Kongresi i PDK shkarkon Nard Ndokën nga posti i kryetarit

Nga Armand Maho

Kongresi i Jashtëzakonshëm i PDK ka vendosur shkarkimin nga posti i kryetarit të partisë të Nard Ndokës dhe emërimin në këtë post të Anton Gurakuqit. Shkarkimi i Ndokës erdhi pas përçarjes që pësoi kjo parti dhe akuzave që ngritën kundërshtarët e tij për shkelje të statutit nga ana e tij dhe vendosje të diktatit në parti, si dhe abuzimit me postin që e ka marrë në sajë të siglës së PDK. Në votim morën pjesë 323 delegatë apo 2/3 e të gjithë delegatëve të PDK, nga këta votuan pro Gurakuqit 293, kundër 17 dhe dolën të pavlefshme 13 vota. Kongresi vendosi gjithashtu të rikthejë dhe simbolet e mëparshme të partisë, të ndërruara kur Ndoka erdhi në krye të saj.

Ndoka abuzoi me postin

Ndërkohë, me shkarkimin nga kryetar i PDK, Ndoka, nuk mund të mbajë më as postin e ministrit të Shëndetësisë. Folësit në kongres u shprehën se askush s’mund të luajë me idealet e demokristianëve dhe se demokristianët e vërtetë nuk janë njerëzit e huazuar nga Paskal Milo apo Ilir Meta, siç ka bërë Ndoka me postin që i është dhënë në emër të aleancës me PD. “Kohët e fundit, PDK po jep imazhin e një partie pazaresh, ndaj ne jemi këtu për t’i thënë ndal Ndokës, pasi beteja mes vlerave dhe antivlerave ka filluar. Ikja e atyre që nuk kanë asnjë vlerë në politikën shqiptare, si Ndoka, e bënë PDK më të madhe”, - tha Gurakuqi. Dhe të tjerë pjesëmarrës në Kongresin e djeshëm vlerësuan faktin se partia po përdoret për pazare, për tendera dhe ndere të njerëzve afër kryetarit që në shumicën e rasteve i janë përafruar siglës së PDK.


Konflikti me PD

Por duket se Ndoka nuk ka probleme vetëm brenda partisë së tij, por kërkon të hapë konflikte edhe me partinë më të madhe të koalicionit qeverisës, PD. Burime nga Ministria e Transporteve bëjnë të ditur se Sokol Olldashi ka shkarkuar nga detyra kapitenin e përgjithshëm të porteve, Vladimir Beja, nënkryetar i PDK. Por në rast se Olldashi e ka shkarkuar Bejën për arsye se nuk ka hequr nga Gjiri i Raguzës anijet që pengonin punën për zgjerimin e portit, nuk ka ndodhur kështu me drejtorin e spitalit të Elbasanit. Ndoka shkarkimit të Bejës i është përgjigjur partisë më të madhe në pushtet, duke shkarkuar drejtorin e përgjithshëm të spitalit të Elbasanit. Duhet theksuar se drejtori i Elbasanit është një nga eksponentët e PD në këtë qytet dhe një kirurg mjaft i respektuar, i cili tashmë duhet të mbajë mbi kurriz luftën politike që Ndoka ka hapur jo vetëm brenda partisë së tij, por edhe me partinë më të madhe në pushtet.


Vendimi i gjykatës

Gjithsesi, dhe nga pjesa e PDK që përfaqësohet nga Nard Ndoka ka pasur një reagim Ndoka e konsideron kongresin si një farsë, ndërkohë që shprehet se nuk e njeh atë votim dhe që kongresi i kësaj partie do të zhvillohet më tetë maj. Gjithsesi, duket se çështjen në fjalë do e zgjidhë gjykata, e cila do të vendosë se kush është kryetari i PDK, ai i kongresit të 6 majit apo ai i kongresit të 8 majit. Gjithsesi, derisa çështjen ta zgjidhë gjykata, Ndoka nuk mund të përfaqësojë PDK në jetën politike, si në parlament, por edhe në qeverisje.