Topi u debat me serbet dhe greket

Topi debat me serbët e grekët për Kosovën e çështjen çame

ALBANA LIKA

24/01/2008 Presidenti Topi parashtron mundësitë integruese të Shqipërisë

Presidenti i Republikës, Bamir Topi, ka shprehur bindjen e tij para anëtarëve të Asamblesë Parlamentare të Këshillit të Evropës se Shqipëria e meriton të marrë nga Samiti i Bukureshtit ftesën e anëtarësimit në NATO. I pranishëm në punimet e kësaj Asambleje, në përbërje të së cilës janë 47 vende, kreu i shtetit shqiptar ka renditur përpjekjet që ka bërë Shqipëria dhe forcat politike në vend për t’u bërë anëtare të strukturave euroatlantike. Në këtë kontekst, ai ka përmendur përpjekjet e tij për të nxitur forcat politike, si dhe ka premtuar angazhimin e tij për proces në vazhdimësi, përfshirë këtu edhe për çështjen e Kosovës.

Integrimi

Në fjalën e tij, numri një i shtetit shqiptar ka shprehur interesin e Shqipërisë ndaj diskutimeve ndërmjet Bashkimit Evropian dhe NATO-s mbi çështjet e sigurisë. Presidenti Topi vlerësoi adoptimin e strategjisë së sigurimit evropian si një strategji që do të aftësojë BE-në të përballojë kërcënimet dhe ndryshimet globale. Nga ana tjetër, në këtë kontekst, ai tha se Shqipëria është e vendosur të anëtarësohet në NATO. “Shqipëria shpreson shumë të marrë ftesën e saj në Samitin e ardhshëm të Bukureshtit. Gjykoj se ne e meritojmë një ftesë të tillë. Në historinë e anëtarësimit drejt NATO-s, Shqipëria jep shembullin e rrallë, ku të gjitha forcat politike janë në konsensus të plotë, të gjithë faktorët joqeveritarë, të gjitha grupet shoqërore, të gjitha mediat dhe i gjithë opinioni publik mbështesin këtë anëtarësim”, theksoi Topi. Anëtarësimi i Shqipërisë në NATO, vijoi ai, do të shtrijë jo vetëm shkallën e sigurisë rajonale, evropiane e globale, por do të japë shembullin pozitiv të fitores së demokracisë në vendin tonë. Për sa i përket të ardhmes evropiane, Presidenti i Republikës së Shqipërisë tha se unifikimi i Evropës nuk do të jetë i plotë, derisa të gjitha vendet e procesit të Stabilizim Asociimit të bëhen anëtare të Bashkimit Evropian dhe derisa Evropa të jetë e bashkuar në kufijtë e saj gjeografikë. “Në emër të qytetarëve të Republikës së Shqipërisë, ju sjell këtu jo vetëm vullnetin politik të klasës politike shqiptare, por edhe zërin, mesazhin dhe aspiratën evropiane të popullit shqiptar. Jemi duke punuar me seriozitetin më të madh për zbatimin nen për nen, kapitull për kapitull, të MSA-së, me synimin për të kërkuar më pas statusin e vendit kandidat, në mënyrë që ta meritojmë këtë proces të pandalshëm e të pakthyeshëm”, nënvizoi ai.

Sfidat

Në fillim të fjalimit të tij, Kreu i Shtetit shqiptar përmendi prioritetet e qeverisë shqiptare, institucioneve të shtetit shqiptar, si dhe vullnetin pozitiv të politikës shqiptare. “Integrimi i Shqipërisë në BE është prioritet kombëtar dhe qëllim strategjik i politikës së jashtme të vendit tim. Si rrallë ndonjëherë, për këtë çështje ekziston një konsensus i plotë politik në Shqipëri, ashtu edhe një mbështetje e konsiderueshme e opinionit publik shqiptar”, tha ai. Topi përmendi punën mbi reformën në administratën publike, harmonizimin e legjislacionit dhe përfshirjen e të gjithë potencialit tonë në rregullimin, modifikimin, ndryshimin e sistemit të drejtësisë dhe të Kodit Zgjedhor. “Ne e shikojmë këtë detyrë gjithnjë e më pak si një barrë dhe më tepër si një detyrë dhe mision, mbi të cilin ne duhet të punojmë me vendosmëri, për të arritur sa më shpejt të jetë e mundur standardet evropiane” përfundoi Presidenti.

Kryetari i shtetit rithekson qëndrimin e Tiranës zyrtare për pavarësi

Kosova, të zbatohet Paketa Ahtisari

Çështja e pavarësisë së Kosovës ishte një ndër shqetësimet kryesore të Presidentit Topi, shprehur para anëtarëve të Asamblesë Parlamentare të Këshillit të Evropës. Në referimin e tij, ai përsëriti bindjen e Shqipërisë se vetëm një Kosovë e pavarur dhe demokratike, brenda kufijve të tanishëm, e orientuar drejt integrimit euroatlantik, është zgjidhja më e drejtë dhe më e qëndrueshme, faktor stabiliteti, paqeje e begatie për rajonin e Ballkanit e më gjerë. “Republika e Shqipërisë vlerëson se zgjidhja e qartë dhe e shpejtë e statusit të Kosovës, që është pavarësia e saj, është një domosdoshmëri që diktohet jo vetëm nga realiteti në Kosovë, por edhe nga interesat e stabilitetit dhe të sigurisë afatgjatë në rajon. Paketa e Presidentit Ahtisari është e vetmja alternativë e mundshme kompromisi, për një rast unik siç është Kosova, që ofron një zgjidhje realiste, të drejtë, të balancuar, të qëndrueshme e afatgjatë, ofron standardet më të larta për minoritetet në Kosovë, që gëzon mbështetjen e ndërkombëtarëve”, theksoi Topi për këtë çështje. Në këtë kontekst, ai dënoi çdo përpjekje për ndarje, që sipas tij do të shërbente për ringjalljen e nacionalizmave në Ballkan. “Shqipëria është e vendosur të respektojë plotësisht kufijtë ndërkombëtarë të fqinjëve, përfshirë edhe kufijtë e Kosovës”, vijoi ai. Duke iu drejtuar dëgjuesve, Kreu i Shtetit shqiptar u sugjeroi Bashkimit Evropian, NATO-s dhe Shtetet e Bashkuara të Amerikës të marrin menjëherë iniciativën diplomatike për zbatimin e Paketës Ahtisari dhe krijimit të kushteve, në mënyrë që shteti i ri i Kosovës të përfshihet në familjen e kombeve. Sugjerimi i tij, siç theksoi vetë Topi, vlen në rast se zgjidhja nëpërmjet Këshillit të Sigurimit të Organizatës së Kombeve të Bashkuara dështon. Në përfundim të fjalës së tij për gati një orë, Presidenti i shqiptarëve nuk la pa përmendur as përvojën e shkëlqyer të bashkëjetesës fetare, që sipas tij mund të pasurojë kontributin e të gjithëve. “Bashkëjetesa midis dy besimeve, islamizmit dhe krishterimit, në Shqipëri është jo vetëm shembull i gjallë unik, por edhe një përvojë shpresëngjallëse dhe optimiste. Ajo mund të kontribuojë në përgatitjen dhe zbatimin e programeve dhe objektivave politiko-strategjike për një Evropë të lirë, pa konflikte dhe paragjykime fetare apo etnike, apo për një botë ku civilizimet mund të prodhojnë vetëm vlera dhe jo gjakderdhje për popujt e tyre.

Topi u debat me serbet dhe greket

Topi u debat me serbet dhe greket

Topi u debat me serbet dhe greket :: Komentet