TIRANË- Shtabi i Emergjencave Civile garanton se janë marrë të gjitha masat për të ndihmuar me materiale dhe ushqime banorët e dëmtuar.
Sipas burimeve zyrtare nga Ministria e Brendshme, Drejtoria e Përgjithshme e Emergjencave Civile, në bashkëpunim me drejtues të pushtetit vendor, po bën verifikimet e dëmeve të shkaktuara nga tërmeti në qarkun e Dibrës.
Aktualisht mësohet se është gati ndihma që do të nevojitet në materiale dhe ushqime për banorët e dëmtuar. "Ministria e Brendshme ka vënë në dispozicion edhe dy helikopterë për transportin e ndihmave për banorët e kësaj zone"- thonë të njëjtat burime.
Të dhënat paraprake për pasojat e tërmetit raportojnë për dëme materiale, por jo njerëz të lënduar. "Janë konstatuar disa shtëpi të dëmtuara plotësisht në komunën e Gjoricës dhe Ostrenit si dhe dëmtime të rënda e të lehta në disa banesa në komunat Gjoricë, Shupenzë, Ostren dhe Trebisht, në qarkun e Dibrës"- thanë burimet ministrore.
Zyrtarisht konfirmohet se dje në orën 23: 49 u regjistrua një tërmet i fortë me magnitudë 5.2 Shkalla Rihter, me epiqendër në koordinatat 41.51 veri dhe 20.50 lindje, koordinata këto që i përkasin zonës midis fshatrave Shupenzë dhe Gjoricë e Sipërm, të Qarkut të Dibrës. Lëkundjet e tërmetit janë ndjerë në zonën veriore si dhe atë të qendrore të vendit, përfshi Tiranën.


11.00
Tërmeti 7 ballë në Peshkopi, një fëmijë i lënduar. Mblidhet Shtabi i Emergjencës
DIBER- Mblidhet Shtabit i Emergjencës për të bërë bilancin e dëmeve dhe planin e masave që do të merren në ndihmë të banorëve, shtëpitë e të cilëve janë dëmtuar nga tërmeti i fuqishëm që u regjistrua mbrëmë vone.
Sipas të dhënave të para, një fëmije është lënduar si pasojë e tërmetit. Për të është raportuar gjatë mbledhjes së Shtabit të Emergjencës nga kryetari i komunës Tomin. Ai ka thënë se fëmija i lënduar është nga fshati Catush dhe aktualisht ndodhet i shtruar në spitalin e Peshkopisë, por gjendja e tij nuk paraqitet e rëndë për jetën.

Sipas qendrës sizmologjike tërmeti ka qenë me magnitudë 5.2 shkalla Rihter dhe
intensitet në epiqendër mbi 7 ballë. Të paktën 59 lëkundje me intensitet të vogël janë shënuar pas lëkundjes së parë që u regjistrua 19 km në juglindje të qytetit të Peshkopisë, në verilindje të vendit. Sipas Institutit Sizmiologjik, lëkundja e fundit është shënuar në orën 06.30 minuta të mëngjesit të sotëm në fshatin Gjoricë.
Lëkundje të forta janë ndjerë në qytete të tjera, Shkodër, Tiranë, Durrës, Elbasan, Kavajë, Berat.

Lëkundja e parë është regjistruar në orën 23.49 të natës dhe ka zgjatur rreth 15 sekonda.
Për fat nuk ka të dhëna për persona të lënduar, ndërkohë që dëmet kanë qenë të shumta, sidomos rreth epiqendrës. Kështu mësohet se në fshatrat e Peshkopisë shumë shtëpi janë plasaritur, ndërkohë që të tjera janë bërë thuajse të pabanueshme.
Dëme ka pasur në Bulqizë, në Shupenzë, Ostren, Zergan dhe Gollobordë, zona ku gjatë natës ka munguar edhe energjia elektrike.
Në Tiranë lëkundja është ndjerë deri në 5.4 ballë, ndërkohë që paniku ka mbërthyer sidomos banorët e kateve të sipërme të pallateve.
shekulli