Topi sot në Prishtinë, delegacioni me 100 anëtarë

Nga Tema

Në Prishtinë janë po bërë përgatitjet e fundit për pritjen e presidentit shqiptar, Bamir Topi, i cili fillon sot një vizitë triditëshe në Kosovë. Presidenti i Shqipërisë shoqërohet gjatë vizitës në Kosovë nga një delegacion 100 anëtarësh. Pjesëtarë të delegacionit do të jenë anëtarë të qeverisë, deputetë të parlamentit, përfaqësues të opozitës, të pushtetit lokal dhe figura të shkencës dhe akademisë. Vizita e presidentit Topi në Kosovë bëhet në kohën kur udhëheqësit kosovarë po koordinojnë me faktorin ndërkombëtar datën e shpalljes së pavarësisë së Kosovës. Vizita që nis sot është e para e presidentit Topi në Kosovë. Shefi i zyrës së Shqipërisë, Arben Çejku, ka thënë për BBC-në se kjo vizitë do t'i kontribuojë jo vetëm marrëdhënieve të Shqipërisë me Kosovën, por njëkohësisht edhe një realiteti të ri evropian. Çejku shtoi se presidenti Topi do ta vërë theksin gjatë vizitës "tek nevoja e një zgjidhjeje të shpejtë për popullin e Kosovës, për pavarësinë e Kosovës". Por ai shtoi se presidenti i Shqipërisë do të nënvizojë dhe rëndësinë e marrëdhënieve ndërtenike në Kosovë dhe më gjerë. Topi do të jetë për tri ditë në Prishtinë, ndërsa kjo konsiderohet edhe si vizita më e rëndësishme në pragh të shpalljes së Pavarësisë nga Kuvendi i Kosovës.

Tema