Tiranë – Mijëra besimtarë musliman anë e kënd Shqipërisë, festojnë sot ditën e Fiter Bajramit, festën e cila kurorëzon mbarimin e muajit të shenjtë të Ramazanit.Që në mëngjes, besimtarët e shumtë të kësaj feje u janë drejtuar xhamive për të falur Bajramin e Madh. Në Tiranë, mijëra besimtarë kanë zgjedhur sheshin “Skënderbej” për të falur namazin e Bajramit dhe më pas kanë uruar njëri-tjetrin për festën e tyre.

Kjo festë, vjen pas 30 ditë agjërimi ku besimtarët kanë ndërprerë udhqimet përgjatë këtyre ditëve, për të falenderuar Zotin. Ky është muaji i begatisë, qetësisë shpirtërore, gëzimit të zemrave, që për muslianët është më i rëndësishëm se të gjithë muajit e tjerë.

Sipas muslimanëve, Ramazani është muaji i sakrificës dhe devotshmërisë ndaj Allahut. Fiter Bajrami, vjen nga arabishtja dhe në origjinal i thuhet fitre, që ka kuptimin e foshnjës që sapo ka dalë në jetë.

Në doktrinën islame, nuk pranohet mëkati i trashëguar. Përkundrazi, njeriu lind i pastër (pra fitre), e jeta më pas i kalon në trazime si pasojë e gjynaheve që janë të pashmangshme për nga natyra njerëzore, ndërsa me anë të besimit në Zot, këto gjynahe zvogëlohen e pastrohen me pendim e lutje.

Qeniet njerëzore e njohin agjërimin që nga lashtësia në shumë forma, gjë që dëshmohet edhe në Kuran. Megjithatë nuk ka fakte të cilat përcaktojnë në mënyrë të qartë se në ç'kohë nisi agjërimi për herë të parë. Thuhet se të parët që filluan agjërimin ishin egjiptianët e lashtë, të cilët agjëronin në një mënyrë të veçantë në festat e tyre. Agjërimin e praktikuan edhe kinezët e vjetër.

Ata agjëronin sidomos në kohën e luftrave. Këtë rit ata e kishin të përcaktuar në ligjet e fesë së tyre. Edhe indianët kishin ditë dhe forma të caktuara të agjërimit siç shpjegojnë librat e tyre të shenjtë si Brahma, etj. Ata agjëronin zakonisht kur fillonte stina e pranverës ose e vjeshtës. Pasuesit e Budës, banorët e Tibetit dhe persët e vjetër kishin forma të ndryshme të të agjëruarit.

Agjërimi është praktikuar edhe në Greqinë e vjetër, në forma të ndryshme, të cilat u morën nga koha e Faraonëve. Përveç librave hyjnorë, Hipokrati, i quajtur dhe babai i Mjekësisë, është i pari që shënoi dhe mblodhi format dhe mënyrat e të agjëruarit. Ai dha mendime sidomos për format e të shëruarit, duke agjëruar e duke shpjeguar dhe shkallët e rezistencës në moshat e ndryshme.
start