Përshëndetje! Po ulem këtu afër teje besoj se është i lirë ky vend. Ditë e bukur sot apo jo? Më në fund pushoi ai shi i mërzitshëm. Shiko se ç'fytyra të lumtura! Ah, jam shumë i qetë... Më në fund po kthehem në shtëpi. A mund të të bëj një pyetje? (heshtje).
A mund të të pyes për diçka? Desha të të bëja një pyetje, a mundem?Hej! Jam këtu dëgjon? Alo? Hej! Ku je? Në këtë botë? Hej po flas unë këtu, a mundesh për respekt të më shohësh kur të flas? Hej me ty po flas! Ke ndërmend të më çmendesh? Ou jam këtu, hej ktheje vetëm një herë kokën të paktën! O njeri ti për të cilin një zemër filtron gjak! Hej a mund ta ngresh atë dreq koke të të them diçka të vogël? Sa nervozues! Hej se më hipe gjakun në kokë a mund të më shohësh në sy dhe të dëgjosh kot sa për tu tallur këtë që po të them??? Ej ti, o qenie! Ç'dreqin je! O idiot! O njeri koti, o ç'dreq njeriu them unë! O gjallesë! Ktheje atë të bekuar koke një herë dhe dëgjo. Çfarë keni ju të tjerët që shihni? Ka ndonjë gjë për të parë këtu? Vazhdoni jetën tuaj! Çfarë, ju duket vetja më të kulturuar se unë! Nuk mund të jetojë i qetë njeriu këtu se nuk le njeri pa u marrë me jetën tënde. A e di çfarë është interesante? Të gjithë merren me jetën e të gjithëve, por askush me të vetën! O qiell, çfarë bote! A mund të mos më shihni ju lutem, se po më hipin nervat keq! Po ju lutem në rregull? Çfarë dreqin doni të më lini të qetë? Doni para? Na merrini, merrini dhe mu zhdukni! Ikni më lini vetëm me këtë jetë që kam. Vetëm se po më merrni frymën nuk guxoj të nxjerr kokën në dritare se më vërsulni sytë menjëherë. Çfarë doni prej meje?! Të gjitha paratë që pata ju dhashë, na merrni portofolin, merrni celularin, çelsat e shtëpisë, merrini të gjitha dhe mu shporrni se nuk po më lini rehat! Largohuni në djall, largohuni se do ju vras! Largohuni ju lutem. Po ti çfarë dreqin ke që nuk më përgjigjesh? Ngriji pra ato sy për një minute dhe dëgjo këtë të mallkuar fjale, që do të të them! djall o punë! Hej ju lutem nuk dua që të kapërcej veten, a e ke mirësjelljen për një çast të vogël të mos më shihni? Ju çfarë, më shatë? Mos ndoshta më thatë se jam një i çmendur? Ha ha ha ha maskarenj! Shkoni pra, më lini në çmendurinë time! Ikni pra dreqi t'ju hajë që nuk ju ha kurrë! Unë jam i çmendur, por ju jeni patetikë, jeni të dështuar, jeni të vdekur, mizorë dhe të dalë mode me këto veshje të kalbura që vijnë erë myk! Mbytuni në atë det atje, shkoni pra mos u lani në breg, por mbytuni! Mallkuar qofshi! Pse nuk ikni??? Ju urdhërova të ikni dhe të shporreni dhe të vdisni dhe të varroseni të kalbeni dhe të shporreni prej jetës sime derisa unë të vdes të varrosem dhe të kalbem. O mallkim do të jemi përsëri bashkë. E shikoni? Ju nuk më ndaheni kurrë! Aq shumë më doni??? Unë ju urrej! Ikni o çfarë t'ju them unë, ikni o fantazma, ikni o dështakë, o ujqër, o vampirë jete, ikni se po më vdisni fare! Çfarë doni prej meje? Nuk kam më asgjë, ato që kisha jua dhashë epo jetën nuk jua jap! Po shkoni ore se më vdiqët. Po pse më shihni ashtu? Pse nuk ikni? Ej, ti, shofer, ndalë këtë të mallkuar makinë të dal që këtu para se të çmendem vërtet me këta njerëz që ta shpifin! Çfarë? Çfarë thatë? Ato nuk mund të më dëgjojnë? E pse? Nuk mund të më dëgjojnë? Jo nuk kam mundësi! Unë kam një orë që po çirrem këtu dhe tani më thoni që nuk dëgjojnë? Nuk është e mundur! Dreqi ta hajë! Ku jam kështu?! Oh perëndi! Kushedi se si u jam dukur unë këtyre! E dini çfarë? Me këtë heshtjen tuaj ju mund të çmendni edhe njeriun më të durueshëm. T'ju them edhe diçka tjetër? Të paktën ju nuk dëgjoni vërtetë!
Tirana Observer