Zgjedhjet presidenciale dhe lokale mbahen në Mars
Partitë politike në Maqedoni dhe kandidatët e pavarur për president vazhdojnë përpjekjet e tyre për të siguruar të drejtën për të hyrë në garën për president, por edhe për të forcuar pozicionet e tyre në pushtetin vendor.
Në garat për president do të hynë katër kandidatë shqiptarë.

Agron Buxhaku, Mirushe Hoxha, Imer Selmani dhe Nevzat Halili janë katër kandidatët shqiptarë.

Kandidaturës së Imer Selmanit përveç partisë së tij, Demokracia e Re, mbështetje do t'i japë edhe Bashkimi Demokratik Kombëtar me kryetar, Hysni Shaqirin.

Ndërkaq, kandidaturën e Nevzat Halitit i cili për vete thotë se është kryetar i Kuvendit të Republikës së Iliridës, do ta mbështesë edhe Partia e Prosperitetit Demokratik, kryetar i parë i së cilës ka qenë vetë zoti Halili.

Dy partitë më të mëdha politike BDI dhe PDSH në zgjedhjet presidenciale dhe vendore do të dalin pa formuar koalicion me ndonjë parti tjetër politike shqiptare.

Këto dy parti përveç që kanë kandidatë për postin e presidentit do të propozojnë kandidatët e tyre edhe në mbi 20 komuna ku ka votues shqiptarë, në shumicën e të cilëve mund të fitohet edhe posti i kryetarit të komunës.

Partitë më të vogla politike shqiptare, si Partia e Prosperitetit Demokratik, Demokracia e Re si dhe Bashkimi Demokratik Kombëtar do të garojnë në numër të caktuar të komunave.

Ndërsa Bashkimi Demokratik Shqiptar me kryetar, Bardhyl Mahmutin nuk nuk do të hyjë në këto zgjedhje me arsyetim se në Maqedoni nuk ka klimë të mjaftueshme demokratike për të realizuar zgjedhje të lira, demokratike dhe të ndershme.

Zgjedhjet presidenciale dhe vendore të cilat do të mbahen me 22 mars të këtij viti janë të një rëndësie të veçantë për proceset eurointegruese të Maqedonisë.

Për këtë dëshmon edhe fakti se OSBE-ODIHR do ta shtojë numrin e vëzhguesve të saj të cilët do ta monitorojnë procesin zgjedhor.

Kjo ndodh për faktin se zgjedhjet e parakohshme parlamentare të vitit të kaluar u karakerizuan për incidentet e shumta zgjedhore.

Diplomatët perëndimorë po ushtrojnë presion ndaj autoriteteve në Shkup si dhe politikanëve që të mos përsëriten incidentet e zgjedhjeve të kaluara, të cilat, sipas tyre do të rrezikonin të ardhmen evropiane të Maqedonisë.
BBC