Berat- Pak kohë më parë, ai u cilësua si një person me rrezikshmëri të lartë shoqërore dhe si i tillë duhej izoluar. Është vetëm 13 vjeç, po akuzohet për krime që nga vjedhja, përdhunimi, e deri tek vrasja. E nëse për pak kohë më parë ai u pa si rrezik në ambientet shoqërore apo publike, ai tashmë po shihet si rrezik edhe pse ndodhet i izoluar në një nga dhomat e spitalit të Beratit. Ajo çfarë ai transmeton tek personeli shëndetësor që i shërben, apo tek pacientët që e shohin rastësisht nga korridori, i ka futur të gjithë në ankth, duke bërë që askush të mos i afrohet nga frika.Kështu, ai është lënë i vetëm në mendimet dhe gjestet e tij, duke harruar që si fëmijë që është, ka nevojë edhe për kujdes dhe higjienë sa më të rregullt. “Mostra” 13-vjeçare që është izoluar nga policia, pas vrasjes të 47-vjeçares dhe plagosjes rëndë të një 60-vjeçareje nga qyteti i Urës Vajgurore, rrezikohet nga epidemia. Burime nga spitali bëjnë të ditur se prej mëse një muaji, 13-vjeçari nuk ka as nuk është larë dhe as ndërruar.
Frika ndaj 13-vjeçarit
Sipas mjekëve të spitalit, 13-vjeçarit tashmë ka filluar t’i nxihet edhe fytyra. Mjekët bëjnë të ditur gjithashtu se ky fëmijë është totalisht i braktisur edhe nga familja për krimin që ka kryer dhe në kushte të tilla ai rrezikohet nga një epidemi e mundshme Ai ruhet me 7 policë, pasi është tejet i rrezikshëm për njerëzit që ndodhen në spital. Mjekët e repartit të kirurgjisë janë shumë të shqetësuar për indiferentizmin e organeve të drejtësisë, të cilat nuk po marrin masat e duhura për ta larguar “mostrën” 13-vjeçare nga spitali. Aktualisht ai nuk ka në kartelë as një lloj mjekimi për kurim. Mjekët janë shprehur se të gjithë të sëmurët që ndodhen të shtruar në këtë spital aktualisht janë të rrezikuar nga shpërthimi i një epidemie që mund të dalë nga dhoma e izolimit ku ndodhet 13-vjeçari i palarë prej mëse një muaji. Sipas mjekëve, mostra 13-vjeçare kryen veprimet e një vampiri, duke reklamuar veprimet e tij pranë derës së hekurt. Këtë veprim, ai e kryen në momentin që të sëmurët dalin në korridor për të kryer veprimet që ua rekomandon mjeku pas operacionit. Në momentin që 13-vjeçari dëgjon zhurmë, del menjëherë tek dera e hekurt dhe kryen veprime të ndryshme, duke u shprehur se kur të dalë do t’i hajë pacientët, pasi i ka fiksuar si fytyra. Sipas mjekëve, 13-vjeçari ka nevojë urgjente për t’u larë, por problemi është se të gjithë kanë frikë t’i afrohen nga veprimet që ai ka kryer, si dhe nga imitimet që bën vazhdimisht. Drejtori spitalit Neritan Vito është shprehur për gazetën se është e domosdoshme që të ndërhyhet urgjentisht për ta larguar këtë mostër nga spitali, për arsye se ai me veprimet që ka kryer dhe vazhdon të kryejë, ka frikësuar të gjithë punonjësit e spitalit e në veçanti të sëmurët. “Me veprimet që ai vazhdon të kryejë është bërë shumë i rrezikshëm. Ne si drejtori e spitalit në bashkëpunim dhe me drejtorinë e policisë i kemi bërë apel Ministrisë së Drejtësisë dhe asaj të Brendshme që të bëjnë të mundur largimin urgjent të “mostrës” që është kthyer në “makth” për të sëmurët dhe mjekët e këtij pavijoni, të cilët çdo ditë punojnë nën presionin e frikës së mundshme”-, shprehet ai. Ndërkaq, mjekët e këtij spitali tashmë kanë nisur t’i japin valium në mënyrë që ai të bjerë në gjumë, duke frenuar kështu veprimet e tij. Sipas mjekëve, edhe vetë familjarët e “mostrës” disa ditë më parë kanë kërkuar largimin nga spitali të djalit tyre, pasi dhe vetë ata e kanë parë gjendjen e rënduar të spitalit dhe të të sëmurëve, të cilët kanë frikë nga ai.