pallateve tek Parku, tek rruga e “Durrësit”, tek fakulteti Ekonomik, tek qyteti “Studenti”, tek drejtoria e përgjithëshme e Burgjeve, tek selia e PD, tek blloku Vasil Shanto, tek rruga “Myslim Shyri” etj., etj. Madje edhe pas ndërtesës së ministrisë së Kulturës dhe tek dera e ish-kësaj ministrie, ka një grumbull të madh plehërash. Edhe pas selisë së Kryesisë së Kuvendit të Shqipërisë, ka sasi të mëdha plehërash dhe këto pastrohen 1 herë në 10-15 ditë. Pamjet janë vërtetë trishtuese e shqetësuese, jo vetëm për “dekorin” e qelbur që bashkia dhe kreu i saj Edi Rama ka krijuar për kryeqytetin, por së pari, për shëndetin e qytetarëve, sepse ato tashmë dihet, që janë burim infeksioni dhe vatra epidemie. Ndërsa në periferi, si në lagjet Kinostudio, në rrugën “Bajram Curri”, në Don Bosko, në Brakë, në Laprakë, në Selitë, në rruga e “Elbasanit”, tek “Sheshi Avni Rustemi”, tek tregu i Medresesë, madje dhe brenda qendrës spitalore “Nënë Tereza”, plehërat janë prezent dhe masivisht në çdo kohë. Situata është e renduar. Sipas burimeve nga bashkia, në Tiranë “prodhohen” afro 2000 ton plehëra në ditë, ndërkohë që një vit më parë, kjo sasi ishte vetëm 1200 ton. Mirëpo kjo situatë, nuk ka lidhje me volumin e mbetjeve, por me lënien e këtij shërbimi jashtë vëmëndjes. Kreu i bashkisë së Tiranës, shkon përuron rrugica e ndonjë trotuar në lagjet e Tiranës, por pas prerjes së shiritit, këto mbulohen nga plehërat.
Fondet janë tejkaluar tre herë, plehërat pastrohen tre herë në muaj
Sipas burimeve konfidenciale nga bashkia e Tiranës, me inciativën private të kryetarit të Bashkisë, Edi Rama, janë tejkaluar me tre herë fondet për pastrimin e Tiranës. Jo se ka patur motiv pune, por sepse nën këtë justifikim ka patur motiv abuzimi me fondet e akorduara. E megjithatë, plehërat nuk pastrohen. Sipas urdhërit privat të kryetarit Rama, pastrimi i plehrave, duhet të nis në orën 24.00 dhe të përfundoj në orën 05.00, mirëpo por kjo nuk po ndodh. Bashkia nuk kontrollon, madje as nuk shqetësohet për këtë ndotje masive. Mjafton të shikosh në mëngjes rrugët e Tiranës dhe konstaton, se ato janë gjithë plehëra, të papastruara, të pafshira. Bashkia paguan punonjës pastrimi rrugësh, por nuk ka pastërti. Bashkia jep edhe tre herë më shumë fonde për tenderat e pastrimit, mirëpo plehërat në lagjet, pallatet dhe rrugët e Tiranës janë bërë “kodrina”. Vetëm për koshat e plehërave, janë akorduar 10 herë fonde suplementare dhe ato mungojnë në afro 40% të pikave të hedhjes së mbeturinave që ka përcaktuar bashkia.

Gazeta Sot

Plehrat, “dekori” i Edi Ramës që zbukuron qendrën e Tiranës

Plehrat, “dekori” i Edi Ramës që zbukuron qendrën e Tiranës

Plehrat, “dekori” i Edi Ramës që zbukuron qendrën e Tiranës :: Komentet