Edicioni i sivjetëm i Festivalit Folklorik Kombëtar të Gjirokastrës, është dhe mbetet një dëshmi e patjetërsueshme e diversitetit dhe pasurisë kulturore që karakterizon botëkuptimin dhe identitetin shqiptar, përkrah vlerave të trashëgimisë kulturore ballkanike dhe evropiane. Zëvendësministrja e TKRS, Suzana Turku, deklaroi në konferencën e djeshme për shtyp në Gjirokastër se: "Në këtë veprimtari, krijimtaria popullore shqiptare shpaloset ashtu sikundër është në të vërtetë: me ngjyrat e nuancat e të gjithë krahinave brenda Shqipërisë, por edhe me ato të shqiptarëve të Kosovës, Maqedonisë, Malit të Zi dhe të diasporës shqiptare, që nga ajo më e hershmja dhe deri tek më e reja". Madje, sipas Znj.Turku një nga personalitetet e shquara të artit dhe muzikologjisë shqiptare, vetë kjo larmi dëshmon për një komb të kulturuar e me integritet evropian. Festivali është gjithashtu një dëshmi e gjallë e respektit dhe përkujdesjes së vazhdueshme që tregon shteti shqiptar për kulturën e pakicave etnike dhe minoriteteve etno-kulturore që gjallojnë në Shqipëri, duke përmbushur kështu një nga parimet bazë të Këshillit të Evropës dhe ndërtimit të Evropës së re.
"Kjo veprimtari, e cila mbetet padyshim një ndër evenimentet më të rëndësishme të kulturës në vend, do të pasurojë jetën e këtij qyteti dhe mbarë Shqipërisë. E rëndësishme është që ky eveniment të mos shikohet dhe të vlerësohet si dikur: thjesht si një muze i mbyllur, me karakter të përkohshëm dhe propagandistik, por MTKRS e vlerëson krijimtarinë që po prezantohet në skenën e Gjirokastrës si një ekspozitë kurdoherë në lëvizje dhe përherë të hapur, në funksion të turizmit kulturor dhe të jetës aktive, në koherencë edhe me rregullat dhe parimet e ekonomisë së tregut", deklaroi zv/ministrja Turku. Më tej, ajo nënvizoi faktin se ky edicion është më i madhi në historinë e organizimit të kësaj veprimtarie. Në të marrin pjesë 1300 artistë nga Shqipëria dhe nga të gjitha trevat dhe komunitetet shqiptare në botë, të cilët do të prezantojnë me seriozitet dhe përkushtim të gjitha vlerat më përfaqësuese të folklorit shqiptar.
Rëndësia e Festivalit Folklorik Kombëtar rritet edhe më shumë par faktin se, zhvillohet edhe në kuadrin e 29 shtatorit, Ditës Kombëtare të Trashëgimisë Kulturore, duke sensibilizuar të gjithë faktorët që kanë përgjegjësi shtetërore dhe shoqërore për ruajtjen dhe jetësimin e trashëgimisë sonë kulturore në mbrojtje të identitetit tonë kombëtar. Zv/ministrja Turku bëri të ditur dje për mediat, se në vijim të tavolinave të rrumbullakta nga diskutimet me nivel të lartë shkencor është propozuar që të shihet mundësia e studimit të mëtejshëm të potencialit, që Eposi i Kreshnikëve ka për kulturën shqiptare dhe për përpunimin e mëtejshëm shkencor të dosjes për t'ia paraqitur më pas UNESCO-s. Kjo përgatitje është një proces i gjatë po aq i rëndësishëm për të prezantuar një material cilësor dhe për të mundësuar mirëpërfaqësinë të traditës së lashtë shqiptare në pasurinë botërore të njerëzimit.
Bota Sot