Politika Kryeministri bën ekspozenë e takimeve në Bruksel dhe itinerarin e 2500 km të kthimit në Shqipëri

Pas mbërritjes nga Brukseli, Kryeministri Berisha ka bërë dje një ekspoze të detajuar të takimeve të suksesshme pas dorëzimit të dosjes voluminoze me përgjigjet e Pyetësorit për marrjen e statusit kandidat në BE. Përmes një konference për shtyp, kryeministri shprehu angazhimin maksimal të qeverisë për të shndërruar në realitet destinacionin e shqiptarëve, anëtarësimin në Bashkimin Europian. duke reaguar njëkohësisht ndaj deklaratave më të fundit të kreut të PS, Edi Rama, kryeministri theksoi se vendi po ecën drejt momenteve historike dhe nuk ka më kthim prapa në kohët e errëta të diktaturës vuajtjes dhe mjerimit. Berisha u shpreh se duke filluar që nga data 5 maj i vitit 1992, ai kreu vizitën e tij të parë në Komisionin dhe Parlamentin Evropian. Kreu i qeverisë bëri të ditur se që nga ajo kohë, ai ka takuar në mënyrë të përsëritur të gjithë Kryetarët e Komisionit Europian, nga Zhak Delors deri te Presidenti Barroso dhe të gjithë kryetarët e Parlamentit Evropian, nga Egon Klepsh te Presidenti Buzek. Por sipas tij, vizita në Bruksel e datës 14-15 prill, ishte vizita më e rëndësishme dhe historike për shqiptarët dhe Shqipërinë. Kryeministri u shpreh se momenti i dorëzimit të Pyetësorit para Komisionit Evropian, ishte momenti më historik për vendin pasi dëshmoi progresin e jashtëzakonshëm të Shqipërisë gjatë 18 viteve të fundit. "Në Bruksel unë shkova për të paraqitur para Komisionit Evropian, librin e përgjigjeve të 2284 pyetjeve që Komisioni i drejtoi shtetit shqiptar në datën 16 dhjetor 2009. Momenti ishte solemn, ishte gjithashtu thellësisht emocional, jo vetëm për ne por dhe për mikpritësit tanë. Në datën 14 prill, në orën 16, unë i dorëzova Komisionerit për Zgjerimin, Fule, librin e përgjigjeve të pyetjeve që Komisioni i adresoi Shqipërisë, si libri më voluminoz të shtypur në historinë e vendit. Vëllimi prej 3854 faqesh, përmban të gjitha të vërtetat e mëdha të Shqipërisë dhe shqiptarëve këto 18 vite. Përmban të gjitha ligjet, praktikat dhe reformat, mbi të cilat shqiptarët ndërtuan demokracinë e tyre funksionale, ndërtuan ekonominë e tregut funksional, ndërtuan idealin e tyre europian", u shpreh Berisha. Në vijim të fjalës së tij, Kryeministri u shpreh se në vizitën e tij të parë në Bruksel para 18 vitesh, Shqipëria ishte një vend ku mbizotëronte kaosi ekonomik. Sipas tij, në ato vite Shqipëria dhe qytetarët shqiptarë vuanin pasojat e një sistemi i cili e ktheu vendin edhe me shekuj larg ëndrrave evropiane. Kreu i ekzekutivit theksoi se gjithçka, duke filluar nga rrogat, të ardhurat për frymë si dhe fuqia ekonomike e shtetit të atëhershëm, ishte shumë larg hapave të vendeve të tjera, anëtare të BE-së. "Tetëmbëdhjetë vjet më parë do të vizitoja Brukselin si përfaqësues kryesor i një vendi që përjetonte zinë e mjerimit dhe skamjes së thellë. E një vendi që kishte një ekonomi hiperkolektiviste totalish të falimentuar dhe që renditej në 3-4 vendet më të varfra të planetit. Shqipëria e 18 viteve më parë numëronte rreth 80% të forcës së saj punëtore si të papunë, të ardhurat për frymë për qytetarët shqiptarë ishin vetëm 204 dollarë. Rroga mesatare e qytetarëve shqiptarë ishte 6 dollarë dhe rezerva valutore e vendit në total ishte vetëm 1.5 milionë dollarë. Presidenti i vendit kishte një pagë rreth 16 dollarë në muaj. Shqipëria ishte vendi që përjetonte eksodet më masive që nga koha e Skënderbeut deri në ato vite. Në vizitën time të parë në Bruksel mund të thuhet pa e ekzagjeruar se në disa aspekte vendi ndodhej edhe shekuj larg Brukselit dhe vendeve të tjera anëtare të Bashkimit Evropian", theksoi Kryeministri. Më tej, ai u shpreh se udhëtimi 18-vjeçar i Shqipërisë në rrugën drejt standardeve perëndimore, nuk ka qenë aspak i lehtë.
Brukseli kërkoi zgjidhjen e ngërçit politik, përmes rrugëve kushtetuese
Duke iu referuar takimit të tij me Presidentin Barroso, Berisha tha se ftesës së tij për të vizituar Shqipërinë, zyrtari i lartë i KE-së i ishte përgjigjur pozitivisht. Në mënyrë të veçantë, Kryeministri vlerësoi edhe takimin e tij me Presidentin e BE-së, Van Ronpoy, duke e cilësuar atë si një mik të shquar të Shqipërisë dhe të shqiptarëve. Berisha tha se gjatë takimit me kreun e BE-së, kishte bërë një pasqyrim të reformave në procesin e integrimit europian. Berisha tha se zgjedhjet e 28 qershorit ishin një temë e rëndësishme mbi të cilën të dy personalitetet ishin ndalur gjatë. Berisha tha se kishte marrë nga Presidenti i BE-së vlerësimet më të larta për standardet dhe transparencën që çertifikuan këto zgjedhje. Gjithashtu, Kryeministri theksoi se Presidenti Van Rompey kishte nënvizuar se zgjidhja e ngërçit politik mund të kryhet vetëm në respekt të plotë me Kushtetutën dhe transparencës në rrugë evropiane. Po ashtu, Berisha tha se Presidenti Van Rapoy vlerësoi përpjekjet e shqiptarëve, librin e përgjigjeve që ai i kishte paraqitur si dhe detyrimet që po përmbushen me procesin e vizave. "Rolin e rëndësishëm të Shqipërisë në rajon dhe pranoi me kënaqësi ftesën për të vizituar Shqipërinë unë e sigurova Presidentin Van Ronpoy se kjo do të jetë ngjarje e veçantë", tha Berisha, ndërsa u ndal edhe tek takimi i tij me kreun e Parlamentit Europian, Jerzy Buzek. Edhe ndaj këtij takimi Kryeministri theksoi se kishte marrë vlerësimet më të mira për arritjet e Shqipërisë, vizionin e qeverisë shqiptare për të ardhmen europiane të vendit. "E njoha Presidentin europian me veprimtarinë intensive të Parlamentit shqiptar përsa u përket reformave me përpjekjet që kam bërë dhe po bëj për bashkëpunimin me opozitën. E njoha Presidentin Buzek me vendosmërinë e qeverisë për t'i dhënë zgjidhje problemit me opozitën në kornizën e Kushtetutës, duke zbatuar rregullat e transparencës. E njoha me rezultatet e reformave ekonomike, luftën kundër korrupsionit, luftën kundër krimit të organizuar. Unë i shpreha mirënjohjen më të thellë Presidentit Buzek për mbështetjen e madhe që Parlamenti Europian i ka dhënë Shqipërisë", tha Kryeministri. Po ashtu, ai vuri në dukje se rezultatet e vizitës së fundit të delegacionit të Parlamentit Europian në Shqipëri ishin shumë të rëndësishme. Kryeministri vlerësoi se përfaqësuesit e këtij delegacioni kanë bërë një avokati të shkëlqyer të arritjeve të Shqipërisë në të gjitha fushat, por në mënyrë të veçantë për të plotësuar të gjitha kushtet dhe kërkesat për liberalizimin e vizave. Kryeministri shprehu një falënderim të thellë për të gjithë zyrtarët e lartë që e mikpritën në Bruksel, për mbështetjen mjaft miqësore që kanë dëshmuar dhe dëshmojnë ndaj shqiptarëve dhe Shqipërisë.
Sakrificat e shqiptarëve po shpërblehen me rrugën e sigurtë drejt BE
Sipas Berishës, ky udhëtim drejt Evropës ka qenë për shqiptarët, një udhëtim i vështirë plot me mundime dhe sakrifica. Megjithatë, vijoi Kryeministri, këto sakrifica rezultojnë sot si përpjekjet e një udhëtimi të sigurtë dhe të suksesshëm. Në këtë drejtim, ai theksoi se të gjithë kryesuesit e vendeve anëtare të BE-së, në mënyrë publike dhe të përsëritur e kanë vlerësuar këtë udhëtim si një mrekulli të vërtetë. Kreu i qeverisë, u shpreh se pas këtyre 18 viteve, këtë herë ai përfaqësoi në Bruksel, një vend me një realitet krejtësisht të ndryshuar. Berisha theksoi se këtë herë në Bruksel nuk përfaqësonte kreun e një shteti pa institucione, por një vend anëtar të NATO-s dhe të Këshillit të Evropës. Shqipëria këtë herë, u shpreh Berisha, përfaqësonte një vend i cili ka firmosur dhe zbatuar Marrëveshjen e Stabilizim-Asociimit, e ratifikuar nga të gjitha vendet anëtare të BE-së. Kryeministri shqiptar theksoi se në vizitën e tij të parë në Bruksel, ëndrra europiane ishte shumë e largët. Ndërkohë që para disa muajsh, në 16 nëntor 2009 u vendos me unanimitet nga ministrat e Jashtëm të vendeve anëtare të BE-së se do të hapeshin në mënyrë përfundimtare dyert e integrimit për Shqipërinë në Bashkimin Europian. Ai theksoi se këtë herë, përfaqësoi një vend në të cilin funksionojnë të gjitha standardet evropiane dhe institucionet demokratike dhe ku ekonomia ka bërë progres të jashtëzakonshme. "Përfaqësova një vend i cili zhvilloi zgjedhje të lira dhe të ndershme, që disponon institucionet e shtetit ligjor, funksional, një vend me ekonomi tregu funksionale, e cila i rezistoi më mirë se çdo ekonomi tjetër cunamit financiar, ekonomik, europian dhe botëror. Kjo jo se ekonomia shqiptare nuk ishte pjesë e ekonomisë globale, jo se ora e saj nuk është ora globale. E kundërta është e vërtetë, ekonomitë e vendeve të vogla janë hiperglobale ose më globale shumë herë se të vendeve të mëdha. Por ekonomia shqiptare është e vendosur në parimet më të drejta, në bazat më solide të një ekonomie tregu. Kësaj radhe, përfaqësoja një vend i cili në indeksin e tij të zhvillimit ka lënë mbrapa 127 vende të globit. Një vend ku rezerva valutore është rritur 2000 herë, rroga mesatare ishte rritur së paku me 70 herë, të ardhurat për frymë me mbi 30 herë. Përfaqësova një vend që po ndërton infrastrukturën më moderne në rajon. Një vend që kishte arkivuar Shqipërinë e vitit '92 dhe kishte krijuar një Shqipëri krejt tjetër. Ndjenja e krenarisë për mua ishte e madhe, por ndjenja e përgjegjësisë edhe më e madhe", u shpreh Berisha.
7 shtete lehtësi maksimale për kalimin e delegacionit shqiptar
Kryeministri bëri të ditur edhe problematikat e hasura gjatë nisjes në Tiranë për shkak të resë së hirit që shkaktoi vullkani i Islandës. Berisha falënderoi të gjitha shtetet që mbështetën dhe ndihmuan delegacionin shqiptar, duke krijuar lehtësira për kalimin e territorit. "Takimet e mija në Bruksel përfunduan në datën 15 prill në darkë. Dëshira ime ishte të nisesha menjëherë drejt Shqipërisë, që të ndaja këtë moment historik me qytetarët shqiptarë, që unë i shpreh mirënjohjen e thellë për kontributin e madh që kanë, në të gjitha rezultatet e arritura nga Shqipëria në këto 18 vite. Një re hiri që vërshoi nga Islanda në Europë dhe bllokoi qiellin e saj, bllokoi fluturimet ajrore, mua më mbetej alternativë e vetme toka, ndaj dhe u nisa në një udhëtim për rreth 2500 kilometrash. U nisa duke i rënë diagonal Gjermanisë dhe mbërrita në mëngjesin e datës 17 në Vjenë dhe më pas të nesërmen në mëngjes u nisa nga Vjena duke kaluar Slloveninë, Kroacinë, Bosnje-Hersegovinën, Malin e Zi dhe mbërrita në Shqipëri. Udhëtimi im më rikujtonte 7 male kaptuar, 7 vende kaptuar. Ky ishte një udhëtim i lodhshëm, por ishte një udhëtim i sigurtë falë rrugës që unë bëra, i suksesshëm, sepse pas bllokimit të linjave ajrore kjo ishte mundësia më e shpejtë për t'u gjendur në Shqipëri. Dua të falënderoj autoritetet e 7 vendeve në territoret e të cilave kalova, për lehtësitë e mëdha që më krijuan dhe që bënë që udhëtimi im të ishte pothuaj si rrufe", tha Berisha.
KE, e angazhuar të mbështesë hapat e Shqipërisë drejt BE
Më tej, Kryeministri u ndal te takimi që pati me Komisionerin për Zgjerim, Stefan Fule. Berisha theksoi se Fule, u shpreh se ky libër është libri më i rëndësishëm në historinë moderne të Shqipërisë. Berisha u shpreh se Komisioneri Fule shprehu angazhimin e tij personal se Komisioni do t'i shqyrtonte me vëmendjen më të madhe përgjigjet e pyetjeve nga autoritet shqiptare. Gjithashtu, Berisha u shpreh se gjatë takimit me Komisionerin Fule, u diskutua në mënyrë të veçantë edhe mbi procesin e liberalizimit të vizave. "Në takimin me Komisionerin Fule një vend të veçantë zuri çështja e vizave. Në datën 14 prill Fule më siguroi se vlerëson shumë përparimin e ndjeshëm të Shqipërisë në plotësimin e kritereve dhe se kjo është rruga e sigurtë për realizimin e heqjes së vizave. Vetë ai kishte një vlerësim të madh për arritjet në këtë fushë. Kreu i qeverisë bëri të ditur se në takimin me Komisionerin Fule, i shprehu këtij të fundit mirënjohjen më të thellë për KE, për vendet anëtare, për ndihmën e gjithanshme të tyre, financiare, ekonomike, teknike që kanë qenë përcaktuese për suksesin që Shqipëria ka arritur. Ky institucion, sipas tij, komunikon me autoritetet shqiptare në mënyrën më transparente dhe kjo përbën për Shqipërinë një avantazh dhe një ndihmë shumë të madhe.
Nderim të thellë për humbjen e Presidentit të shquar polak, Kazinski
Në fjalën e tij, Berisha u ndal në një tjetër moment të veçantë, pjesëmarrjen e tij në një ceremoni që u organizua nga Presidenti Buzek në PE në nderim të Presidentit Kazinski, bashkëshortes së tij dhe 93 zyrtarëve të tjerë elitë e kombit polak, që sipas tij, ranë për t'u bërë të pavdekshëm në një detyre nderi ku ata do të shkonin në Katin për të nderuar 20 mijë martir të kombit polak, që u masakruan në mënyrën më barbare nga hordhitë staliniste në Luftën e Dytë Botërore. "Kam pasur rastin të njoh personalisht Presidentin Kazinski, të drekoj me të i ftuar nga miq të përbashkët, kam pas rastin të njoh disa anëtarë të stafit të tij. Disa nga deputetët që humbën jetën në tragjedinë e Smolenksit, të cilët vetëm disa muaj më parë kishin vizituar Shqipërinë", tha Kryeministri, ndërsa vuri në dukje se në një ceremoni dinjitoze zyrtarët e kombit polak u nderuan, duke u thirurr emër për emër të gjithë ata që humbën jetën. Kryeministri tha se kishte shprehur ngushëllimet, solidaritetin, simpatinë e tij dhe të të gjithë shqiptarëve për Presidentin Buzek, për këtë humbje thellësisht tragjike të kombit polak.

bota sot