Vetëm nga fitorja me Qipron, Shqipëria grumbulloi 13 pikë
Renditja botërore kryesohet nga Brazili dhe më pas Spanja
Kombëtarja shqiptare e futbollit fiton 1 pozicion në renditjen e FIFA-s për këtë muaj, duke u gjendur në vendin e 93-të, në kuotën e 360 pikëve. Kjo renditje u publikua dije, kur FIFA shpalli në faqen e saj zyrtare klasifikimin e skuadrave përfaqësuese për muajin shtator. Shqipëria është renditur në vendin e 41-të në renditjen e përfaqësueseve të UEFA-s, duke mos ndryshuar pozicion nga renditja e muajit të kaluar. Gjatë periudhës nga 5 gusht deri në 2 shtator, kombëtarja shqiptare e futbollit ka zhvilluar vetëm takimin miqësor në 1 gusht me Qipron, ku fitoi me rezultatin e thellë 6-1 dhe për rrjedhojë ka fituar 13 pikë nga ky rezultat. Kundërshtarët e Shqipërisë në eliminatoret e Botërorit “Afrika e Jugut 2010”, nuk kanë pasur ndryshime të mëdha këtë muaj. Portugalia renditet në vendin e 17-të me 880 pikë, duke mos ndryshuar pozicionin nga muaji i kaluar. Kryesuesja e grupit 1 në eliminatoret e Botërorit “Afrika e Jugut 2010”, si dhe kundërshtarja e radhës së Shqipërisë në 9 shtator, Danimarka, ka humbur një pozicion duke u renditur në vendin e 16-të me një kuotë prej 892 pikësh. Suedia, është renditur në vendin e 41-të me 723 pikë duke mos ndryshuar pozicion nga renditja e muajit të kaluar. Hungaria është renditur në vendin e 47 me 669 pikë duke humbur 4 pozicione nga muaji kaluar. Kundërshtari i vetëm, i renditur më poshtë se kombëtarja Shqiptare, është Malta, e cila është renditur në vendi e 140 në kuotën e 166 pikëve, duke fituar 6 pozicione nga renditja e muajit të kaluar. Rezultatin më të mirë në renditjen e FIFA-s Shqipëria ka arritur në gusht të vitit 2006, ku pozicionohej e 62-ta, ndërsa rezultati më i ulët, në gusht të vitit 1997, kur u rendit në vendin e 124-t. Në krye të renditjes botërore të FIFA-s nuk ka pasur asnjë ndryshim. Tashmë kjo renditje kryesohet me 1604 pikë nga përfaqësuesja e Brazilit. Kombëtarja Spanjolle, kampionia e Evropës, gjendet në vendin e dytë, në kuotën e 1588 pikëve. Ndërkohë që Holanda renditet në vendin e tretë në kuotën e 1376 pikëve.
Ndeshjen me Danimarkën, kombëtarja synon rezultate të mira.
Shqipëria i ka të gjitha mundësitë të dalë nga fusha e “Qemal Stafës” me një rezultat pozitiv në ndeshjen kundër Danimarkës. Në këtë mënyrë janë shprehur dy mesfushorët e skuadrës kuqezi, Klodian Duro dhe Elvin Bulku, të cilët kanë bërë të ditur se ekipi i drejtuar nga Kuzhe do të luajë shanset e veta ndaj kryesueseve të grupit 1 eliminator të Botërorit 2010. "Normalisht që Danimarka jo më kot është kryesuese e grupit tonë, jo se ka fituar vetëm kundra nesh, por e ka bërë këtë gjë dhe ndaj gjithë ekipeve të tjera në grup. Kjo ndeshje vjen pas një periudhe tjetër nga ndeshja e parë të cilën lozëm në Danimarkë, dhe unë mendoj që kjo gjendje e mirë e ekipit dhe ky entuziazëm të bashkëngjitet dhe me një lojë të mirë dhe me një rezultat pozitiv në ndeshjen me Danimarkën", thotë Klodian Duro, mesfushor i kombëtares."Ne shpresojmë që të bëjmë më të mirën në këtë ndeshje, dhe të vazhdojmë atë ecuri pozitive që kemi nisur me trajnerin dhe që të jemi sa më të gatshëm. Jemi përpara publikut tonë dhe mundohemi tu japim atyre më të mirën si në rezultat, dhe në lojë", tha Elvin Bulku, mesfushor i kombëtares. Kombëtarja e Shqipërisë ka vijuar edhe dije përgatitjet nën drejtimin e trajnerit Josip Kuzhe, i cili ka preferuar të ketë një grumbullim të gjatë me skuadrën, në prag të sfidës kundër Danimarkës, e cila është e parafundit në këtë fushatë eliminatore të Botërorit 2010.
Hertnagel: Salihi, një sulmues cilësor
Drejtori sportiv i Rapidit të Vjenës, Alfred Hertenagel vlerëson blerjen më të fundit të tij. Kalimi i Hamdi Salihit në radhët e Rapidit të Vjenës është pritur mirë nga drejtuesit e lartë të klubit gjigand austriak, tek i cili do të mbështesë edhe shpresat e tyre për sezonin e ri. Sulmuesi shqiptar kërkohej që prej dy vitesh e gjysmë nga trajneri Peter Pakult. “Salihi ka cilësi të mira si golashënues, ai është shumë i pranishëm në zonë dhe paraqet rrezikshmëri për kundërshtarët, pasi është shumë efikas”,- ka saktësuar drejtori sportiv i Rapidit, i cili beson shumë te sulmuesi i ri. Por megjithatë, ende nuk është i sigurt vendi i Salihit në formacionin e parë. Sulmuesit e tjerë, Nikica Jelaviç, Rene Gartler, Mario Konrad dhe Kristofer Trimel do të luftojnë me shqiptarin për një vend në 11-she. “Do të kemi një konkurrencë të madhe në sulm”,- pohon drejtori sportiv, Hertnagel.
Kristaq Mile, trajneri i ri i Shkumbinit
Kristaq Mile është trajneri i ri i Shkumbinit. Lajmi u zyrtarizua për televizionin informativ “Ora News” nga sekretari i klubit peqinas, Astrit Isai. Tekniku i njohur beratas do të pasojë Gugash Maganin, ky fundit dha dorëheqjen pas barazimit të Shkumbinit me Gramozin(0-0)në Ersekë dhe humbjes me Besën (1-2) në Peqin, që kondicioni dhe largimin e legjendës së qytetit të vogël. Mile, së fundi në Superligë ka drejtuar Teutën (ia doli ta mbajë në Kategorinë Superiore në edicionin 2007-2008), por në karrierën si teknik të ish-futbollistit të famshëm janë dhe klube si Tomori, Bylis e Lushnja.
Skeda
Kristaq Mile
Mosha: 51 vjeç
Statusi: I martuar me 3 fëmijë
Si futbollist:
Me Shkëndijën 1975-1977, me Tomorin 1977-1988, me Skraparin 1988-1989.
Me Kombëtaren: 8 ndeshje
I aktivizuar me të gjitha kombëtaret e moshave, U15-U21.
Si trajner: 1990-1993 ekipin U-21 vjeç të Tomorit, me Tomorin (vitet 1993-2003, 2005-2007, 2008-2009) me Bylisin (2003-2004, Lushnjën 2004-2005 dhe Teutën (2007-2008).
Gjirokastër, inaugurohet tapeti i stadiumit të qytetit
Është inauguruar dje në Gjirokastër tapeti i ri i stadiumit të qytetit, ku i pranishëm ka qenë dhe kryetari i Bashkisë së Gjirokastrës, Flamur Bime dhe si dhe presidenti i Federatës Shqiptare të Futbollit, Armando Duke. Duka theksoi se një impiant i tillë është një shans më shumë për futbollin. Fusha është mundësuar nga investimet e Bashkisë, ndërsa pritet që të ketë të tjera ndërhyrje në ambientet qendrore të stadiumit. Ndërkaq para fillimit të ndeshjes ndërmjet Luftëtarit dhe Pogradecit sportdashës të shumtë të të dy ekipeve kishin mbushur shkallët e stadiumit për të ndjekur lojën, pasi një sezon më parë ekipi i Luftëtarit i zhvillonte ndeshjet në qytetin e Tepelenës për shkak të rikonstruksionit të fushës. Ndeshja ka vijuar normalisht në fitoren e ekipit të Luftëtarit me rezultatin 3-2.
Tirana Observer