Maqedonia shtyn vendimin për vizat

Nga Tema

Drejtoria e Përgjithshme e Policisë së Shtetit njoftoi dje në orët e vona, se nuk do të ketë ndryshim të regjimit të vizave me Maqedoninë. “Drejtoria e Përgjithshme e Policisë së Shtetit njofton se, nga kontaktet e orëve të fundit të marra me autoritetet maqedonase, të gjithë shtetasit shqiptarë që udhëtojnë në drejtim të Maqedonisë vizën do ta marrin sipas regjimit të mëparshëm të vizave, pra në kufi. Kjo deri në përfundim të negociatave ndërmjet dy shteteve”, - thuhet në një njoftim të saj.
Pak orë më parë drejtoria kishte njoftuar se të gjithë qytetarët që do të udhëtonin në drejtim të Maqedonisë, duke filluar nga data e sotme, datë 01.02.2008, duhej të pajiseshin me viza pranë ambasadës maqedonase në Tiranë.
“Ritheksojmë edhe njëherë që vizat nuk lëshohen më në pikat kufitare të shtetasit maqedon, por vetëm në ambasadën e saj në Tiranë. Shtetasit që nuk janë pajisur me vizë pranë kësaj ambasade nuk do të lejohen të kalojnë në drejtim të Maqedonisë”, - thuhej në njoftim.