Tiranë -Presidenti i Republikës Bamir Topi, ka preferuar që të mos e dekretojë, por as të mos e kthejë sërish në Parlament ligjin e hapjes së dosjeve. Afati i fundit kur kreu i shtetit mund të vendoste rreth ligjit të miratuar nga deputetët, ka qenë ora 16:00 e së mërkurës. Presidenti Topi edhe pas konsultimeve të shumta, duket se nuk është ende i qartë se çfarë duhet të bëjë me një ligj të tillë. Megjithëse rikthimi në Parlament, do të ishte vetëm humbje kohe, pasi kryeministri Berisha ka paralajmëruar se do ta miratonte sërish këtë ligj pa ndryshuar asnjë nen të tij.

Rimiratimi nga ana e Parlamentit, e fuqizon menjëherë ligjin në fjalë, edhe pa firmën e dekretimit nga ana e presidentit. Misionet diplomatike perëndimore në Tiranë dhe veçanërisht ambasada amerikane e kanë kundërshtuar këtë ligj, që sipas tyre shkel Kushtetutën e vendit.

Ligji është kundërshtuar ashpër edhe nga partitë e opozitës. Gjithsesi, grupet e interesit, veçanërisht ish-të përndjekurit politikë i kanë kërkuar presidentit Topi që të dekretonte ligjin e propozuar dhe miratuar nga maxhoranca në pushtet.

Start