SMS-të fyese, Bulku : Më kanë kërcënuar gratë e PS-së

Suela Topi

Gratë socialiste zbatojnë parimet e marksizëm-leninizmit

Deputetja demokrate, Rajmonda Bulku, ka marrë kërcënime me telefonata dhe mesazhe pas deklaratave të saj për grevën e grave socialiste. Pohimi u bë nga vetë ajo, gjatë seancës së djeshme plenare. Bujku pohoi se po përsëritet viti 1991, kur luftohej për demokraci. Ajo fajësoi kryesocialistin Edi Rama për këto presione. Madje, Bulku pohoi se në kërcënimet dërguar në adresë të saj përmendej dhe Fieri, të cilin ajo e quajti një nga ditët më të këqija për socialistët. Bulku përsëriti thirrjen që socialistët të kthehen në Kuvend, ndërsa shprehu keqardhje për deputetet e PS-së, të cilat sipas saj, po zbatojnë parimet e marksizëm-leninizmit, partia e para.

Kërcënimet

“Edi Rama dua të them se është njësoj si në 1991-shin. Shkoj në shtëpinë time, po përgatisja drekën për familjarët e mi dhe më vijnë mesazhe dhe telefonata kërcënuese. Telefonatat ishin zëra grash dhe më vinte shumë keq, ndërsa mesazhet nuk i kuptoja dot, sepse ishin anonimë. Mendova se janë ekstremistë, janë burra, janë njerëz që mbase kanë pirë një gotë dhe kanë shkruar. Por mora vesh se janë femra, femra, ato motrat e tua”, - kështu iu drejtua demokratja Bulku kreut të socialistëve, Edi Rama, pas kërcënimeve të bëra në adresë të saj. Duke e quajtur këtë një veprim të ulët, ajo pohoi se në mesazhet e telefonit ishte përmendur dhe Fieri, që është një nga ditët më të këqija për socialistët. Madje, ligjvënësja demokrate, duke iu drejtuar Ramës, pohoi se “si ka mundësi të më fyejnë, të përmendin Fierin? Zoti Rama, cili ka qenë qëndrimi juaj për natën e Fierit, mos ka qenë dora juaj dhe atje?”. Bulku më tej ka kundërshtuar grevën e urisë të socialistëve, duke pohuar se grevë urie bëjnë ato shtresa që kanë probleme dhe jo parlamentarët, të cilët janë të zgjedhurit e popullit dhe për këtë arsye, duhet të jenë në Kuvend. “Ju keni marrë votat për të qenë në Parlament dhe për t’i zgjidhur këtu punët dhe jo rrugëve. Ju keni zgjedhur rrugën dhe e bëni shumë shëmtuar, se në ‘91 kemi dalë në rrugë për të përzënë etërit komunistë. Ata janë klonimi i Enver Hoxhës pas 20 vitesh”, - tha ajo. Ligjvënësja demokrate shtoi se është turp për shqiptarët që të krijohet sot kjo situatë. “Është turp për ju që destabilizoni vendin në këto momente, që të gjithë shqiptarët duan të jenë të lirë, duan që Shqipëria të shkojë në Evropë”, - pohoi ajo. Sipas Bulkut, çdo shqiptar kërkon të lëvizë i lirë për të takuar të afërmit apo familjarët e tij dhe nuk do të kthehet 20 vite mbrapa në kutitë e mbyllura. “Nuk duam të numërojmë ato kuti të vdekura, hajdeni këtu dhe numëroni, pse keni frikë? Sepse ti nuk do të hapen kutitë Edi Rama, por do një rrëmujë për të marrë vendin e Kryeministrit që nuk fitove dot me vota”, - tha Bulku. Më tej, ajo falënderoi dhe shoqatat e grave, të cilat dy ditë më parë protestuan kundër Edi Ramës dhe vendimit të socialistëve për grevë urie. Më tej, duke iu rikthyer grevës, Bulku shtoi se “ato gra, duke qenë socialiste, zbatojnë formulën e marksizëm-leninizmit “E para partia, pastaj familja”. Unë nuk jam me këtë parim, unë jam e para familja, fëmija im dhe pastaj është ajo që unë dua”. Deputetët e kanë duartrokitur fjalimin e saj, ndërsa Topalli shtoi se edhe ekranet ishin ndarë më dysh, në njërën anë Rajmonda Bulku si 20 vite më parë dhe në anë tjetër, i biri i Xhelil Gjonit po si 20 vite më parë. Edhe deputetet e tjera demokrate i bënë thirrje Ramës të ndërpresë grevën, ose të futet vetë në të, duke zëvendësuar një nga gratë.

standart

SMS-të fyese, Bulku : Më kanë kërcënuar gratë e PS-së

SMS-të fyese, Bulku : Më kanë kërcënuar gratë e PS-së

SMS-të fyese, Bulku : Më kanë kërcënuar gratë e PS-së :: Komentet