Ministria e Shëndetësisë rivoton Ndokën kryetar të PDK

Nga Armand Maho

Në rast se dy ditë më parë u zgjodh një kryetar i PDK, dje në kongresin e tjetër të mbajtur nga kjo parti ishte radha e Nard Ndokës të rizgjidhej kryetar i partisë, me qëllim vazhdimësinë e përmbushjeve të idealeve demokristiane, siç tha dhe vetë. Nga ana tjetër, krahu që kërkon shkarkimin e tij pretendon se dhe ai ka zgjedhur një kryetar dhe ai është Anton Gurakuqi.

Delegatët

Gjithsesi, Ndoka në fjalën e tij theksoi se PDK, me votat dërrmuese që adresoi për emrin e tij, tregoi dhe njëherë demokracinë e pakufishme që zotëron këtë parti. Në rezultatet përfundimtare, nga 460 delegatë sipast komisionit të numërimit të votave, Ndoka mori 422 vota pro, 32 delegatë abstenuan, ndërsa 6 votuan kundër. Megjithëse shumica e delegatëve ishin punonjës të Ministrisë së Shëndetësisë, siç u provua dhe nga një kronikë televizive, ku gjatë zhvillimit të punimeve të Kongresit, në këtë dikaster nuk gjendej njeri, sërish Ndoka do të vazhdojë të mbajë vulën e partisë dhe së bashku me të dhe postin e ministrit të Shëndetësisë. Në kongresin e mëparshëm, ku u zgjodh në krye të partisë, morën pjesë 323 delegatë të PDK, pra dy të tretat e delegatëve që morën pjesë dhe te Ndoka dhe nuk merret vesh tashmë se cilët janë delegatët e kësaj partie. Natyrisht, Ndoka nuk kishte si e plotësonte numrin, sikur dhe krahu i kundërt të ketë dhënë shifra fiktive, pasi një pjesë jo e vogël e kësaj partie janë përkrahës të Lesit, Bushatit, etj., të cilët kanë qenë simbolet e saj.


Sulmet

Ndoka në fjalën e tij nuk la pa sulmuar dhe kundërshtarët e tij brenda partisë, të cilët i cilësoi si “servilë e batakçinj”. “PDK tregoi demokracinë më të madhe me votëbesimin e kërkuar dhe të votuar, xhelozia i verboi ish-kolegët tëne, të cilët karrierën e tyre e kanë ndërtuar pa moral, servilë e batakçinj politikë. Morali ynë nuk ka asgjë të përbashkët me ta, iu urojmë suksese në jetën e tyre private, pasi në jetën politike kanë degraduar”, - tha Ndoka. Nga ana tjetër, ai u shpreh se PDK nuk ka ardhur në politikë për ta përdorur si privilegj për të hapur vende të reja pune, ndërkohë që nuk la pa përmendur dhe mbrojtjen e zjarrtë që i ka bërë, sipas tij, Bashkim Kopliku, kësaj partie përpara CDU gjermane. “PDK nuk e sheh pushtetin si privilegj për të punësuar pesë njerëz. Unë kam marrë mandat politik dhe është normale të bashkëpunoj me mbështetesit e mi demokristianë.
PDK është luftuar në vite, këtë e ka deklaruar edhe z. Bashkim Kopliku, ish-zv/kryeministër, në Forumin Politik të CDU- gjermane, mbajtur para pak kohësh në Tiranë”, - tha Ndoka. Nard Ndoka erdhi në Partinë Demokristiane përpara dy vjetësh nga PDR e Pollos. Pas ardhjes së tij u vu re një fluks emërimesh në administratë, kryesisht anëtarë të PDR të huazuar nga Pollo, madje dy prej tyre të sjellë nga Ndoka, janë arrestuar nën akuzën e korrupsionit aktiv, pasi morën poste të rëndësishme në Ministrinë e Transporteve.


Gurakuqi: Prokuroria të hetojë falsifikimet e Ndokës me kongresin


Por nuk kanë qenë në një mendje kundërshtarët e Ndokës në PDK, të cilët e kanë konsideruar zgjedhjen e tij të bazuar në falsifikime rezultati dhe emrash që lidhen me delegatët e vërtetë. Në një njoftim për shtyp, të cilin ata e cilësojnë se ka ardhur nga PDK (pasi me konfuzionin që është krijuar në këtë parti, s’merret vesh se kush është kryetari i vërtetë), thuhet se i gjithë dokumentacioni i paraqitur në gjykatën e rrethit të Tiranës nga Ndoka është fals dhe falsifikimet në të janë të dukshme. “Është paraqitur në gjykatën e rrethit një listë e Këshillit Kombëtar të PDK dhe Kryesisë, listë, e cila, sipas dokumentit është plotësuar me datën 22/10/2007 dhe në këtë listë ndër personat e tjerë fiktivë figuron edhe deputeti Hamit Kosta, i cili në datën që është përpiluar shkresa, nuk ka qenë anëtar i grupit parlamentar të PDK. Ai ka ardhur te PDK në mars të vitit 2008. Pra, Nard Ndoka e ka bërë atë anëtar të kryesisë dhe të Këshillit Kombëtar 6 muaj paradhënie”, - thuhet në deklaratën e Anton Gurakuqit, kryetarit të zgjedhur në kongresin e gjashtë majit. Sipas tij, në dokumentet e dorëzuara pranë gjykatës, Ndoka ka falsifikuar dhe datën e mbajtjes së kongresit, por pa specifikuar qëllimin pse e ka bërë këtë. “Në dokumentet që ka paraqitur në gjykatë, të nënshkruara e vulosura prej tij, ka të shënuar që Kongresi i Jashtëzakonshëm që ka e zgjedhur atë kryetar është mbajtur më datë 06 qershor 2006, ndërkohë që sipas dokumenteve origjinale që ndodhen edhe në dosjen e Gjykatës së Rrethit Gjyqësor Tiranë dhe që dihet botërisht, Kongresi është mbajtur me datën 03 qershor 2006.
Procesverbali i Kongresit të Jashtëzakonshëm është i FALSIFIKUAR dhe i mbajtur para shkarkimit të tij. Kjo del qartë nga fakti që është nënshkruar nga persona që nuk kanë qenë fare në Kongres. Në lidhje me këtë kemi kërkuar ndjekje penale dhe janë duke u verifikuar shkrimet e falsifikatorëve. Ish-kryetari që ka përdorur dy vula, të pamiratuara nga organi legjitim i Partisë, Kongresi i saj”, - thuhet në deklaratë. Kundërshtarët e Ndokës vazhdojnë të këmbëngulin se në votimin e gjashtë majit kanë marrë pjesë 81 për qind e delegatëve, duke i bërë thirrje prokurorisë të ndalojë veprimet e mëtejshme të deputetit Ndoka, ndaj të cilit, sipas tyre, duhet të fillojnë procedurat për heqjen e imunitetit.
“Dëshirojmë të vëmë në dukje, se në Kongresin legjitim të PDK të datës 06 maj 2008, i cili shkarkoi Nard Ndokën nga kryetar dhe që zgjodhi në vend të tij zotin Anton Gurakuqi, morën pjesë 81% e delegatëve, 75 % e Këshillit Kombëtar dhe 60% e Kryesisë. I bëjmë thirrje Prokurorisë së Përgjithshme, parlamentit dhe kryeministrit Berisha që të ndalojë veprimet e mëtejshme të kundërligjshme të këtij deputeti, ndaj të cilit duhet t’i fillojnë edhe procedurat për heqjen e imunitetit.